സമരസമിതി നേതാക്കളും നാട്ടുകാരും തമ്മില്‍ കടുത്ത ഭിന്നത; നാളെ സമരം അവസാനിപ്പിക്കുന്നത് ഭൂസമര സമിതി നേതാക്കള്‍ മാത്രം; പള്ളിയങ്കണത്തിന് പുറത്തെ കുരിശിന്‍ ചുവട്ടില്‍ നാട്ടുകാര്‍ പുതിയ സമരം തുടങ്ങും; ജനങ്ങളുടെ റവന്യു അവകാശം കവര്‍ന്നെടുക്കാന്‍ ചരട് വലിച്ച സര്‍ക്കാര്‍ പ്രതിനിധി തന്നെ നാരങ്ങാ വെള്ളം കൊടുക്കുന്നത് വന്‍ ചതിയെന്ന് മുനമ്പം ജനത
സമരസമിതി നേതാക്കളും നാട്ടുകാരും തമ്മില്‍ കടുത്ത ഭിന്നത
തിരുവനന്തപുരം: മുനമ്പത്ത് തുടര്‍ന്നു വന്ന നിരാഹാര സമരം താല്‍ക്കാലികമായി അവസാനിപ്പിക്കാന്‍ ഭൂ സംരക്ഷണ സമിതി തീരുമാനിച്ചതില്‍ കടുത്ത ഭിന്നത. കേസില്‍ അന്തിമ വിധി വരുന്നത് വരെ ഭൂനികുതി അടയ്ക്കാന്‍ ഹൈക്കോടതി ഉത്തരവ് പുറപ്പെടുവിച്ചതിന്റെ അടിസ്ഥാനത്തിലാണ് ഭൂ സംരക്ഷണസമിതി കോര്‍ ഗ്രൂപ്പ് യോഗം ചേര്‍ന്ന് സമരം അവസാനിപ്പിക്കാന്‍ തീരുമാനിച്ചത്. മന്ത്രി പി രാജീവ് ഞായറാഴ്ച ഉച്ചയ്ക്ക് 2.30 ന് സമരപ്പന്തലിലെത്തി നാരങ്ങ നീരു നല്‍കി നിരാഹാര സമരം അവസാനിപ്പിക്കാനാണ് നീക്കം.
ഈ തീരുമാനം പുറത്തുവന്നതോടെ കടുത്ത എതിര്‍പ്പാണ് സമര സമതിക്കുള്ളില്‍ നിന്നും ഉയര്‍ന്നിരിക്കുന്നത്. സമര സമിതിയുടെ തലപ്പത്തിരിക്കുന്നവരില്‍ ചിലരുടെ താല്‍പ്പര്യം മാത്രമാണ് ഈ തീരുമാനത്തിന് പിന്നിലെന്നാണ് ഉയരുന്ന വിമര്‍ശനം. ഇത് സമരത്തിന് പിന്തുണ നല്‍ന്ന സഭയില്‍ അടക്കം ഭിന്നതയുണ്ട്. സമരം പൂര്‍ണമായും ഒഴിവാക്കുന്നതിനോട് വൈദികരില്‍ അടക്കം പലര്‍ക്കും എതിര്‍പ്പുണ്ട്. വഖഫ് പരിധിയില്‍ നിന്ന് ഭൂമി ഒഴിവാക്കും വരെ സമരം തുടരുമെന്നാണ് ഇവര്‍ അറിയിച്ചിരിക്കുന്നത്.
സര്‍ക്കാരിന്റെ ഉറപ്പ് വിശ്വസിച്ചാണ് സമരം നിര്‍ത്തുന്നതെന്ന് മുനമ്പം വെള്ളാങ്കണ്ണി പള്ളി സഹവികാരി മോന്‍സി വര്‍ഗീസ് വ്യക്തമാക്കിയത്. ഭൂ സംരക്ഷണസമിതി കോര്‍ ഗ്രൂപ്പ് യോഗത്തില്‍ ഫാ. ആന്റണി സേവ്യര്‍ തറയില്‍, ജോസഫ് റോക്കി പാലക്കല്‍, ജോസഫ് ബെന്നി കുറുപ്പശേരി, മുരുകന്‍ കാതികുളത്ത്, രഘു കടുവങ്കശ്ശേരി, ഉണ്ണി പള്ളത്താംകുളങ്ങര എന്നിവര്‍ പങ്കെടുത്തിരുന്നു. ഇതിന് ശേഷമാണ് സമരം അവസാനിപ്പിക്കാന്‍ ഒരുങ്ങുന്നതും.
എന്നാല്‍, സമരം അവസാനിപ്പിക്കാനുള്ള തീരുമാനം ചിലരുടെ മാത്രം അജണ്ടയാണെന്ന് നാട്ടുകാരില്‍ ഒരു വിഭാഗം പറയുന്നു. 610 കുടുംബങ്ങളുടെ അതിജീവനത്തിനായുള്ള പോരാട്ടം തുടരുമെന്നും, നിരവധി ആള്‍ക്കാരുടെ പിന്തുണ തങ്ങള്‍ക്കുണ്ടെന്നും പ്രഖ്യാപിച്ചു. നാളെ ഉച്ചയ്ക്ക് 2 മണിക്ക് പുതിയ നേതൃത്വത്തില്‍ നിലവിലെ സമരപന്തലിന് സമീപത്തായി പുതിയ സമരം ആരംഭിക്കുമെന്നും ഇവര്‍ വ്യക്തമാക്കി. നാട്ടുകാരില്‍ നല്ലൊരു ശതമാനവും സമരം നിര്‍ത്തുന്നതിനെ അനുകൂലിക്കുന്നില്ല.
സമരം അവസാനിപ്പിച്ചത് ജനങ്ങളോടുള്ള വലിയ ചതിയാണ്. നിലവില്‍ കോടതി ഉത്തരവിലൂടെ കരമടക്കാനുള്ള അനുമതി മാത്രമാണ് ലഭിച്ചിട്ടുള്ളത്. പോക്കുവരവ് (ക്രയവിക്രയ സ്വാതന്ത്ര്യം) ലഭിച്ചിട്ടില്ല. 'ഭൂമി വിറ്റാലല്ലേ പോക്കുവരവിന്റെ ആവശ്യമുള്ളൂ? ഇവിടെ ക്രയവിക്രയ സ്വാതന്ത്ര്യമില്ല. ആകെ കരമടക്കാനുള്ള കാര്യം മാത്രം സര്‍ക്കാര്‍ തന്നിട്ടുള്ളൂ,' സമരക്കാരില്‍ ഒരു വിഭാഗം പ്രതികരിച്ചു. ക്രയവിക്രയ അവകാശം ലഭിക്കുംവരെ പിന്നോട്ടില്ലെന്നും ഇവര്‍ കൂട്ടിച്ചേര്‍ത്തു.
മുനമ്പത്തെ ഭൂമി വഖഫ് ബോര്‍ഡിന്റെ ആസ്തി പട്ടികയില്‍ നിന്നും മാറ്റപ്പെടും വരെ സമരം തുടരുമെന്നാണ് പുതുതായി സമരത്തിന് ഒരുങ്ങുന്നവര്‍ വ്യക്തമാക്കുന്നത്. ഭൂസംരക്ഷണ സമിതിയുടെ മുന്‍ കണ്‍വീനര്‍ക്കെതിരെ ഗുരുതരമായ ആരോപണങ്ങളാണ് ഒരു വിഭാഗം ഉയര്‍ത്തുന്നത്. കണ്‍വീനര്‍ ഒരു വധശ്രമക്കേസിലെ പ്രതിയാണെന്നും, സമരത്തെ വ്യക്തിപരമായ രാഷ്ട്രീയ ലക്ഷ്യങ്ങള്‍ക്കായി ഉപയോഗിക്കുകയാണെന്നും അവര്‍ ആരോപിച്ചു. കണ്‍വീനര്‍ സ്ഥാനാര്‍ത്ഥിയായി വന്നതോടെയാണ് സമിതിയില്‍ നിന്ന് മാറിനിന്നതെന്നും, ഇന്ന് ഭൂസംരക്ഷണ സമിതി ചെയ്തിരിക്കുന്നത് ഒരു വലിയ ചതിയാണെന്നും ഒരു വിഭാഗം നേതാക്കള്‍ തുറന്നടിച്ചു.
സമരം അവസാനിപ്പിക്കാനുള്ള ഭൂസംരക്ഷണ സമിതിയുടെ തീരുമാനത്തിനെതിരെ വൈദികരടക്കം നിരവധി പേര്‍ പിന്തുണ അറിയിച്ചതായും പുതുതായി സമരത്തിന് ഒരുങ്ങുന്നവര്‍ അറിയിച്ചു. 610 കുടുംബങ്ങളുടെ കാര്യങ്ങള്‍ ശരിയാകാതെ എങ്ങനെയാണ് സമരത്തില്‍ നിന്ന് പിന്മാറുന്നതെന്ന ചോദ്യമാണ് തങ്ങളെ മുന്നോട്ട് നയിക്കുന്നതെന്നും ഇവര്‍ വ്യക്തമാക്കി. തങ്ങളുടെ വീടിന്റെ കാര്യം തീരുമാനിക്കാന്‍ ഇവര്‍ക്ക് അവകാശമില്ലെന്നും, നാളെ ഉച്ചയ്ക്ക് 2 മണിക്ക് തങ്ങള്‍ വീണ്ടും സമരം ആരംഭിക്കുമെന്നും അവര്‍ വ്യക്തമാക്കി.
കരമടയ്ക്കാനായിരുന്നോ ഈ സമരകോലാഹലങ്ങളെല്ലാം എന്നാണ് നാട്ടുകാര്‍ ചോദിക്കുന്നത്. കരം അടയ്ക്കാന്‍ ഇടക്കാല ഉത്തരവ് വന്നതോടെ സമരം നിറുത്തുന്നതിലെ യുക്തിയാണ് നാട്ടുകാര്‍ ചോദ്യം ചെയ്യുന്നത്. എന്തുകൊണ്ട് ഡിസംബര്‍ 17ന് ഹൈക്കോടതിയില്‍ നടക്കുന്ന വിശദമായ വാദവും അതിനെത്തുടര്‍ന്നുള്ള വിധിയും വരെ സമരം തുടരാന്‍ ഭൂസംരക്ഷണ സമിതി തയ്യാറാകുന്നില്ല എന്നതാണ് ചോദ്യം.
മുനമ്പംകാരുടേത് പോക്കുവരവ് നടത്തിയ ഭൂമിയല്ല എന്ന പച്ചക്കള്ളം പ്രചരിപ്പിക്കാന്‍ ആര്‍ക്കാണ് ഇത്ര താല്പര്യമെന്നുമാണ് ഇവര്‍ ഉയര്‍ത്തുന്ന ചോദ്യം.
വീണ്ടും സമരത്തിന് ഒരുങ്ങുന്നവരുടെ ചോദങ്ങള്‍ ഇങ്ങനെയാണ്:
*കരമടയ്ക്കാനായിരുന്നോ ഈ സമരകോലാഹലമെല്ലാം?*
1. സമ്പൂര്‍ണ റവന്യൂ അവകാശങ്ങള്‍ പുന:സ്ഥാപിക്കപ്പെടുന്നതു വരെ സമരം തുടരും എന്ന് കഴിഞ്ഞയാഴ്ച വരെ പറഞ്ഞിരുന്ന ഭൂസംരക്ഷണ സമിതി, കരം അടയ്ക്കാന്‍ ഇടക്കാല ഉത്തരവ് വന്നതോടെ സമരം നിറുത്തുന്നതിലെ യുക്തി എന്താണ്?
2. എന്തുകൊണ്ട് ഡിസംബര്‍ 17ന് ഹൈക്കോടതിയില്‍ നടക്കുന്ന വിശദമായ വാദവും അതിനെത്തുടര്‍ന്നുള്ള വിധിയും വരെ സമരം തുടരാന്‍ ഭൂസംരക്ഷണ സമിതി തയ്യാറാകുന്നില്ല?
3. കരം അടയ്ക്കലാണ് 'സമ്പൂര്‍ണ റവന്യൂ അവകാശം' എന്നാണോ സമിതിയുടെ വിചാരം?
4. കൊച്ചി തഹസില്‍ദാര്‍ ശ്രീ. വി.വി. ജയേഷ് 28.10.2025ല്‍ സമര്‍പ്പിച്ചിട്ടുള്ള സത്യവാങ്മൂലത്തില്‍, റവന്യൂ വകുപ്പ് കരം സ്വീകരിക്കുന്നതും റവന്യൂ സര്‍ട്ടിഫിക്കറ്റുകള്‍ നല്കുന്നതും നീതിയുക്തമായിരിക്കും എന്ന് കൃത്യമായി എഴുതിയിട്ടുണ്ടെങ്കിലും, 36063/2022 എന്ന കേസ്സില്‍ 29.10.2025ന് സര്‍ക്കാര്‍ ഫയല്‍ ചെയ്ത അപേക്ഷയില്‍ നികുതിയടക്കാനുള്ള അവകാശം മാത്രം നല്‍കാമെന്ന നിലപാടാണ് സര്‍ക്കാര്‍ സ്വീകരിച്ചത്! ഇതു ചോദ്യം ചെയ്യാന്‍ ഭൂസംരക്ഷണ സമിതി തയ്യാറാകാത്തത് എന്തുകൊണ്ട്?
5. കരം അടയ്ക്കാം എന്ന ഇടക്കാല ഉത്തരവിന്റെ അടിസ്ഥാനത്തില്‍ പോക്കുവരവ് നടത്താന്‍ കഴിയുന്നത് എങ്ങനെ?
6. പോക്കുവരവ് നടത്തുന്നതെല്ലാം ഓണ്‍ലൈനായിക്കഴിഞ്ഞ ഇക്കാലത്ത് അക്കാര്യത്തിനായി ഡെസ്‌ക് ഇടേണ്ട കാര്യമെന്ത്?
7. മുനമ്പംകാരുടേത് പോക്കുവരവ് നടത്തിയ ഭൂമിയല്ല എന്ന പച്ചക്കള്ളം പ്രചരിപ്പിക്കാന്‍ ആര്‍ക്കാണ് ഇത്ര താല്പര്യം?
8. അതോ, നിയമാനുസൃതമല്ലാത്തതും പോക്കുവരവ് നടത്തിയിട്ടില്ലാത്തതുമായ ഭൂമി വെളുപ്പിച്ചെടുക്കാന്‍ ഭൂസംരക്ഷണ സമിതിയില്‍ ആരെങ്കിലും ശ്രമിക്കുകയാണോ?
9. ഒപ്പം, ആരെങ്കിലും മറ്റെന്തെങ്കിലും ഡീല്‍ ഉറപ്പിച്ചോ?
ഇത്ര എളുപ്പത്തില്‍ ഹൈജാക്കു ചെയ്യപ്പെടാവുന്ന ഒരു സമരമായിരുന്നോ മുനമ്പംകാരുടേത്!
മുനമ്പത്ത് താമസിക്കുന്നവരുടെ ഭൂനികുതി സ്വീകരിക്കാന്‍ സംസ്ഥാന സര്‍ക്കാരിന് ഹൈക്കോടതി അനുമതി നല്‍കിയിരുന്നു. തത്കാലത്തേക്ക് കരം അടയ്ക്കാന്‍ അനുമതി ലഭിച്ച സാഹചര്യത്തിലാണ് ഭൂ സംരക്ഷണസമിതി കോര്‍ ഗ്രൂപ്പ് യോഗം ചേര്‍ന്ന് സമരം അവസാനിപ്പിക്കാന്‍ തീരുമാനിച്ചത്. സ്ഥലം പോക്കുവരവ് ചെയ്യുന്നതിന് തടസ്സമുണ്ടാകില്ലെന്നും ഇതിനായി കുഴുപ്പിള്ളി വില്ലേജില്‍ ഹെല്‍പ്പ് ഡെസ്‌ക് തുറക്കുമെന്നും മന്ത്രി പി. രാജീവില്‍ നിന്ന് ഉറപ്പ് ലഭിച്ചിട്ടുണ്ടെന്ന് ഭൂ സംരക്ഷണസമിതി ഭാരവാഹികള്‍ അവകാശപ്പെടുന്നു. നിയമമന്ത്രി പി. രാജീവ്, വൈപ്പിന്‍ എംഎല്‍എ കെ.എന്‍. ഉണ്ണികൃഷ്ണന്‍ തുടങ്ങിയവര്‍ ഞായറാഴ്ച 2.30-ന് സമരപ്പന്തലില്‍ എത്തുകയും സമര സേനാനികള്‍ക്ക് നാരങ്ങാനീര് നല്‍കി സമരം അവസാനിപ്പിക്കുകയും ചെയ്യും.
