കൽപന ചൗളയെ കുറിച്ചു വായിച്ചത് പ്രചോദനമായി; ജീവിത ചുറ്റുപാട് മോശമായിട്ടും ആകാശ സ്വപ്നം കാണാൻ പ്രേരിപ്പിച്ചത് വിങ്സ് പദ്ധതി; നവകേരള സദസിൽ നന്ദിപറഞ്ഞ് പൈലറ്റ് സങ്കീർത്തന
കണ്ണൂർ: പിന്നോക്ക വിഭാഗത്തിൽ നിന്നുയർന്നു വന്ന ആദ്യത്തെ പൈലറ്റായ സങ്കീർത്തനഹൃദയം നിറയെ നന്ദിയുമായി നവകേരളാസദസിലെത്തി. ജീവിത പ്രതിസന്ധികൾക്കിടയിലും കുട്ടിക്കാലം മുതലുള്ള അടങ്ങാത്ത ആഗ്രഹവും സർക്കാരിന്റെ ഇച്ഛാശക്തിയും ചേർന്നപ്പോൾ തളിപ്പറമ്പ് കാഞ്ഞിരങ്ങാട് ശിവകീർത്തനയിൽ സങ്കീർത്തന ദിനേശ് സ്വപ്ന ചിറകിലേറി ലക്ഷ്യസ്ഥാനത്തെത്തി.
ജീവിതത്തിലെ ഓരോ തടസ്സങ്ങളും മറികടന്നാണ് സർക്കാരിന്റെ പിന്തുണയോടെ പട്ടിക ജാതി വിഭാഗത്തിൽ നിന്നു സങ്കീർത്തന ദിനേശ് കൊമേഴ്സ്യൽ പൈലറ്റ് നേടിയത്. മുഖ്യമന്ത്രിയും മന്ത്രിമാരും പങ്കെടുത്ത കണ്ണൂരിലെ നവകേരള സദസ്സിൽ പ്രഭാത യോഗത്തിൽ ക്ഷണിക്കപ്പെട്ട അതിഥിയായി സങ്കീർത്തന അഭിമാനപൂർവ്വം പങ്കെടുത്തു.
എട്ടാംതരത്തിൽ പഠിക്കുമ്പോൾ കൽപന ചൗളയെ കുറിച്ചുള്ള പുസ്തകം വായിക്കുന്നതിനിടെയാണ് സങ്കീർത്തനക്ക് ആകാശയാത്രയോട് പ്രണയം തോന്നിയത്. പ്ലസ് ടു പഠന സമയത്താണ് പിതാവ് എം കെ ദിനേശന് സ്ട്രോക്ക് വന്ന് കിടപ്പിലാകുന്നത്. ഇതോടെ ഏവിയേഷൻ പഠിക്കണമെന്ന ആഗ്രഹം കുടുംബത്തോട് പറയാൻ ധൈര്യമുണ്ടായിരുന്നില്ല. ജീവിത ചുറ്റുപാട് മോശമായതോടെ പ്ലസ് ടുവാണ് ഏവിയേഷൻ കോഴ്സിന്റെ യോഗ്യതയെന്നറിഞ്ഞിട്ടും സങ്കീർത്തന ബിരുദ പഠനമായ ബി എസ്സി ഫിസിക്സ് കോഴ്സിന് ചേർന്നു.
കണ്ണൂർ സർവകലാശാല എടാട്ട് ക്യാമ്പസിൽ എം എസ് സി ഫിസിക്സ് കോഴ്സ് ചെയ്യുന്നതിനിടെ നാലു വർഷമായി കിടിപ്പിലായിരുന്ന പിതാവ് മരിച്ചു. ഒരു വർഷം കഴിഞ്ഞതോടെ ഫിസിക്കൽ എജ്യുക്കേഷൻ അദ്ധ്യാപികയായിരുന്ന അമ്മ കെ ജി രാജമ്മ ജോലിയിൽ നിന്നു വിരമിച്ചു.
കോളജ് കാന്റീനിൽ ചായക്കുടിക്കുന്നതിനിടെയാണ് യാദൃച്ഛികമായി തിരുവനന്തപുരത്തെ രാജീവ് ഗാന്ധി അക്കാദമി ഫോർ ഏവിയേഷൻ അക്കാദമിയിൽ അപേക്ഷ ക്ഷണിച്ച വാർത്ത കണ്ടത്. ഉടൻ അപേക്ഷ അയക്കുകയും 12 പേരിൽ മൂന്നാംറാങ്കോടെ പ്രവേശനം ലഭിക്കുകയും ചെയ്തു.
എന്നാൽ പഠനത്തിനായി 32 ലക്ഷം രൂപയായിരുന്നു വേണ്ടിയിരുന്നത്. ഇതേ 12 പേരിൽ സങ്കീർത്തനെ കൂടാതെ മറ്റു നാലു പട്ടികജാതി വിദ്യാർത്ഥികൾ കൂടിയുണ്ടായിരുന്നു. അങ്ങനെയാണ് സർക്കാരിന്റെ പഠനസഹായം ലഭിക്കാൻ സ്‌കോളർഷിപ്പ് ലഭിക്കുമോ എന്ന് അറിയാൻ പട്ടിക വികസന ഓഫീസർ ഒ പി രാധാകൃഷ്ണൻ മുഖാന്തരം മന്ത്രി കെ രാധാകൃഷ്ണനെ കാണാൻ പോകുന്നത്. മന്ത്രി തുടർന്ന് സാമ്പത്തികമായി പിന്നോക്കം നിൽക്കുന്ന എസ് സി, എസ് ടി, ഒ ഇ സി വിദ്യാർത്ഥികൾക്ക് ഏവിയേഷൻ പഠനത്തിനായി സ്‌കോളർഷിപ്പ് ലഭ്യമാക്കാൻ 'വിങ്സ്' പദ്ധതി ആരംഭിക്കുകയായിരുന്നു.
ഇതോടെ അക്കാദമിയിൽ പഠനത്തിന് യോഗ്യത നേടുന്നവരുടെ കോഴ്സ് ഫീസ് പട്ടികജാതി-പട്ടിക വർഗ-പിന്നോക്ക വിഭാഗ വികസന വകുപ്പ് സ്‌കോളർഷിപ്പായി നൽകി. ഇതോടെയാണ് സങ്കീർത്തനയുടെ സ്വപ്നത്തിന് ചിറകു വരച്ചത്. സിംഗിൾ എൻജിൻ പൂർത്തിയാക്കി ലൈസൻസ് നേടിയ സങ്കീർത്തനക്ക് നിലവിൽ 26.5 ലക്ഷം രൂപ സർക്കാർ സ്‌കോളർഷിപ്പായി അനുവദിച്ചു. നിലവിൽ തിരുവനന്തപുരത്ത് മൾട്ടി എൻജിൻ പഠനം നടത്തുന്ന സങ്കീർത്തനക്കുള്ള ബാക്കി ആറുലക്ഷം രൂപ ഒരുമാസത്തിനകം അനുവദിക്കും.
സർക്കാരിനോടുള്ള സന്തോഷവും കടപ്പാടും പറഞ്ഞറിയാക്കാൻ കഴിയാത്തതാണെന്നാണ് സങ്കീർത്തന പറയുന്നു. മുമ്പ് നമുക്ക് വേണ്ടി സംസാരിക്കാൻ ഇടങ്ങളുണ്ടായിരുന്നില്ലെന്നും എന്നാൽ ആ സ്ഥിതി ഇപ്പോൾ മാറിയെന്നും സ്വപ്നങ്ങൾ കാണാൻ ധൈര്യം തന്നത് സർക്കാരാണെന്നും സങ്കീർത്തന പറഞ്ഞു. പട്ടിക വിഭാഗത്തിൽപ്പെട്ടവർ മുന്നോട്ടുവരണമെന്നും നിങ്ങളുടെ സ്വപ്നങ്ങൾ യാഥാർഥ്യമാകാൻ സർക്കാരിന്റെ സഹായം ലഭിക്കുമെന്ന് ഉറപ്പാണെന്നും അവർ പറയുന്നു. ശിവകീർത്തന, ഹരികീർത്തന എന്നിവർ സഹോദരിമാരാണ്.
സങ്കീർത്തനയ്ക്ക് പുറമെ വയനാട്ടിലെ ശരണ്യ, കോഴിക്കോട്ടെ വിഷ്ണു പ്രസാദ്, ആലപ്പുഴയിലെ ആദിത്യൻ, പാലക്കാട്ടെ നവീൻ എന്നിവരും 'വിങ്സ്' പദ്ധതിയുടെ ആദ്യബാച്ചിൽ കമേഴ്‌സ്യൽ പൈലറ്റാവാനുള്ള പഠനം പൂർത്തീകരിക്കുകയാണ്.
