'ഇതിന് മുമ്പ് ലോട്ടറി അടിച്ചവരുടെ അനുഭവങ്ങള്‍ യൂട്യൂബിലൊക്കെ കാണാം; അതൊക്കെ കേട്ട് അവര് പേടിച്ചിരിക്കുകയാണ്; കിടന്നുറങ്ങാന്‍ പറ്റില്ലെന്നാണ് പറയുന്നത്'; അവരെ കുഴപ്പത്തിലാക്കരുതെന്ന് ലോട്ടറി ഏജന്റ് ലതീഷ്; അജ്ഞാതയായി തുടരാനാണ് ഇഷ്ടമെന്ന് ഓണം ബമ്പര്‍ ഭാഗ്യശാലി
അജ്ഞാതയായി തുടരാനാണ് ഇഷ്ടമെന്ന് ഓണം ബമ്പര്‍ ഭാഗ്യശാലി
കൊച്ചി: 25 കോടിയുടെ ഓണം ബമ്പര്‍ അടിച്ചത് നെട്ടൂര്‍ സ്വദേശിനി എടുത്ത ടിക്കറ്റിനാണെന്ന് സ്ഥിരീകരിച്ചെങ്കിലും ആ ഭാഗ്യശാലി ഇപ്പോഴും കാണാമറയത്താണ്. അജ്ഞാതയായി തുടരാനാണ് ഇഷ്ടമെന്നും മാദ്ധ്യമങ്ങളെ കാണാന്‍ താത്പര്യമില്ലെന്നും അവര് അറിയിച്ചതായാണ് വിവരം. ഇവരുടെ വീട് പൂട്ടിയിട്ടിരിക്കുകയാണ്. മകളുടെ വീട്ടിലേക്ക് മാറിയതാകാമെന്നാണ് ടിക്കറ്റ് വിറ്റ ഏജന്റ് ലതീഷ് പറഞ്ഞത്.
നെട്ടൂരില്‍ താമസമാക്കിയ ജോലിചെയ്യുന്ന സ്ത്രീയ്ക്കാണ് 25 കോടിയുടെ ബമ്പര്‍ അടിച്ചിരിക്കുന്നത്. വിവരം രഹസ്യമായി സൂക്ഷിക്കാന്‍ ആഗ്രഹിക്കുന്നതുകൊണ്ട് തന്നെ തിരുവോണ ബമ്പര്‍ ആര്‍ക്കാണ് എന്ന വിവരം ഒരു 'ഭാഗ്യശാലി' എന്നതില്‍ രഹസ്യമായി ഒരുപക്ഷെ ഒതുങ്ങിയേക്കും. തിങ്കളാഴ്ച ഇവര്‍ ബാങ്കില്‍ ടിക്കറ്റ് നല്‍കിയേക്കുമെന്നാണ് വിവരം. പേര് വെളിപ്പെടുത്താന്‍ ആഗ്രഹമില്ലെന്നാണ് അവര് ഇപ്പോള്‍ വ്യക്തമാക്കിയിരിക്കുന്നത്. രഹസ്യമായിത്തന്നെ ഇക്കാര്യം സൂക്ഷിക്കണമെന്ന് പറയുന്നതായി ലോട്ടറി ഏജന്റ് ലതീഷ് പറയുന്നു. ഇവര്‍ മാധ്യമങ്ങളെ കാണുമെന്ന സൂചനകള്‍ നേരത്തെ ഉണ്ടായിരുന്നു.
കഴിഞ്ഞ ദിവസം രാത്രിയോടെ ടിക്കറ്റിന്റെ ഫോട്ടോ കടയുടമയുടെ സുഹൃത്തിന് അയച്ചുകൊടുത്തിരുന്നു. ചില ആളുകളോടും ലോട്ടറി അടിച്ച കാര്യം ഇവര്‍ നേരിട്ടല്ലാതെ സമ്മതിക്കുകയും ചെയ്തിരുന്നു. രാവിലെ ഇവരുടെ വീട്ടിലേക്ക് ലോട്ടറി ഉടമയുടെ സുഹൃത്തുക്കള്‍ ചെന്നപ്പോഴാണ് വീട് പൂട്ടി ഇവര്‍ മകളുടെ വീട്ടിലേക്ക് മാറിയ വിവരമറിഞ്ഞത്. ഈ വിവരം പുറത്തുപറയാന്‍ ആഗ്രഹമില്ലെന്നാണ് ഇവര്‍ ഇപ്പോള്‍ വ്യക്തമാക്കുന്നത്.
പതിവായ് ടിക്കറ്റ് എടുക്കുന്ന ആളല്ല അവര്. ഓണം ബമ്പര്‍ ആയതുകൊണ്ടാണ് ടിക്കറ്റ് എടുത്തത്. ഇന്നലെ അവര് ടിക്കറ്റുമായ് കടയില്‍ വന്നിരുന്നു. തിരക്കും ബഹളവും കണ്ട് തിരികെ പോയതാകാമെന്നും ലതീഷ് പറയുന്നു. TH 577825 എന്ന നമ്പറിനാണ് 25 കോടി രൂപയുടെ ഒന്നാം സമ്മാനം ലഭിച്ചത്. ആറ്റിങ്ങല്‍ ഭഗവതി ഏജന്‍സി എറണാകുളം നെട്ടൂരില്‍ വിറ്റ ടിക്കറ്റിനാണ് സമ്മാനം.
'ഇതിന് മുമ്പ് ലോട്ടറി അടിച്ചവരുടെ അനുഭവങ്ങള്‍ യൂട്യൂബിലൊക്കെ കാണാം. അതൊക്കെ കേട്ട് അവര് പേടിച്ചിരിക്കുകയാണ്. അവര്‍ക്ക് വീട്ടില്‍ കിടന്നുറങ്ങാന്‍ പറ്റില്ലെന്നാണ് അവര് പറയുന്നത്. എങ്ങനെ അവതരിപ്പിക്കുമെന്ന് അറിയില്ല. അവരെ കണ്ട് കൈ കൊടുക്കുക എന്നതല്ലാതെ മറ്റൊന്നും ഞാന്‍ പ്രതീക്ഷിക്കുന്നില്ല'- ടിക്കറ്റ് വിറ്റ ഏജന്റ് ലതീഷ് പറഞ്ഞു.
ആരൂല്ലാത്ത കുടുംബമാണ്. അവരെ കുഴപ്പത്തിലാക്കരുത്. എന്നെയും കുഴപ്പത്തിലാക്കരുത്. ഞാന്‍ ഇത് വിറ്റാണ് താമസിക്കുന്നത്- ലതീഷ് പറഞ്ഞു. ഈ ആള്‍ക്കൂട്ടം ഒക്കെ കണ്ടാല്‍ അവര് ഈ നാട്ടില്‍ നിന്ന് തന്നെ പോകും. നാളെയോ മറ്റന്നാളോ ആയി അവര് ബാങ്കില്‍ കൊണ്ടുപോയി കൊടുക്കും. കൂടുതല്‍ കാര്യം തനിക്കറിയില്ലെന്ന് ലതീഷ് പറഞ്ഞു.
25 കോടിയില്‍ പത്ത് ശതമാനമാണ് ലതീഷിന് ലഭിക്കുക. കഴിഞ്ഞ 30 വര്‍ഷമായി ലോട്ടറി കച്ചവടം ചെയ്യുന്ന തനിക്ക് ലഭിച്ച മഹാഭാഗ്യമാണിത്. മലയാളികളാണ് തന്റെ കൂടുതല്‍ കസ്റ്റമറര്‍മാരെന്നും ഇടയ്ക്ക് ഹിന്ദിക്കാര്‍ ടിക്കറ്റ് എടുക്കാറുണ്ടെന്നും ലതീഷ് പറഞ്ഞു. മൂന്ന് മാസം മുന്‍പാണ് ലതീഷിന്റെ കടയില്‍ നിന്ന് വിറ്റ ടിക്കറ്റിന് ഒരു കോടി അടിച്ചത്. ഓണം ബമ്പറും അടിച്ചതോടെ ലതീഷിന്റെ കടയിലേക്ക് ടിക്കറ്റ് വാങ്ങാന്‍ എത്തുന്നവരുടെ എണ്ണവും കൂടിയിട്ടുണ്ട്.
