ലണ്ടന്‍: നോര്‍ത്ത് യോര്‍ക്ക്ഷയറിലെ സെല്‍ബിക്ക് അടുത്തുള്ള തോണ്‍ബിയിലെ ഒരു പാറ്റത്ത് ചെറു വിമാനം തകര്‍ന്ന് വീണ് ഇരുപത് വയസ്സുള്ള രണ്ട് യുവാക്കള്‍ മരണമടഞ്ഞു. ഞായറാഴ്ച രാവിലെ 10 മണിയോടെ ആയിരുന്നു സംഭവം നടന്നത്. വിമാനത്തിന്റെ പൈലറ്റും, അതിലെ യാത്രക്കാരനുമാണ് മരണമടഞ്ഞത് എന്ന് കരുതുന്നു. വിമാനാപകടങ്ങളെ കുറിച്ച് അന്വേഷിക്കുന്ന പ്രത്യേക സംഘവും സംഭവസ്ഥലത്ത് എത്തിയിട്ടുണ്ട്.

ഒരു ടു സീറ്റര്‍ ലൈറ്റ് എയര്‍ ക്രാഫ്റ്റാണ് അപകടത്തില്‍ പെട്ടെതെന്ന് പോലീസ് അറിയിച്ചു. പ്രായം ഇരുപതുകളില്‍ ഉള്ള രണ്ട് യുവാക്കളാണ് മരണമടഞ്ഞതെന്നും അതില്‍ ഒരാള്‍ വിമാനത്തിന്റെ പൈലറ്റും മറ്റെയാള്‍ യാത്രക്കാരനുമാണെന്നും അവര്‍ അവര്‍ പറഞ്ഞു. അനൗദ്യോഗികമായി അവരെ തിരിച്ചറിഞ്ഞിട്ടുണ്ടെന്നും അടുത്ത ബന്ധുക്കളെ വിവരം അറിയിച്ചിട്ടുണ്ടെന്നും പോലീസ് പറഞ്ഞു.

വിമാനാപകടങ്ങളെ കുറിച്ച് അന്വേഷിക്കുന്ന പ്രത്യേക സംഘവുമായി ചേര്‍ന്ന് അന്വേഷണം പുരോഗമിക്കൂകയാണെന്നും പോലീസ് അറിയിച്ചു. അതുകൊണ്ടു തന്നെ പ്രദേശത്തെ ചില റോഡുകളില്‍ ഗതാഗതം നിരോധിച്ചിട്ടുണ്ട്.