മദ്യ ലഹരിയില്‍ ഒന്നുതല ഉയര്‍ത്താന്‍ പോലും വയ്യ; കാല്‍ നിലത്തുറയ്ക്കുന്നില്ല; മാഹിയില്‍ നിന്നും വിലക്കുറവില്‍ കിട്ടിയ മദ്യം ആക്രാന്തത്തോടെ മോന്തി; ഒടുവില്‍ ഡ്രൈവര്‍ ജോസിന് ബോധം പോയതോടെ ഡ്രൈവിങ് ഏറ്റെടുത്ത് ക്ലീനര്‍ അലക്സ്; നാട്ടിക ദുരന്തത്തില്‍ ഇരുവരെയും യുവാക്കള്‍ പിടികൂടുന്ന ദൃശ്യങ്ങള്‍ പുറത്ത്
നാട്ടിക ദുരന്തം: പ്രതികളെ യുവാക്കള്‍ പിടികൂടുന്ന ദൃശ്യങ്ങള്‍ പുറത്ത്
തൃശൂര്‍: മദ്യലഹരിയില്‍ വാഹനം ഓടിക്കുന്നത് ശിക്ഷാര്‍ഹമെങ്കിലും നിയമം കാറ്റില്‍ പറത്തുന്നത് കൊണ്ടുണ്ടാകുന്നത് വലിയ ദുരന്തങ്ങള്‍. നാട്ടികയില്‍ തടിലോറി നാടോടി സംഘത്തിനിടയിലേക്ക് ഇടിച്ചുകയറിയുണ്ടായ അപകടത്തിന് പിന്നിലും മദ്യലഹരിയിലെ ഡ്രൈവിങ് തന്നെ. അതിനിടെ, ലോറി ഡ്രൈവറെയും ക്ലീനറെയും യുവാക്കള്‍ പിടികൂടുന്ന സിസിടിവി ദൃശ്യങ്ങള്‍ പുറത്ത് വന്നു. അഞ്ച് പേരുടെ ജീവനാണ് നാട്ടികയില്‍ പൊലിഞ്ഞത്.
അമിതമായ രീതിയില്‍ മദ്യപിച്ച നിലയിലായിരുന്നു ഡ്രൈവറായ കണ്ണൂര്‍ സ്വദേശി ജോസും ക്ലീനര്‍ അലക്‌സും. കൃത്യമായി കാര്യങ്ങള്‍ ചോദിച്ചറിയാന്‍ പോലും കഴിയാത്ത അവസ്ഥയിലായിരുന്നു ഇരുവരും. മാഹിയില്‍ നിന്നാണ് ഇരുവരും മദ്യം വാങ്ങി കഴിച്ചത്. തുടര്‍ന്നുളള യാത്രയിലെല്ലാം മദ്യപാനം തുടര്‍ന്നു. ഇതോടെ ഡ്രൈവര്‍ ജോസ് വാഹനം ഓടിക്കാന്‍ സാധിക്കാത്ത വിധത്തില്‍ മദ്യലഹരിയിലായി. ഇതോടെയാണ് ക്ലീനര്‍ അലക്സ് ലോറി ഓടിക്കാന്‍ തുടങ്ങിയത്. ഹെവി വെഹിക്കിള്‍ ലൈസന്‍സ് പോലും ഇല്ലാത്ത അലക്സ് മദ്യ ലഹരിയില്‍ അമിത വേഗത്തിലായിരുന്നു യാത്ര
അപകടത്തിന് ശേഷം ലോറിയുമായി രക്ഷപ്പെടുകയായിരുന്ന ക്ലീനര്‍ അലക്സിനെയും ഡ്രൈവര്‍ ജോസിനെയും സര്‍വീസ് റോഡില്‍ വച്ച് യുവാക്കള്‍ പിടികൂടുന്നതിന്റെ സിസിടിവി ദൃശ്യങ്ങളാണ് പുറത്തുവന്നത്. ദൃശ്യങ്ങളില്‍നിന്നു തന്നെ ഇരുവരും മദ്യലഹരിയിലായിരുന്നെന്നത് വ്യക്തമാണ്.
സമീപത്തെ ഗ്രൗണ്ടിലുണ്ടായിരുന്ന പ്രദേശവാസികളായ യുവാക്കളാണ് ലോറി തടഞ്ഞ് ഇവരെ പിടികൂടിയത്. ലോറി ഓടിച്ചിരുന്ന അലക്സിനെയും ഒപ്പമുണ്ടായിരുന്ന ഡ്രൈവര്‍ ജോസിനെയും ഇവര്‍ പിടികൂടി താഴെയിറക്കി. എന്നാല്‍ മദ്യപിച്ച് ലക്കു കെട്ടിരുന്ന ഇവര്‍ക്ക് ഒന്ന് എഴുന്നേറ്റ് നടക്കാന്‍ പോലും സാധിക്കുമായിരുന്നില്ല. അപകടം നടന്ന സമയത്ത് ലോറി ഓടിച്ചിരുന്ന അലക്സ് മുഖം പൊത്തി നിലത്തിരിക്കുന്നതും ദൃശ്യങ്ങളില്‍ വ്യക്തമാണ്. മദ്യപിച്ച് സ്വബോധം നഷ്ടപ്പെട്ട ഇവരെ യുവാക്കള്‍ പിടിച്ചു നിര്‍ത്തുന്നതും ഇവരോട് കയര്‍ക്കുന്നതും സിസിടിവി ദൃശ്യങ്ങളില്‍ വ്യക്തമാണ്. ഇവരെ പിന്നീട് വലപ്പാട് പൊലീസിന് കൈമാറി.
തൃപ്രയാറിനടുത്തു നാട്ടികയില്‍ തടിലോറി നാടോടിസംഘത്തിനിടയിലേക്കു പാഞ്ഞുകയറിയുണ്ടായ അപകടത്തില്‍ 2 കുട്ടികള്‍ ഉള്‍പ്പെടെ 5 പേരാണ് മരിച്ചത്. ചൊവ്വാഴ്ച പുലര്‍ച്ചെ നാല് മണിയോടെ നിര്‍മാണം നടക്കുന്ന ദേശീയപാതയിലായിരുന്നു അപകടം. പരുക്കേറ്റവരില്‍ 6 പേരുടെ നില ഗുരുതരമാണ്. പാലക്കാട് മീങ്കര ചെമ്മണംതോട്ടില്‍ കാളിയപ്പന്‍ (55), ഭാര്യ നാഗമ്മ (45), മരുമകള്‍ രാജേശ്വരി (22), പേരക്കുട്ടികളായ ജീവന് (5), വിശ്വ (1) എന്നിവരാണ് മരിച്ചത്. പരുക്കേറ്റവര്‍ തൃശൂര്‍ മെഡിക്കല്‍ കോളജ് ആശുപത്രിയില്‍ ചികിത്സയിലാണ്. പ്രതികളായ അലക്സിനെയും ജോസിനെയും പൊലീസ് അറസ്റ്റ് ചെയ്തിട്ടുണ്ട്. ഇവര്‍ ഓടിച്ചിരുന്ന ലോറിയുടെ റജിസ്ട്രേഷന്‍ എംവിഡി റദ്ദാക്കും.
