ആഗോള താപനത്തേക്കാള്‍ ലോകത്തിന് ഭീഷണി ജനസംഖ്യ കുറവെന്ന് വിശ്വാസം; കിട്ടുന്ന സ്ത്രീകളില്‍ എല്ലാം കുഞ്ഞുങ്ങളെ ജനിപ്പിച്ച് എലന്‍ മസ്‌ക്ക്; പതിമൂന്നാമത്തെ കുട്ടിയുടെ അമ്മയാണ് താനെന്ന് പറഞ്ഞ് രംഗത്ത് വന്നത് 26-കാരിയായ ഫ്ളോറിഡക്കാരി
ആഗോള താപനത്തേക്കാള്‍ ലോകത്തിന് ഭീഷണി ജനസംഖ്യ കുറവെന്ന് വിശ്വാസം
ന്യൂയോര്‍ക്ക്: ആഗോള കോടീശ്വരനായ ഇലോണ്‍ മസ്‌ക്കിന് പതിമൂന്നാമത്തെ കുഞ്ഞ് ജനിച്ചതായി വാര്‍ത്ത. പതിമൂന്നാമത്തെ കുട്ടിയുടെ അമ്മയാണ് താനെന്ന് പറഞ്ഞ് രംഗത്ത് വന്നത് 26-കാരിയായ ഫ്ളോറിഡക്കാരിയാണ്. എഴുത്തുകാരിയും ഇന്‍ഫ്ളുവന്‍സറുമായ ആഷ്ലി സെന്റ് ക്ലെയറാണ് താന്‍ മസ്‌ക്കിന്റെ പതിമൂന്നാമത്തെ കുഞ്ഞിന്റെ അമ്മയായിരിക്കുകയാണ് എന്ന വെളിപ്പെടുത്തല്‍ നടത്തിയിരിക്കുന്നത്. അഞ്ച് മാസം മുമ്പ് മസ്‌കിന്റെ കുഞ്ഞിന് ജന്മം നല്‍കിയെന്നാണ് ആഷ്ലി പറയുന്നത്.
മസ്‌ക്കിന്റെ തന്നെ സമൂഹമാധ്യമമായ എക്സിലൂടെയാണ് അവര്‍ ഇക്കാര്യം പുറത്തുവിട്ടത്. അഞ്ച് മാസം മുമ്പ് പുതിയൊരു കുഞ്ഞിനെ ഈ ലോകത്തിലേക്ക് സ്വാഗതം ചെയ്തു. ഇലോണ്‍ മസ്‌ക് ആണ് പിതാവ്. ഞങ്ങളുടെ കുഞ്ഞിന്റെ സ്വകാര്യതയും സുരക്ഷയും കണക്കിലെടുത്താണ് ഇക്കാര്യം വെളിപ്പെടുത്താതിരുന്നത്. എന്നാല്‍, ഇത് പരിഗണിക്കാതെ മാധ്യമങ്ങള്‍ ഇക്കാര്യം പുറത്തുവിടാന്‍ ഉദ്ദേശിക്കുന്നുവെന്ന് മനസ്സിലായി എന്നും കുഞ്ഞിനെ സാധാരണവും സുരക്ഷിതവുമായ അന്തരീക്ഷത്തില്‍ വളരാന്‍ അനുവദിക്കാനാണ് താന്‍ ഉദ്ദേശിക്കുന്നതെന്നും മാധ്യമങ്ങള്‍ കുഞ്ഞിന്റെ സ്വകാര്യതയെ മാനിക്കണമെന്നും ആഷ്ലി ആവശ്യപ്പെടുന്നു.
2002 മുതല്‍ മസ്‌കിന് 12 കുട്ടികള്‍ ജനിച്ചിട്ടുണ്ട്. മുന്‍ ഭാര്യ ജസ്റ്റിനില്‍ മസ്‌കിന് ജനിച്ച ആദ്യത്തെ കുഞ്ഞ് ശൈശവകാലത്ത് തന്നെ മരണപ്പെട്ടിരുന്നു. 2008 ആയപ്പോഴേക്കും ജസ്റ്റിന് ഐവിഎഫിലൂടെ അഞ്ച് കുട്ടികള്‍ ജനിച്ചിരുന്നു. പിന്നീടാണ് ബ്രീട്ടീഷ് നടി തലൂലാ റിലേയുമായി മസ്‌ക് ബന്ധത്തിലാവുന്നത്. ഇവരെ രണ്ട് തവണ വിവാഹം ചെയ്യുകയും രണ്ട് തവണയും വേര്‍പിരിയുകയും ചെയ്തു. എന്നാല്‍ ഈ ബന്ധത്തില്‍ മസ്‌കിന് കുട്ടികളില്ല.
2020 നും 2022 നും ഇടയില്‍ ഗായിക ഗ്രിംസില്‍ മൂന്ന് കുട്ടികളാണ് മസ്‌കിന് ജനിച്ചത്. ഈ കുട്ടികളുടെ സംരക്ഷണാവകാശവുമായി ബന്ധപ്പെട്ട് ഇരുവരും നിയമപോരാട്ടത്തിലാണ്. 2021 ല്‍ സ്വന്തം കമ്പനിയായ ന്യൂറാലിങ്കിലെ ഉദ്യോഗസ്ഥയായ ഷിവോന്‍ സില്ലിസില്‍ ഇരട്ടകുട്ടികളും മസ്‌കിന് ജനിച്ചു. 2024 ലാണ് ഇരുവര്‍ക്കും മൂന്നാമതൊരു കുഞ്ഞുകൂടി ജനിച്ചത്.
ആഗോള താപനത്തേക്കാള്‍ ലോകത്തിന് ഭീഷണി ജനസംഖ്യയില്‍ വന്ന കുറവാണ് എന്നാണ് മസ്‌ക്ക് വിശ്വസിക്കുന്നത്. അത് കൊണ്ട് തന്നെയാണോ കിട്ടുന്ന സ്ത്രീകളില്‍ എല്ലാം മസ്‌ക് കുഞ്ഞുങ്ങളെ ജനിപ്പിക്കുന്നതെന്നാണ് സമൂഹമാധ്യമങ്ങളില്‍ പലരും കളിയാക്കി ചോദിക്കുന്നത്. 53 വയസുകാരനായ മസ്‌ക്കിന് ഇനിയും വര്‍ഷങ്ങളോളം കുട്ടികളെ ജനിപ്പിക്കാം എന്നും അവര്‍ കുറ്റപ്പെടുത്തുന്നു. എക്സില്‍ 10 ലക്ഷത്തോളം ഫോളോവഴ്സ് ഉള്ള വ്യക്തി കൂടിയാണ് ആഷ്ലി.
കഴിഞ്ഞ ദിവസം വൈറ്റ്ഹൗസില്‍ പ്രസിഡന്റ് ട്രംപിനൊപ്പം മസ്‌ക്ക് നടത്തിയ വാര്‍ത്താസമ്മേളനത്തില്‍ അദ്ദേഹത്തിന്റെ നാല് വയസുകാരനായ മകനും പങ്കെടുത്തത് ഏറെ കൗതുകം സൃഷ്ടിച്ചിരുന്നു. അടുത്ത ദിവസം പ്രധാനമന്ത്രി നരേന്ദ്രമോദി വൈറ്റ്ഹൗസില്‍ എത്തിയ ചടങ്ങിലും മസ്‌ക്ക് മൂന്ന് വയസുകാരായ തന്റെ ഇരട്ടക്കുട്ടികള്‍ക്കൊപ്പമാണ ്എത്തിയത്. ആഷ്ലിക്ക് നേരത്തേയും ഒരു ജനിച്ചിട്ടുണ്ട്. രണ്ട് കുട്ടികളേയും നോക്കാനായി ഒരു ആയയേയും ഇപ്പോള്‍ അവര്‍ നിയോഗിച്ചിരിക്കുകയാണ്.
