കോട്ടയം: മണിമലയിൽ വീടിനു തീ പിടിച്ച് വീട്ടമ്മ അതിദാരുണമായി മരിച്ചു. പാറവിളയിൽ സെൽവരാജന്റെ ഭാര്യ രാജം (70) ആണ് മരിച്ചത്. പൊള്ളലേറ്റതും വിഷപ്പുക ശ്വസിച്ചതുമാണ് രാജത്തിന്റെ മരണത്തിന് ഇടയാക്കിയത്. രക്ഷപ്പെടാൻ മുകൾനിലയിൽനിന്ന് ചാടിയ മകൻ വീനീഷിനെയും (30) താഴത്തെ നിലയിലുണ്ടായിരുന്ന സെൽവരാജനെയും (76) പരുക്കുകളോടെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

ഇന്നലെ രാത്രി 12.30ഓടെയാണ് വീടിന് തീപിടിച്ചത്. എങ്ങനെയാണ് തീ പിടിച്ചതെന്ന് വ്യക്തമല്ല. തീ പടർന്ന് വീടിന്റെ എല്ലാ ഭാഗത്തേയ്ക്കും വ്യാപിച്ചു. വീട്ടുകാർ നല്ല ഉറക്കമായിരുന്നതിനാൽ തീ പിടിച്ച വിവരം അറിഞ്ഞിരുന്നില്ല. മുകൾനിലയിലുണ്ടായിരുന്ന വിനീഷിന്റെ ഭാര്യയും രണ്ട് മക്കളും പരിക്കുകളൊന്നും കൂടാതെ രക്ഷപ്പെട്ടു. ഹോളി മാഗി ഫൊറോന പള്ളിക്കു പിന്നിലാണ് അപകടം നടന്ന വീട്.

അപകട വിവരം അറിഞ്ഞ് കാഞ്ഞിരപ്പള്ളി അഗ്‌നിരക്ഷാ സേന എത്തിയെങ്കിലും വാഹനം വീടിനു സമീപത്തേക്ക് എത്താതിരുന്നതിനാൽ ഒരു കിലോമീറ്റർ നടന്നാണ് ഉദ്യോഗസ്ഥർ വീട്ടിൽ എത്തിയത്. ഈ സമയം നാട്ടുകാർ കിണറ്റിൽനിന്നു വെള്ളം കോരി രക്ഷാപ്രവർത്തനം നടത്തി. കിണറിന്റെ മോട്ടർ ഉൾപ്പെടെ കത്തിപ്പോയതും രക്ഷാപ്രവർത്തനം വൈകിപ്പിച്ചു. ഈ സമയം കൊണ്ട് വീടിന്റെ നാലു പാടും തീ പടർന്നു പിടിച്ചു. താഴത്തെ നില പൂർണമായും നശിച്ചു. വീടു മുഴുവൻ കനത്ത പുകയായിരുന്നു.

ഇരുമ്പു ജനാലകളായതിനാൽ വീടിനുള്ളിലേക്കു കടക്കാനുള്ള ശ്രമം ആദ്യം പരാജയപ്പെട്ടു. ഇതിനിടെയാണ് വിനീഷ് ഭാര്യയെയും കുഞ്ഞുങ്ങളെയും രക്ഷപ്പെടുത്തിയശേഷം മുകൾനിലയിൽനിന്ന് താഴേക്കു ചാടിയത്. താഴത്തെ നിലയിൽ ഉണ്ടായിരുന്ന സെൽവരാജനെയും രാജത്തെയും നാട്ടുകാരും അഗ്‌നിരക്ഷാസേനയും ചേർന്നു പുറത്തെത്തിച്ചു. വിഷപ്പുക ശ്വസിച്ചതു രാജത്തിന്റെ നില ഗുരുതരമാക്കിയിരുന്നു. ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മണിമല പൊലീസ് സ്ഥലത്ത് എത്തിയിരുന്നു. വാഹനമെത്താൻ വഴിയില്ലാത്തതിനാൽ അപകടത്തിന്റെ വ്യാപ്തി വർധിച്ചുവെന്ന് അഗ്‌നിരക്ഷാ ഉദ്യോഗസ്ഥർ പറഞ്ഞു.

മറുനാടന്‍ മലയാളി

    മറുനാടന്‍ മലയാളി ബ്യൂറോ