കടും നിറമുള്ള വസ്ത്രം ധരിക്കണം; മുഖം പൂര്‍ണ്ണമായും ദൃശ്യമായിരിക്കണം; നിഷ്പക്ഷമായിരിക്കണം; ശിരോവസ്ത്രം അനുവദിക്കുന്നതിലും നിബന്ധന; പാസ്‌പോര്‍ട്ട്, വിസ അപേക്ഷകളില്‍ ഇന്ത്യന്‍ പ്രവാസികള്‍ക്ക് കര്‍ശന മാര്‍ഗ്ഗനിര്‍ദ്ദേശങ്ങള്‍
അബുദാബി: യു.എ.ഇയിലെ ഇന്ത്യന്‍ പാസ്‌പോര്‍ട്ട്, വിസ അപേക്ഷാ സേവനങ്ങള്‍ക്കായുള്ള ഔട്ട്‌സോഴ്‌സ് ഏജന്‍സിയായ ബി.എല്‍.എസ് ഇന്റര്‍നാഷണല്‍, പുതുക്കിയ പാസ്‌പോര്‍ട്ട് ഫോട്ടോ മാര്‍ഗ്ഗനിര്‍ദ്ദേശങ്ങള്‍ സംബന്ധിച്ച് ഇന്ത്യന്‍ പ്രവാസികള്‍ക്ക് മുന്നറിയിപ്പ് നല്‍കി. കഴിഞ്ഞ സെപ്റ്റംബര്‍ 1 മുതല്‍ പ്രാബല്യത്തില്‍ വന്ന ഫോട്ടോഗ്രാഫുകള്‍ക്കായുള്ള ഇന്റര്‍നാഷണല്‍ സിവില്‍ ഏവിയേഷന്‍ ഓര്‍ഗനൈസേഷന്‍ മാനദണ്ഡങ്ങള്‍ ഉപയോഗിച്ച് കമ്പനി വെബ്‌സൈറ്റ് അപ്‌ഡേറ്റ് ചെയ്തതിന് ശേഷമാണ് പാസ്‌പോര്‍ട്ട് അപേക്ഷകരുടെ വസ്ത്രധാരണത്തെക്കുറിച്ചുള്ള ഏറ്റവും പുതിയ നിര്‍ദ്ദേശം ബിഎല്‍എസ് പുറപ്പെടുവിച്ചത്.
എല്ലാ ഇന്ത്യന്‍ പാസ്‌പോര്‍ട്ട് അപേക്ഷകളും അവരുടെ ഫോട്ടോഗ്രാഫുകളില്‍ ഐ.സി.എ.ഒ മാനദണ്ഡങ്ങള്‍ പാലിക്കണം എന്ന കാര്യം നിര്‍ബന്ധമാണ്. ദുബായിലെ ഇന്ത്യന്‍ കോണ്‍സുലേറ്റും ഇക്കാര്യം സ്ഥിരീകരിച്ചിരുന്നു. ഇത് പാലിക്കുന്നതിനായി, പാസ്‌പോര്‍ട്ട് അപേക്ഷാ സേവനങ്ങള്‍ക്കായി തങ്ങളുടെ കേന്ദ്രങ്ങളില്‍ സന്ദര്‍ശിക്കുമ്പോള്‍ കടും നിറത്തിലുള്ള വസ്ത്രം ധരിക്കാന്‍ ബി.എല്‍.എസ് ഇപ്പോള്‍ അപേക്ഷകരോട് ആവശ്യപ്പെട്ടിരിക്കുകയാണ്. ഇതൊരു ആവശ്യകതയാണ് എന്നാണ് ബി.എല്‍.എസ് വ്യക്തമാക്കുന്നത്. ഐ.സി.എ.ഒയുടെ മാനദണ്ഡങ്ങള്‍ പാലിക്കാന്‍ പരിശീലനം ലഭിച്ച ജീവനക്കാര്‍ എല്ലാ ബി.എല്‍.എസ് കേന്ദ്രങ്ങളിലും സജ്ജമാണ്.
അപേക്ഷകര്‍ പാസ്‌പോര്‍ട്ടിനൊപ്പം കടും നിറമുള്ള വസ്ത്രത്തില്‍ വേണം ബി.എല്‍.എസ് സെന്ററില്‍ റിപ്പോര്‍ട്ട് ചെയ്യേണ്ടത്. പാസ്‌പോര്‍ട്ടില്‍ കാണുന്ന ഫോട്ടോയുടെ ഗുണനിലവാരം പാസ്‌പോര്‍ട്ടിന് അപേക്ഷിക്കുന്ന സമയത്ത് സമര്‍പ്പിക്കുന്ന ഫോട്ടോയെ ആശ്രയിച്ചിരിക്കുന്നു. അതിനാല്‍, പാസ്‌പോര്‍ട്ട് അപേക്ഷകര്‍ അവരുടെ പാസ്‌പോര്‍ട്ട് അപേക്ഷകള്‍ പ്രോസസ്സ് ചെയ്യുന്നതില്‍ കാലതാമസം ഉണ്ടാകാതിരിക്കാന്‍, ഫോട്ടോഗ്രാഫുകള്‍ സമര്‍പ്പിക്കണം. വെള്ളയും ഇളം നിറത്തിലുള്ള വസ്ത്രങ്ങളും പശ്ചാത്തലത്തില്‍ നിന്ന് വേര്‍തിരിച്ചറിയാന്‍ കഴിയാത്തതിനാല്‍ അവ ഒഴിവാക്കണം എന്നാണ് പ്രധാന നിര്‍ദ്ദേശം. ഈ മാര്‍ഗ്ഗനിര്‍ദ്ദേശങ്ങള്‍ പാലിക്കാത്ത ഫോട്ടോഗ്രാഫുകള്‍ പാസ്‌പോര്‍ട്ട് അപേക്ഷകള്‍ വൈകുന്നതിനോ നിരസിക്കുന്നതിനോ ഇടയാക്കും. അപേക്ഷകര്‍ അവരുടെ ഫോട്ടോഗ്രാഫുകള്‍ ആവശ്യമായ മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കാന്‍ ഉചിതമായ വസ്ത്രധാരണത്തോടെ തന്നെ വേണം ബി.എല്‍.എസ് കേന്ദ്രങ്ങള്‍ സന്ദര്‍ശിക്കേണ്ടത്. അപേക്ഷകര്‍ക്ക് മറ്റ് സ്റ്റുഡിയോകളില്‍ നിന്ന് ഐ.സി.എ.ഒ മാനദണ്ഡങ്ങള്‍ക്ക് അനുയോജ്യമായ ഫോട്ടോഗ്രാഫുകള്‍ എടുക്കാനും സ്വാതന്ത്ര്യമുണ്ട്.
എന്നാല്‍ ബി.എല്‍.എസ് സെന്ററുകളില്‍ നവജാത ശിശുക്കളുടെ ഫോട്ടോ എടുക്കുന്നതിന് വ്യവസ്ഥയില്ലെന്നാണ് അവരുടെ വെബ്‌സൈറ്റ് പറയുന്നത്. യുഎഇയില്‍ ജനിക്കുന്ന കുട്ടികളുടെ പാസ്‌പോര്‍ട്ടിന് അപേക്ഷിക്കുന്ന മാതാപിതാക്കള്‍ക്ക് ഇംഗ്ലീഷിലുള്ള ഒറിജിനല്‍ ജനന സര്‍ട്ടിഫിക്കറ്റ് യുഎഇ വിദേശകാര്യ മന്ത്രാലയം സാക്ഷ്യപ്പെടുത്തണമെന്ന് ബി.എല്‍.എസ് മുന്നറിയിപ്പ് നല്‍കിയിട്ടുണ്ട്.
പാസ്പോര്‍ട്ടിലേക്കുള്ള ഫോട്ടോയുടെ മാനദണ്ഡങ്ങള്‍ ഇവയാണ്. ബിഎല്‍എസ് സെന്ററുകളില്‍ പങ്കെടുക്കുമ്പോള്‍ അപേക്ഷകര്‍ കടും നിറത്തിലുള്ള വസ്ത്രം ധരിക്കണം. കളര്‍ ഫോട്ടോ ആയിരിക്കണം. പശ്ചാത്തലം പ്ലെയിന്‍ വെള്ളയായിരിക്കണം. അപേക്ഷകന്റെ മുഖം ഫോട്ടോയുടെ 80-85% വരെയും ഉള്‍ക്കൊള്ളണം. കണ്ണുകള്‍ തുറന്ന് വായ അടച്ചിരിക്കണം, മുഖഭാവം നിഷ്പക്ഷമായിരിക്കണം. ഫോട്ടോ അടുത്തിടെ അഥവാ കഴിഞ്ഞ മൂന്ന് മാസത്തിനുള്ളില്‍ എടുത്തതായിരിക്കണം. ഡിജിറ്റല്‍ മാറ്റങ്ങള്‍ അനുവദനീയമല്ല. മതപരമായ കാരണങ്ങളാല്‍ മാത്രമേ ശിരോവസ്ത്രം അനുവദനീയമാകൂ, പക്ഷേ മുഖം പൂര്‍ണ്ണമായും ദൃശ്യമായിരിക്കണം. കുവൈറ്റിലേത് ഉള്‍പ്പെടെയുള്ള മറ്റ് ഇന്ത്യന്‍ നയതന്ത്ര കാര്യാലയങ്ങള്‍ ഇതിനകം സമാനമായ നിബന്ധനകള്‍ നടപ്പിലാക്കിയിട്ടുണ്ട്. അബുദാബിയിലും ഇത് ഉടന്‍ നടപ്പിലാക്കുമെന്ന് പ്രതീക്ഷിക്കുന്നു. അപേക്ഷ വൈകുന്നതും നിരസിക്കുന്നതും ഒഴിവാക്കാന്‍, ദുബായിലെ അപേക്ഷകര്‍ അപ്പോയിന്റ്മെന്റ് എടുക്കുന്നതിന് മുന്‍പ് പുതുക്കിയ നിയമങ്ങള്‍ ശ്രദ്ധാപൂര്‍വം പരിശോധിക്കാന്‍ നിര്‍ദേശമുണ്ട്.
