അഹമ്മദാബാദ് എയര്‍ ഇന്ത്യ വിമാന ദുരന്തത്തിന് തൊട്ടുപിന്നാലെ യുഎസില്‍ വന്‍ വിമാന ദുരന്തം ഒഴിവായി; ബോസ്റ്റണ്‍ ലോഗന്‍ വിമാനത്താവളത്തില്‍ ലാന്‍ഡ് ചെയ്യുന്നതിനിടെ ജെറ്റ്ബ്ലൂ യാത്രാ വിമാനം റണ്‍വേയില്‍ നിന്ന് തെന്നി മാറി; ചിത്രങ്ങള്‍ സോഷ്യല്‍ മീഡിയയില്‍
യുഎസില്‍ വന്‍ വിമാന ദുരന്തം ഒഴിവായി
ഈസ്റ്റ് ബോസ്റ്റണ്‍: ഇന്നലെ അഹമ്മദാബാദ് വിമാനത്താവളത്തില്‍ എയര്‍ ഇന്ത്യ വിമാനം തകര്‍ന്നതിന് തൊട്ടു പിന്നാലെ അമേരിക്കയില്‍ ഒരു വന്‍ വിമാനദുരന്തം ഒഴിവായ വാര്‍ത്തയാണ് പുറത്തു വരുന്നത്. ജെറ്റ് ബ്ലൂവിന്റെ ഒരു യാത്രാ വിമാനം റണ്‍വേയില്‍ നിന്ന് തെന്നിമാറുകയായിരുന്നു.
ബോസ്റ്റണ്‍ ലോഗന്‍ അന്താരാഷ്ട്ര വിമാനത്താവളത്തില്‍ ലാന്‍ഡ് ചെയ്യുന്നതിനിടെയാണ് ജെറ്റ്ബ്ലൂ വിമാനം റണ്‍വേക്ക് പുറത്തുള്ള പുല്‍മേടിലേക്ക് തെന്നിമാറിയത്. ഇതിന്റെ ചിത്രങ്ങള്‍ ഇപ്പോള്‍ സോഷ്യല്‍ മീഡിയയില്‍ കാണാം. അപകടത്തെ തുടര്‍ന്ന് വിമാനത്താവളം അടച്ചിട്ടിരുന്നു. എല്ലാ അടിയന്തര സേവനങ്ങളും ലഭ്യമാക്കിയതായി അധികൃതര്‍ വ്യക്തമാക്കി. ആളപായം ഉണ്ടായിട്ടില്ലെന്നാണ് റിപ്പോര്‍ട്ട്. യാത്രക്കാരെ ബസില്‍ ടെര്‍മിനലിലേക്ക് കൊണ്ടു വരികയായിരുന്നു.
ചിക്കാഗോയിലെ ഓ ഹെയര്‍ അന്താരാഷ്ട്ര വിമാനത്താവളത്തില്‍ നിന്നാണ് വിമാനം യാത്ര തിരിച്ചത്. എയര്‍ബസ് എ 220 ഇനത്തില്‍ പെട്ട വിമാനമാണ് അപകടത്തില്‍ പെട്ടത്. സംഭവത്തെ കുറിച്ച് അന്വേഷണം നടത്താന്‍ കമ്പനി ഉത്തരവിട്ടിട്ടുണ്ട്. സംഭവത്തിന്റെ കൂടുതല്‍ വിശദാംശങ്ങള്‍ വെളിപ്പെടുത്താന്‍ ജെറ്റ് ബ്ലൂ വക്താക്കള്‍ വിസമ്മതിച്ചു.
എയര്‍ഇന്ത്യ വിമാനാപകടത്തിന്റെ തൊട്ടു പിന്നാലെയാണ് ഈ അപകടം ഒഴിവായത് എന്നതാണ് ഏറെ ശ്രദ്ധേയമായിരിക്കുന്നത്. എയര്‍ ഇന്ത്യ
വിമാന ദുരന്തത്തെ തുടര്‍ന്ന് ഇപ്പോള്‍ ലോകത്തെ മിക്ക വിമാനക്കമ്പനികളും കൂടുതല്‍ ജാഗ്രത പാലിക്കുന്ന സമയത്താണ് ഈ സംഭവം ഉണ്ടായിരിക്കുന്നത്.
