നേരെ നിവർന്ന് നിന്ന് ചിറകടിച്ച് കൂകി വിളിക്കാൻ പോലും ആവതിയില്ല; നടക്കാൻ ഒരാളുടെ സഹായം കൂടിയേ തീരൂ..; ടിവി കാണുന്നത് ആശാന്റെ സ്ഥിരം ഹോബി; ഏറെ നേരം മുറിയിൽ തന്നെ ചിലവഴിച്ച് ജീവിതം; ലോകത്തിലെ തന്നെ ഏറ്റവും പ്രായംകൂടിയ 'കോഴി' ദാ...ഇവിടെയുണ്ട്
ലിറ്റിൽ എൽമ്: സാധാരണയായി കോഴികളുടെ ആയുസ്സ് മൂന്ന് മുതൽ പത്ത് വർഷം വരെയാണ്. എന്നാൽ ഈ കണക്കുകൾ തിരുത്തിക്കുറിച്ചുകൊണ്ട്, 14 വർഷവും 69 ദിവസവും ജീവിച്ച് ലോക റെക്കോർഡ് സ്വന്തമാക്കിയിരിക്കുകയാണ് 'പേൾ' എന്ന കോഴി. 2025 മെയ് 22-നാണ് പേൾ ഈ നേട്ടം കൈവരിച്ചത്.
ലിറ്റിൽ എൽമിൽ താമസിക്കുന്ന സോന്യ ഹൾ ആണ് പേളിന്റെ ഉടമ. 2011 മാർച്ച് 13-നാണ് സോന്യയുടെ ഇൻകുബേറ്ററിൽ നിന്ന് പേൾ വിരിഞ്ഞിറങ്ങുന്നത്. അന്ന് മുതൽ ഹൾ കുടുംബത്തിലെ ഒരംഗമായാണ് പേൾ വളർന്നത്. കോഴികളുടെ ആയുസ്സിന്റെ സാധാരണ പരിധിക്ക് മുകളിൽ പേൾ ജീവിച്ചത് നിരവധി പ്രതിബന്ധങ്ങളെ അതിജീവിച്ചാണ്. കാലിനേറ്റ പരിക്ക്, ഒരു റാക്കൂണിന്റെ ആക്രമണം, സന്ധിവാതം, ചിക്കൻപോക്സ് തുടങ്ങിയ രോഗങ്ങളെല്ലാം അതിജീവിച്ചാണ് പേൾ ഇത്രയും കാലം ജീവിതം നയിച്ചത്.
പേളിന്റെ ഉടമയായ സോന്യ ഹൾ പറയുന്നതനുസരിച്ച്, അവളുടെ 14 വർഷത്തെ ജീവിതത്തിൽ ഒരുപാട് അനുഭവങ്ങൾ ഉണ്ടായിട്ടുണ്ട്. എന്നാൽ കുടുംബത്തിൽ നിന്ന് ലഭിച്ച സ്നേഹവും ശ്രദ്ധയും പരിചരണവുമാണ് പേളിന്റെ ജീവിതത്തിൽ ഒരിക്കലും മാറാതിരുന്ന ഒരേയൊരു കാര്യം. ഈ സ്നേഹമായിരിക്കാം പേൾ ഇത്രയും കാലം ജീവിക്കാനുള്ള പ്രധാന കാരണങ്ങളിൽ ഒന്ന്.
ചെറുപ്പത്തിൽ മറ്റു കോഴികൾക്കൊപ്പം കൂട്ടിൽ കഴിഞ്ഞിരുന്ന പേളിന് പ്രായമാകുന്നതിനനുസരിച്ച് നടക്കാൻ ബുദ്ധിമുട്ട് നേരിട്ടു. ഇതോടെ സോന്യ പേളിനായി വീടിനുള്ളിൽ ഒരു പ്രത്യേക സ്ഥലം ഒരുക്കി. വീടിന്റെ ഹാളിൽ ടിവി കാണാൻ ഇഷ്ടപ്പെടുന്ന പേളിനായി പ്രത്യേകം ടിവിയും സജ്ജീകരിച്ചിട്ടുണ്ട്. പേളിന് വീട്ടിലെ അന്തരീക്ഷവും കുടുംബാംഗങ്ങളുടെ സ്നേഹവും സംരക്ഷണവും ലഭിച്ചതാണ് അവളെ ഏറ്റവും കൂടുതൽ കാലം ജീവിച്ച കോഴിയാക്കി മാറ്റിയതെന്ന് വിശ്വസിക്കുന്നു.
ലോക റെക്കോർഡ് നേട്ടത്തിലൂടെ പേൾ ലോകശ്രദ്ധ നേടുകയാണ്. കോഴികളുടെ സാധാരണ ജീവിതപരിധിക്കപ്പുറം, സ്നേഹവും പരിചരണവും എങ്ങനെ ഒരു ജീവിയുടെ ആയുസ്സിനെ സ്വാധീനിക്കാം എന്നതിന്റെ ഉദാഹരണമാണ് പേൾ.
തിരുവോണം പ്രമാണിച്ച് നാളെ (5.09.2025) ഓഫീസിന് അവധി ആയതിനാല്‍ മറുനാടന്‍ മലയാളിയില്‍ വാര്‍ത്തകള്‍ അപ്‌ഡേറ്റ് ചെയ്യുന്നതല്ല. പ്രിയ വായനക്കാര്‍ക്ക് ഹൃദയം നിറഞ്ഞ ഓണാശംസകള്‍- എഡിറ്റര്‍.
