കെ റെയിൽ സമരക്കാർ മഞ്ഞക്കുറ്റി പിഴുത് നട്ട വാഴ കുലച്ചു: പൂവൻ വാഴക്കുല നാളെ ലേലം ചെയ്യും: കിട്ടുന്ന തുക സജി ചെറിയാന്റെ മണ്ഡലത്തിൽ അടുപ്പ് കല്ലിളക്കി മഞ്ഞക്കുറ്റിയിട്ട തങ്കമ്മയുടെ വീട് നിർമ്മാണത്തിന് നൽകും

കുന്നന്താനം: കെ റെയിൽ വിരുദ്ധ സമരത്തിന്റെ ഭാഗമായി കുന്നന്താനത്ത് നട്ട സമര വാഴയുടെ വിളവെടുപ്പ് നാളെ വൈകിട്ട് നാലിന് മുൻ എംഎൽഎ ജോസഫ് എം പുതുശേരി നിർവഹിക്കും.

കഴിഞ്ഞ വർഷം പരിസ്ഥിതി ദിനത്തിൽ സമരസമിതിയുടെ ആഹ്വാനപ്രകാരമാണ് വാഴ നട്ടത്. സമരസമിതി ജില്ലാ ചെയർമാൻ അരുൺ ബാബു, കൺവീനർ മുരുകേഷ് നടക്കൽ എന്നിവരുടെ നേതൃത്വത്തിൽ വാഴക്കുല നാളെ വെട്ടി ലേലം ചെയ്യും. ചെങ്ങന്നൂരിൽ സജി ചെറിയാന്റെ വീടിന് സമീപം അടുപ്പ് കല്ലിളക്കി കെ റെയിലിന്റെ മഞ്ഞക്കുറ്റി സ്ഥാപിച്ച തങ്കമ്മയുടെ ഭവന നിർമ്മാണ ഫണ്ടിലേക്ക് ലേലത്തുക സംസ്ഥാന ജനറൽ കൺവീനർ എസ് രാജീവൻ കൈമാറും.

കെ റെയിൽ വേണ്ട കേരളം വേണം എന്ന മുദ്രാവാക്യമുയർത്തി സംസ്ഥാന കെ റെയിൽ സിൽവർ ലൈൻ വിരുദ്ധ ജനകീയ സമിതിയുടെ നേതൃത്വത്തിൽ നടത്തിവരുന്ന സമരത്തിന്റെ ഭാഗമായി കഴിഞ്ഞ വർഷം മെയ് 31 മുതൽ ജൂൺ ആറു വരെ പരിസ്ഥിതി സംരക്ഷണ വാരാചരണം നടത്തിയിരുന്നു. ജൂൺ അഞ്ചിന് പദ്ധതി അനുകൂലികളായ എംഎൽഎ മാരോടുള്ള പ്രതിഷേധ സൂചകമായി 11 ജില്ലകളിലും സമര വാഴ നടൽ നടത്തി.

കുന്നന്താനം നടയ്ക്കൽ ജങ്ഷനിൽ നട്ട പൂവൻ വാഴക്കുലയാണ് ഇപ്പോൾ വിളവെടുക്കുന്നത്. ലേലത്തിൽ പൊതുജനങ്ങൾക്കും പങ്കെടുക്കാം. വാഴക്കുല വിറ്റ് കിട്ടുന്ന തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് സമർപ്പിക്കും എന്നാണ് പ്രഖ്യാപിച്ചിരുന്നത്.

സാധാരണ ജനങ്ങളെയോ അവരുടെ ആവശ്യകതകളെയോ പരിഗണിക്കാതെ ധൂർത്തും അഴിമതിയും മാത്രമാണ് സംസ്ഥാന സർക്കാർ നടത്തുന്നത് എന്നതിനാലാണ് ആ തീരുമാനത്തിൽ നിന്ന് പിന്മാറുന്നത് എന്നും ഒറ്റമുറി കൂരയിൽ നിന്നും സർക്കാർ തെരുവിലിറക്കാൻ ശ്രമിച്ച തങ്കമ്മയുടെ ഭവന നിർമ്മാണ ഫണ്ടിലേക്ക് വാഴക്കുല ലേലം ചെയ്തു കിട്ടുന്ന തുക നൽകുമെന്നും ജില്ലാ കൺവീനർ മുരുകേഷ് നടക്കൽ പറഞ്ഞു.