തൃശ്ശൂർ: രാമവർമപുരത്തെ കേരള പൊലീസ് അക്കാദമിയിൽ വനിതാ ഉദ്യോഗസ്ഥയ്ക്ക് നേരേ ലൈംഗികാതിക്രമമെന്ന പരാതിയിൽ അന്വേഷണം. ആംഡ് പൊലീസ് ഇൻസ്‌പെക്ടർക്കെതിരേയാണ് പരാതി. മെയ്‌ 17നാണ് സംഭവം. ഔദ്യോഗിക കൃത്യനിർവഹണത്തിനിടെയാണ് ആംഡ് റിസർവ് ഇൻസ്‌പെക്ടർ മോശമായി പെരുമാറിയതെന്ന് പരാതിയിൽ പറയുന്നു. ഓഫീസ് കമാൻഡന്റായ ഉദ്യോഗസ്ഥൻ ഓഫീസിലേക്ക് വിളിച്ചുവരുത്തി അതിക്രമം കാട്ടിയെന്നാണ് ആരോപണം.

സംഭവത്തിൽ ഹെഡ് കോൺസ്റ്റബിൾ റാങ്കിലുള്ള വനിതാ ഉദ്യോഗസ്ഥ അക്കാദമി ഡയറക്ടർക്ക് പരാതി എഴുതിനൽകി. രേഖകൾ പ്രിന്റെടുക്കാനുണ്ടെന്ന് പറഞ്ഞ് ഇൻസ്‌പെക്ടർ ഓഫിസിലേക്ക് വിളിച്ചുവരുത്തിയെന്നും തുടർന്ന് തന്നെ കടന്നുപിടിച്ചെന്നും ഉദ്യോഗസ്ഥയുടെ പരാതിയിൽ പറയുന്നു. രക്ഷപ്പെട്ട യുവതി ഓഫിസിൽ നിന്ന് ഇറങ്ങിപ്പോയി. രണ്ടു ദിവസത്തിനുശേഷം വീണ്ടും ഇൻസ്‌പെക്ടറിൽനിന്ന് ഇതേ രീതിയിലുള്ള പെരുമാറ്റമുണ്ടായെന്നും പരാതിയിലുണ്ട്.

ഈ മാസം 17-നാണ് ഉദ്യോഗസ്ഥനിൽനിന്ന് ആദ്യം അതിക്രമം നേരിട്ടതെന്നാണ് പരാതിയിൽ പറയുന്നത്. ചില രേഖകൾ പ്രിന്റെടുക്കാനുണ്ടെന്ന് പറഞ്ഞ് ഉദ്യോഗസ്ഥൻ ഓഫീസിലേക്ക് വിളിച്ചുവരുത്തുകയായിരുന്നു. തുടർന്ന് ഓഫീസിലെത്തിയ തന്നെ ഉദ്യോഗസ്ഥൻ കടന്നുപിടിച്ചെന്നും ലൈംഗികാതിക്രമത്തിന് മുതിർന്നതായും പരാതിയിൽ പറയുന്നു. ഇത് ചെറുത്ത പരാതിക്കാരി ഓഫീസിൽനിന്ന് ഇറങ്ങിപ്പോയി.

തുടർന്ന് രണ്ടുദിവസത്തിന് ശേഷം സമാനരീതിയിൽ വീണ്ടും ഉപദ്രവമുണ്ടായെന്നും പരാതിയിൽ ആരോപിക്കുന്നു. ഉദ്യോഗസ്ഥനെതിരേ കടുത്ത നടപടി വേണമെന്നാണ് പരാതിക്കാരിയുടെ ആവശ്യം. ഇനി അക്കാദമിയിൽ തുടരാനാകില്ലെന്നും മാനസികമായി ഏറെ പ്രയാസത്തിലാണെന്നും പരാതിയിൽ പറയുന്നു.

സംഭവത്തിൽ പൊലീസ് അക്കാദമിയുടെ ഡയറക്ടർക്ക് പരാതി കൈമാറുകയും ആഭ്യന്തര അന്വേഷണസമിതി അന്വേഷിക്കുകയും ചെയ്തിരുന്നു. പരാതിയിൽ കഴമ്പുണ്ടെന്ന് കണ്ടെത്തിയെന്നാണ് സൂചന. അന്വേഷണ റിപ്പോർട്ട് സമർപ്പിച്ച ശേഷമാകും തുടർനടപടികളെടുക്കുക.

അതേസമയം, ഉദ്യോഗസ്ഥയുടെ പരാതി ഇതുവരെ ലോക്കൽ പൊലീസിൽ എത്തിയിട്ടില്ലെന്നാണ് വിവരം. ഇത്തരമൊരു പരാതി ലഭിച്ചിട്ടില്ലെന്നാണ് അക്കാദമി സ്ഥിതിചെയ്യുന്നിടത്തുള്ള വിയ്യൂർ പൊലീസിന്റെ പ്രതികരണം. ആഭ്യന്തര അന്വേഷണത്തിൽ വസ്തുതകളുണ്ടെന്ന് കണ്ടെത്തിയാൽ പരാതി ലോക്കൽ പൊലീസിന് കൈമാറും.