പരുത്തിപ്പാറയിലെ വാടക വീട്ടിൽ നടന്ന 'കൊല്ലാക്കൊല' അഫ്സാന വിവരിക്കുന്നത് ആക്ഷൻ സഹിതം; മുഖത്തോ ശരീരത്തോ മർദനമേറ്റ പാടുകളില്ല; അഫ്സാനയുടെ മൊഴി പൊളിച്ചടുക്കി വീഡിയോ ദൃശ്യങ്ങൾ പുറത്തു വിട്ട് കൂടൽ പൊലീസ്

പത്തനംതിട്ട: പരുത്തിപ്പാറയിലെ വാടക വീട്ടിലെ കൊല്ലാക്കൊല നൗഷാദ് തിരോധാന കേസിലെ 'പ്രതി' അഫ്സാന വിവരിക്കുന്ന വീഡിയോ ദൃശ്യങ്ങൾ പുറത്തു വിട്ട് കൂടൽ പൊലീസ്. നൗഷാദിന്റെ തിരോധാന കേസിൽ പൊലീസ് നാണം കെടുകയും അഫ്സാനയെ മർദിച്ചുവെന്ന് ആരോപണമുയരുകയും മനുഷ്യാവകാശ കമ്മിഷൻ സ്വമേധയാ കേസെടുക്കുകയും ചെയ്ത സാഹചര്യത്തിലാണ് പൊലീസ് വീഡിയോ പുറത്തു വിട്ടിരിക്കുന്നത്.

പരുത്തിപ്പാറയിലെ വാടക വീട്ടിൽ തെളിവെടുപ്പിന് കൊണ്ടു വന്നപ്പോഴാണ് സംഭവ ദിവസം താനും നൗഷാദുമായി നടന്ന സംഘട്ടനം പ്രത്യേക തരം ഏക്ഷനുകളോടെ അഫ്സാന വിവരിച്ചു കാണിക്കുന്നത്. താനും നൗഷാദുമായി അടിപിടിയുണ്ടായി എന്നും താനെങ്ങനെ അയാളെ കൊന്നുവെന്നും വിവരിക്കുന്നതാണ് വീഡിയോയിൽ ഉള്ളത്. ഈ ദൃശ്യങ്ങളിലൊന്നും അഫ്സാനയ്ക്ക് അവശതകളോ പൊലീസ് മർദനമേറ്റതിന്റെ ലക്ഷണങ്ങളോ ഇല്ല. ജൂലൈ 27 നാണ് അഫ്സാനയുമായി കൂടൽ പൊലീസ് പരുത്തിപ്പാറയിലെ വാടക വീട്ടിൽ തെളിവെടുപ്പിനെത്തിയത്. അവർ ചൂണ്ടിക്കാണിച്ച പള്ളി സെമിത്തേരി ഒഴികെ ബാക്കിയെല്ലാ സ്ഥലവും പൊലീസ് കുഴിച്ചു നോക്കുകയും ചെയ്തു. തുടർന്ന് കോടതിയിൽ ഹാജരാക്കിയ അഫ്സാനയെ റിമാൻഡ് ചെയ്തു. പിറ്റേന്ന് തന്നെ കൊല്ലപ്പെട്ട നൗഷാദ് തിരികെ വന്നു. ഇതോടെ പൊലീസിനെതിരേ ആരോപണവും രൂക്ഷമായി.

ജാമ്യം കിട്ടി ഞായറാഴ്ച പുറത്തിറങ്ങിയ യുവതി പൊലീസിനെതിരേ വ്യക്തമായ ആരോപണം ഉന്നയിച്ചു. ആരോ പറഞ്ഞു പഠിപ്പിച്ചതു പോലെയാണ് വ്യക്തമായും അടുക്കും ചിട്ടയോടെയും പൊലീസ് മർദനത്തിന്റെ കഥ പറഞ്ഞത്. പൊലീസ് കുറ്റമേൽക്കാൻ തന്നെ ക്രൂരമായി മർദിച്ചുവെന്നും മുഖത്തും ശരീരത്തും മർദനമേറ്റ പാടുകൾ ഉണ്ടായിരുന്നുവെന്നും അഫ്സാന പറഞ്ഞു. എന്നാൽ, പൊലീസ് ഇപ്പോൾ പുറത്തു വിട്ടിരിക്കുന്ന വീഡിയോയിൽ അഫ്സാനയ്ക്ക് യാതൊരു കുഴപ്പവുമില്ല. അവർ ചൂണ്ടിക്കാണിച്ച മർദനത്തിന്റെ പാട് മുഖത്തോ ശരീരത്തോ ഇല്ല താനും

ദക്ഷിണ മേഖലാ ഡി.ഐ.ജി ആർ. നിശാന്തിനിയുടെ നിർദ്ദേശപ്രകാരം പത്തനംതിട്ട അഡിഷണൽ എസ്‌പി ആർ. പ്രദീപ് കുമാർ വകുപ്പു തല അന്വേഷണം ആരംഭിച്ചു. ഇതിന്റെ ഭാഗമായി അദ്ദേഹം കൂടൽ പൊലീസ് സ്റ്റേഷനിലെ സിസിടിവി ദൃശ്യങ്ങളും ചോദ്യം ചെയ്യലിന്റെ ദൃശ്യങ്ങളും പരിശോധിച്ചു. അപ്പോഴാണ് പൊലീസ് അഫ്സാനയുടെ തെളിവെടുപ്പ് ദൃശ്യങ്ങൾ പുറത്തു വിട്ടിരിക്കുന്നത്. വീഡിയോ തങ്ങൾക്ക് അനുകൂലമാകുമെന്ന് കരുതിയാണ് പൊലീസ് അത് പുറത്തു വിട്ടിരിക്കുന്നത്. പക്ഷേ, അഫ്സാന കോടതിയെ സമീപിച്ചാൽ ഈ വീഡിയോ പൊലീസിന് സഹായകരമാകില്ലെന്നാണ് സൂചന.