കോഴിക്കോട്: വടകരയിലെ അശ്ലീല വീഡിയോ വിവാദത്തിൽ എൽഡിഎഫ് സ്ഥാനാർത്ഥി കെ കെ ശൈലജയ്‌ക്കെതിരെ സ്ത്രീ വിരുദ്ധ പരാമർശവുമായി ആർ എം പി നേതാവ് കെ എസ് ഹരിഹരൻ. കെ കെ ശൈലജക്കെതിരെയാണ് ആർഎംപി നേതാവ് അധിക്ഷേപ പരാമർശം നടത്തിയത്. വടകരയിൽ യുഡിഎഫും - ആർഎംപിയും സിപിഎം വർഗീയതക്കെതിരെയെന്ന പേരിൽ സംഘടിപ്പിച്ച ക്യാമ്പെയിനിൽ പ്രസംഗിക്കവേയായായിരുന്നു വിവാദ പരാമർശം. പ്രതിപക്ഷ നേതാവ് വി ഡി സതീശനും, ഷാഫി പറമ്പിലുമടക്കമുള്ളവർ പങ്കെടുത്ത പരിപാടിയിൽ വച്ചായിരുന്നു വിവാദ പരാമർശം.

ടീച്ചറുടെ പോൺ വീഡിയോ ആരെങ്കിലും ഉണ്ടാക്കുമോ?, മഞ്ജു വാര്യരുടെ പോൺ വീഡിയോ ഉണ്ടാക്കിയെന്ന് പറഞ്ഞാൽ മനസ്സിലാകുമെന്നായിരുന്നു ഹരിഹരന്റെ പരാമർശം. വീഡിയോ ഉണ്ടാക്കിയതിൽ പി മോഹനന്റെ മകൻ നികിതാസ് ജൂലിയസിന് പങ്കുണ്ടോ എന്നും അദ്ദേഹം ചോദിച്ചു. കോഴിക്കോട്ടെ സിപിഎമ്മിന്റെ സൈബർ ലോകത്തെ നിയന്ത്രിക്കുന്നതും പി വി അൻവറിന്റെ പ്രധാനപ്പെട്ടയാളും നികിതാസല്ലെ എന്നും ഹരിഹരൻ ചോദിച്ചു.

കെ.കെ. ശൈലജയുമായി ബന്ധപ്പെട്ട അശ്ലീലവീഡിയോ വിവാദത്തോട് പ്രതികരിക്കവേയാണ് കെ.കെ. ശൈലജയേയും മഞ്ജുവാര്യരേയും അധിക്ഷേപിക്കുന്ന പരാമർശം നടത്തിയത്. ലോക്‌സഭാ തിരഞ്ഞെടുപ്പിൽ വിവാദങ്ങൾ ഒഴിയാത്ത മണ്ഡലമായിരുന്നു വടകര. ഇടത്, വലത് മുന്നണികൾ പരസ്പരം ആരോപണങ്ങൾ ഉന്നയിച്ചും വിവാദങ്ങൾക്ക് തിരികൊളുത്തിയുമായിരുന്നു പ്രചാരണം മുന്നോട്ട് പോയത്. ഇതിനിടയിൽ യുഡിഎഫ് സ്ഥാനാർത്ഥിയുടെ അറിവോടെ തനിക്ക് നേരെ സൈബർ ആക്രമണം നടക്കുന്നുവെന്ന് കെ കെ ശൈലജ ആരോപിച്ചിരുന്നു. ശൈലജയുടെ പോൺ ദൃശ്യങ്ങൾ വ്യാജമായുണ്ടാക്കി പ്രചരിപ്പിച്ചുവെന്ന ആരോപണവും വടകയിൽ നിന്ന് ഉയർന്നിരുന്നു.

കെ എസ് ഹരിഹരൻ പറഞ്ഞത്:

സിപിഎമ്മിന്റെ സൈബർ ഗുണ്ടകൾ കരുതിയത് അവര് ചില സംഗതികൾ നടത്തിയാൽ അങ്ങ് തീരും എന്നാണ്. ടീച്ചറെ പോർണോ വീഡിയോ ഉണ്ടാക്കി... ആരെങ്കിലും ഉണ്ടാക്കുമോ അത്. മഞ്ജുവാര്യരുടെ പോർണോ വീഡിയോ ഉണ്ടാക്കിയെന്ന് നമുക്ക് കേട്ടാൽ മനസിലാകും. ആരേലും ഉണ്ടാക്കുമോ അത്? ആരുണ്ടാക്കി? ഇതുണ്ടാക്കിയതിൽ പി. മോഹനന്റെ മകൻ ജൂലിയസ് നിഖിതാസിന് വല്ല പങ്കുണ്ടോ?