വിവിധ തരം ചട്ടലംഘനങ്ങൾക്ക് വ്യത്യസ്ത നിരക്കിലുള്ള പിഴ ഒടുക്കണം; പല കാരണങ്ങളാൽ ചട്ടലംഘനം ഉണ്ടായിട്ടുള്ള നിരവധി കെട്ടിടങ്ങൾ ക്രമവൽക്കരിക്കാൻ അവസരം; കെട്ടിട മാഫിയയ്ക്ക് കോളടിക്കും; ഖജനാവിലേക്ക് പണവും എത്തും; കെട്ടിടങ്ങൾ ക്രമവൽക്കരിക്കാം: ചട്ടം പ്രാബല്യത്തിൽ
തിരുവനന്തപുരം സംസ്ഥാനത്തെ കെട്ടിട ഉടമകളുടെ പ്രശ്‌നങ്ങൾക്ക് പരിഹാരമെന്ന രീതിയിൽ കൊണ്ടു വന്ന മാറ്റങ്ങൾ കെട്ടിട മാഫിയയ്ക്ക് ഗുണകരമാകുമോ?. അനധികൃത കെട്ടിടങ്ങൾ ക്രമവൽക്കരിക്കാനുള്ള കേരള മുനിസിപ്പാലിറ്റി അനധികൃത കെട്ടിടങ്ങൾ ക്രമവൽക്കരിക്കൽ ചട്ടം 2023, കേരള പഞ്ചായത്ത് അനധികൃത കെട്ടിടങ്ങൾ ക്രമവൽക്കരിക്കൽ ചട്ടം 2023 എന്നിവ നിലവിൽ വന്നു. ഇതോടെ അനധികൃതമായി നിർമ്മിച്ച പല കെട്ടിടങ്ങൾക്കും അംഗീകാരം കിട്ടും. ഇതിലൂടെ ഖജനാവിലേക്കും പണമെത്തുമെന്നാണ് സർക്കാർ വിലയിരുത്തൽ.
2019 നവംബർ ഏഴിനുമുമ്പ് നിർമ്മാണം ആരംഭിച്ചതോ പൂർത്തിയാക്കിയതോ ആയ അനധികൃത കെട്ടിടങ്ങൾ ക്രമപ്പെടുത്താം. വിജ്ഞാപനം ചെയ്ത റോഡുകളിൽനിന്ന് മൂന്നു മീറ്റർ ദൂരപരിധി പാലിക്കാത്ത കെട്ടിടങ്ങളും ക്രമവൽക്കരിക്കാം. നടപടികൾ ലഘൂകരിച്ചു. 100 ചതുരശ്ര മീറ്റർവരെയുള്ള വീടുകളെ അപേക്ഷാ ഫീസിൽനിന്ന് ഒഴിവാക്കി. നേരത്തേ ഇത് 60 ചതുരശ്ര മീറ്റർവരെയായിരുന്നു. വീടുകളുടെയും മറ്റു കെട്ടിടങ്ങളുടെയും അപേക്ഷാ ഫീസും വെട്ടിക്കുറച്ചു.
മുനിസിപ്പാലിറ്റിയുടെയും പഞ്ചായത്തിന്റെയും അപേക്ഷാ ഫീസുകൾ ഏകീകരിച്ചു. അംഗീകൃത നഗര വികസന പദ്ധതികൾക്ക് വിരുദ്ധമായത്, സുരക്ഷാ മാനദണ്ഡങ്ങൾ പാലിക്കാത്തത്, നെൽവയൽ -തണ്ണീർത്തട നിയമം ലംഘിക്കുന്നത് തുടങ്ങിയവ ഒഴികെയുള്ള കെട്ടിടങ്ങളാണ് ക്രമവൽക്കരിക്കുന്നത്. ഇതിന് ആവശ്യമായ രീതിയിൽ 1994ലെ കേരള മുനിസിപ്പാലിറ്റി ആക്ടിലെ 407(1) വകുപ്പ്, കേരള പഞ്ചായത്തിരാജ് ആക്ടിലെ 235 എ ബി(1) വകുപ്പ് എന്നിവ ഭേദഗതി ചെയ്താണ് ചട്ടം നിലവിൽ വന്നത്.
വിവിധ തരം ചട്ടലംഘനങ്ങൾക്ക് വ്യത്യസ്ത നിരക്കിലുള്ള പിഴ ഒടുക്കണം. പല കാരണങ്ങളാൽ ചട്ടലംഘനം ഉണ്ടായിട്ടുള്ള നിരവധി കെട്ടിടങ്ങൾ ക്രമവൽക്കരിക്കാൻ സാധിക്കാത്തതിനാലാണ് സംസ്ഥാന സർക്കാർ ചട്ടം രൂപീകരിച്ചതെന്നും കെട്ടിട ഉടമകളുടെ പ്രശ്‌നങ്ങൾ പരിഹരിക്കുന്നതിനൊപ്പം തദ്ദേശ സ്ഥാപനങ്ങളുടെ വരുമാനത്തിൽ വർധന ഉണ്ടാക്കാനും ഇത് സഹായിക്കുമെന്നും തദ്ദേശമന്ത്രി എം ബി രാജേഷ് അറിയിച്ചു.
അനധികൃത കെട്ടിടങ്ങൾ ക്രമവൽക്കരിക്കാൻ നിശ്ചിത ഫോറത്തിലുള്ള അപേക്ഷയും കെട്ടിടത്തിന്റെ പ്ലാനും മറ്റ് അനുബന്ധ രേഖകളും തദ്ദേശ സ്ഥാപന സെക്രട്ടറിക്ക് നൽകണം. ഫീസും ഒടുക്കണം. ഇവ ജില്ലാതല ക്രമവൽക്കരണ കമ്മിറ്റി പരിശോധിച്ച് തീരുമാനമെടുക്കും. ജില്ലാ ജോയിന്റ് ഡയറക്ടർ ചെയർമാനും ജില്ലാ ടൗൺ പ്ലാനർ കൺവീനറും ബന്ധപ്പെട്ട തദ്ദേശസ്ഥാപനത്തിലെ സെക്രട്ടറിയും എൻജിനിയറും അംഗങ്ങളുമായതാണ് കമ്മിറ്റി. തീരുമാനത്തിൽ ആക്ഷേപമുള്ളവർക്ക് സംസ്ഥാന അപ്പീൽ കമ്മിറ്റിയെ സമീപിക്കാം.
പ്രിൻസിപ്പൽ ഡയറക്ടർ ചെയർമാനും ചീഫ് ടൗൺ പ്ലാനർ കൺവീനറുമായ സംസ്ഥാന കമ്മിറ്റിയിൽ റൂറൽ/ അർബൻ ഡയറക്ടർ, ചീഫ് എൻജിനിയർ എന്നിവർ അംഗങ്ങളാണ്. സംസ്ഥാന അപ്പീൽ കമ്മിറ്റിയുടെ തീരുമാനത്തിൽ ആക്ഷേപമുള്ളവർക്ക് അപ്പലറ്റ് അഥോറിറ്റിയായ പ്രിൻസിപ്പൽ സെക്രട്ടറിക്ക് അപ്പീൽ നൽകാം. അതായത് അപ്പീൽ നടപടി ക്രമങ്ങളിലൂടെ മിക്കവാറും എല്ലാം കെട്ടിടങ്ങളേയും ക്രമപ്പെടുത്താൻ കഴിയുമെന്നതാണ് സൂചന.
