പോപ്പുലർ ഫ്രണ്ട് കേന്ദ്രങ്ങളിലെ റെയ്ഡിന് കേന്ദ്രസേനയെ എത്തിച്ചത് വ്യോമസേനയുടെ ഈ ഗജരാജൻ! സുരക്ഷാ ദൗത്യത്തിന് കരിപ്പൂരിൽ എത്തിയത് അതിർത്തിയിൽ സേനാ നീക്കങ്ങൾക്ക് കരുത്തേകുന്ന റഷ്യൻ നിർമ്മിത ട്രാൻസ്പോർട്ട് എയർക്രാഫ്റ്റ്; പോപ്പുലർ ഫ്രണ്ടിനെ പൂട്ടാൻ 'സൈന്യവും' പങ്കാളിയായ കഥ

കോഴിക്കോട്; പോപ്പുലർ ഫ്രണ്ട് കേന്ദ്രങ്ങളിലെ നിർണായക പരിശോധനയ്ക്കായി എൻഐഎ, ഇഡി ഉദ്യോഗസ്ഥ സംഘം കഴിഞ്ഞ ദിവസം കോഴിക്കോട് വന്നിറങ്ങിയത് വ്യോമസേനയുടെ ഗജരാജ എന്ന വിമാനത്തിൽ. മൊബൈൽ ജാമർ ഉൾപ്പെടെയുള്ള സംവിധാനങ്ങളുമായി ബുധനാഴ്ച രാത്രി ഏഴ് മണിയോടെയാണ് സംഘം വിമാനത്താവളത്തിൽ എത്തിയത്.

അതിർത്തിയിൽ സേനാ നീക്കങ്ങൾ ഉണ്ടാകുമ്പോൾ പട്ടാളക്കാരെ എത്തിക്കുന്ന വ്യോമസേന വിമാനമാണ് ഗജരാജ്. പോപ്പുലർ ഫ്രണ്ടിന്റെ കേന്ദ്രങ്ങളിൽ പരിശോധന നടത്താൻ കേന്ദ്ര സംഘം കഴിഞ്ഞ ദിവസം കേരളത്തിൽ വന്നിറങ്ങാൻ ഇതേ വിമാനം തന്നെ ഉപയോഗിച്ചു എന്നതും വ്യോമസേനയുടെ സഹായം തേടി എന്നതും ഈ ദൗത്യം എത്രമാത്രം നിർണ്ണായകമാണ് എന്ന് വ്യക്തമാക്കുന്നു. കരിപ്പൂർ വിമാനത്താവളത്തിലാണ് വ്യോമസേനയുടെ ഗജരാജ എന്നറിയപ്പെടുന്ന വിമാനം ഇറങ്ങിയത്.

നിലവിൽ സർവീസ് അനുമതിയില്ലെങ്കിലും പ്രത്യേക സാഹചര്യത്തിൽ കോഴിക്കോട് വിമാനത്താവളത്തിൽ വലിയ വിമാനം പറന്നിറങ്ങുകയായിരുന്നു. ഡി ശ്രേണിയിൽപ്പെട്ട വലിയ വിമാനമാണു കേന്ദ്രസേനയെ എത്തിക്കാനായി പ്രത്യേക അനുമതിയോടെ കരിപ്പൂരിലെത്തിയത്. ഗജരാജ എന്നറിയപ്പെടുന്ന എയർഫോഴ്‌സിന്റെ ഐഎൽ 76 വിമാനമാണ് ഇറങ്ങിയത്. ഈ വിമാനത്തിന് കോഴിക്കോട് വിമാനത്താവളത്തിൽ രണ്ടു വിമാനങ്ങൾക്കുള്ള പാർക്കിങ് സ്ഥലമാണ് അനുവദിച്ചത്. കഴിഞ്ഞ ദിവസം രാത്രിയോടെ എത്തിയ വിമാനം ഇന്നലെ രാവിലെ സുരക്ഷാ ദൗത്യം നിർവഹിച്ച ശേഷമാണു മടങ്ങിയത്.

അതിർത്തിയിൽ സേനാ നീക്കങ്ങൾ നടക്കുമ്പോൾ സൈനികരെ എത്തിക്കാനുള്ള വ്യോമസേനയുടെ വിമാനമാണ് ഗജരാജ്. റെയ്ഡ് എത്രത്തോളം ആവശ്യമായിരുന്നുവെന്ന് ഈ വിമാനം ഉപയോഗിച്ചതിൽ നിന്ന് വ്യക്തമാണ്. ലോക്കൽ പൊലീസിനെ റെയ്ഡിന്റെ കാര്യം അറിയിച്ചിരുന്നു. എന്നാൽ വിശദമായി ഒന്നും അവർക്ക് കൈമാറിയില്ല. സിആർപിഎഫിന് മുഖ്യ സുരക്ഷാ ചുമതലയും നൽകി. മലപ്പുറം ജില്ലയിൽ ദേശീയ നേതാക്കൾ ഉൾപ്പെടെ അഞ്ച് പേരുടെ വീടുകളിലും ദേശീയ പാതയിൽ പുത്തനത്താണിക്ക് സമീപമുള്ള പോപ്പുലർ ഫ്രണ്ട് ഓഫീസിലുമാണ് റെയ്ഡ് നടന്നത്.

സുഖോയിസ്, ജാഗ്വാർ, മിഗ് തുടങ്ങിയ യുദ്ധവിമാനങ്ങളെ ഇന്ത്യൻ വ്യോമസേനയുടെ കരുത്തന്മാരായി കണക്കാക്കപ്പെടുന്നു. എങ്കിലും, സേനയുടെ തന്ത്രപരമായ ആഴം ഗജരാജൻ ആണ് എന്നാണ് റിപ്പോർട്ടുകൾ. റഷ്യ നിർമ്മിത ട്രാൻസ്പോർട്ട് എയർക്രാഫ്റ്റ് ഫ്‌ളീറ്റ് ഓഫ് ഇല്യുഷിൻ അഥവാ ഐഎൽ -76 ആണ് ഇന്ത്യയിൽ 'ഗജരാജ്' എന്ന് പുനർനാമകരണം ചെയ്യപ്പെട്ടത്. ഈ റഷ്യൻ നിർമ്മിത വിമാനം വ്യോമസേനയുടെ ഏറ്റവും പഴക്കം ചെന്ന ട്രാൻസ്‌പോർട്ട് സ്‌ക്വാഡ്രണുകളിൽ ഒന്നാണ്. അടുത്തിടെയാണ് ഈ വിമാനം ഇന്ത്യൻ വ്യോമസേനയിൽ അതിന്റെ ആറ് പതിറ്റാണ്ടുകൾ പൂർത്തിയാക്കിയത്. 1961-ൽ ആദ്യമായി ഇന്ത്യൻ വ്യോമ സേനയുടെ ഭാഗമായ ഈ വിമാനം 1962, 1965, 1971 യുദ്ധങ്ങളിൽ ഇന്ത്യൻ സൈന്യത്തിനൊപ്പം സജീവമായി പങ്കെടുത്തിരുന്നു.

1971-ലെ യുദ്ധസമയത്ത്, ഒരു ട്രാൻസ്‌പോർട്ട് സ്‌ക്വാഡ്രണിനുള്ള അപൂർവ നേട്ടത്തിൽ, ശത്രുവിനെതിരെ വിജയകരമായ ബോംബിങ് ദൗത്യങ്ങൾ നടത്തിയ യൂണിറ്റ് അതിന് 'യുദ്ധ ബഹുമതികൾ' നൽകിയിരുന്നു. 1985 ഏപ്രിലിലാണ് സ്‌ക്വാഡ്രണിൽ IL-76 'ഗജരാജ്' വിമാനം പുനഃസ്ഥാപിക്കുകയും 'മൈറ്റി ജെറ്റ്സ്' എന്ന് പുനർനാമകരണം ചെയ്യുകയും ചെയ്തത്. ഈ വർഷങ്ങളിലെല്ലാം, ജമ്മു കശ്മീരിലെ ഇന്ത്യൻ സേനയ്ക്കും വിദൂര പ്രദേശങ്ങളിലെ സാധാരണ ജനങ്ങൾക്കും പിന്തുണയുമായി പറക്കുന്നത് ഗജരാജൻ തുടർന്നു.

ഒരു T-72 ടാങ്ക് അല്ലെങ്കിൽ 6.5 ടൺ ഭാരമുള്ള മൂന്ന് ട്രക്കുകളും ഒറ്റയടിക്ക് വഹിച്ച് നാല് എഞ്ചിനുകളുള്ള ഐൽ -76 വിമാനത്തിന് പറക്കാൻ കഴിയും. കൂടാതെ ഭാരമേറിയതും വലിപ്പം കുറഞ്ഞതുമായ ഒരു കൂട്ടം വാഹനങ്ങളും ഉപകരണങ്ങളും അതിൽ ദീർഘദൂരത്തേക്ക് കൊണ്ടുപോകാനും ഈ വിമാനത്തിന് സാധിക്കും.

മൈറ്റി ജെറ്റ്സ് ഒരു ലക്ഷത്തിലധികം ഫ്‌ളൈറ്റ് മണിക്കൂർ ലോഗ് ചെയ്തിട്ടുണ്ട്. ഹെവി-ലിഫ്റ്റ് എയർക്രാഫ്റ്റുകൾ കൊണ്ട് സജ്ജീകരിച്ചിരിക്കുന്ന ഈ സ്‌ക്വാഡ്രണിന് അതിന്റെ സേവനത്തിനിടയിൽ നിരവധി തിളക്കങ്ങളുടെ ഒരു നീണ്ട പട്ടിക തന്നെയുണ്ട്. 2004-ലെ സുനാമിക്ക് ശേഷം തകർന്ന റൺവേയിൽ ലോകം ചുറ്റി, ഉത്തരധ്രുവത്തിന് മുകളിലൂടെ പറന്ന് കാർ നിക്കോബാറിൽ ഇറങ്ങിയ ഏക ഇന്ത്യൻ യൂണിറ്റ്, ഇന്ത്യൻ വ്യോമ സേനയുടെ ആദ്യ വനിതാ പൈലറ്റ് പറത്തിയ മൾട്ടി എഞ്ചിൻ ജെറ്റ് എന്നിവ ഇതിൽ ഉൾപ്പെടുന്നു.

രാജ്യത്തിനകത്തും പുറത്തും മാനുഷിക സഹായത്തിനും ദുരന്തനിവാരണത്തിനും ഈ സ്‌ക്വാഡ്രൺ ജെറ്റുകൾ പ്രധാന പങ്കുവഹിച്ചിട്ടുണ്ട്. റഷ്യ - യുക്രൈൻ യുദ്ധ സമയത്ത് ഇന്ത്യൻ വിദ്യാർത്ഥികൾക്ക് സഹായവുമായി ഈ വിമാനങ്ങൾ പറന്നെത്തിയരുന്നു. ബീഹാർ, ഗുജറാത്ത്, പഞ്ചാബ്, ഹരിയാന, ജമ്മു കശ്മീർ, അസം, തമിഴ്‌നാട്, ആൻഡമാൻ നിക്കോബാർ, ഉത്തർപ്രദേശ് എന്നിവിടങ്ങളിലും ഇറാൻ, പാക്കിസ്ഥാൻ, ഫിലിപ്പീൻസ്, ശ്രീലങ്ക, ഇന്തോനേഷ്യ, യെമൻ, നേപ്പാൾ, പുരുഷൻ, അർമേനിയ, കിർഗിസ്ഥാൻ, അഫ്ഗാനിസ്ഥാൻ, ഒമാൻ തുടങ്ങിയ രാജ്യങ്ങളിൽ ഉണ്ടായ വിവിധ പ്രകൃതി ദുരന്തങ്ങളിലെ ദുരിതാശ്വാസ പ്രവർത്തനങ്ങളും ഇതിൽ ഉൾപ്പെടുന്നു

കേരളത്തിലെ റെയിഡ് ഇരുചെവി അറിയാതെയാണ് നടത്തിയത്. അതിനാൽ വിമാനം വന്ന കാര്യവും രഹസ്യമായി സൂക്ഷിക്കുകയായിരുന്നു. പോപ്പുലർ ഫ്രണ്ട് നേതാക്കളുടെ വീട്ടിലും ഓഫീസുകളിലും റെയ്ഡിനെത്തിയത് ഇരുനൂറിലേറെ പേരടങ്ങുന്ന സംഘമായിരുന്നു. രാജ്യത്തിന്റെ വിവിധഭാഗങ്ങളിൽനിന്ന് ഇതിനായി ഉദ്യോഗസ്ഥരെ വിമാനത്തിൽ കേരളത്തിലേക്ക് എത്തിക്കുകയായിരുന്നു.

കേരളത്തിൽ അമ്പതോളം കേന്ദ്രങ്ങളിലാണ് റെയിഡ് നടന്നത്. ഒരു ടീമിൽ നാലുപേർ വീതമായിരുന്നു ഉണ്ടായിരുന്നത്. ഇവർക്ക് സുരക്ഷയൊരുക്കിയത് 50 പേർ വീതമടങ്ങുന്ന കേന്ദ്രസേനയാണ്. മലബാറിലെ പ്രതികളുമായി പുലർച്ചെ അഞ്ചരയോടെ ഓരോ സംഘവും കരിപ്പൂർ വിമാനത്താവളത്തിൽ എത്തിത്തുടങ്ങിയിരുന്നു. ഒമ്പതുമണിയോടെ പ്രതികളുമായി വിമാനം മടങ്ങി. ഒരു പ്രതിക്ക് ഒരു ഉദ്യോഗസ്ഥൻ വീതമായിരുന്നു വിമാനത്തിൽ നിയോഗിച്ചിരുന്നത് എന്നാണ് റിപ്പോർട്ടുകൾ.