ജോലി എന്നത് ഭാവിയില്‍ കായിക വിനോദങ്ങളിലോ സ്വന്തമായി പച്ചക്കറികള്‍ കൃഷി ചെയ്യുന്നതിലോ ഏര്‍പ്പെടുന്നത് പോലെ ഒരു ഹോബിയായി മാറും; പണം അപ്രസക്തമാകും; എല്ലാം എഐയും റോബോട്ടിക്‌സും നിശ്ചയിക്കും; മസ്‌കിന്റെ വിപ്ലവ ചിന്തകള്‍ ഇങ്ങനെ
വാഷിംഗ്ടണ്‍: ആര്‍ട്ടിഫിഷ്യല്‍ ഇന്റലിജന്‍സിന്റെയും റോബോട്ടിക്‌സിന്റെയും അതിവേഗത്തിലുള്ള വളര്‍ച്ചയുടെ ഫലമായി അടുത്ത 10-20 വര്‍ഷത്തിനുള്ളില്‍ ജോലി ചെയ്യുന്നത് ഒരു ഓപ്ഷന്‍ മാത്രമായി മാറുമെന്നും, പണം കാലഹരണപ്പെടുമെന്നും ലോകത്തിലെ ഏറ്റവും ധനികനായ വ്യക്തികളില്‍ ഒരാളായ ഇലോണ്‍ മസ്‌കിന്റെ പ്രവചനം.. വാഷിംഗ്ടണില്‍ നടന്ന യുഎസ്-സൗദി നിക്ഷേപ ഫോറത്തില്‍ സംസാരിക്കവെയാണ് ടെസ്ല സിഇഒയും ദക്ഷിണാഫ്രിക്കന്‍ ശതകോടീശ്വരനുമായ അദ്ദേഹം ഈ സുപ്രധാന നിരീക്ഷണങ്ങള്‍ പങ്കുവെച്ചത്.
ജോലി എന്നത് ഭാവിയില്‍ കായിക വിനോദങ്ങളിലോ സ്വന്തമായി പച്ചക്കറികള്‍ കൃഷി ചെയ്യുന്നതിലോ ഏര്‍പ്പെടുന്നത് പോലെ ഒരു ഹോബിയായി മാറുമെന്നാണ് മസ്‌ക് വിശദീകരിച്ചത്. 'നിങ്ങള്‍ക്ക് ജോലി ചെയ്യാന്‍ താല്‍പ്പര്യമുണ്ടെങ്കില്‍, അത് കടയില്‍ പോയി പച്ചക്കറികള്‍ വാങ്ങുന്നതിന് തുല്യമാകും, അല്ലെങ്കില്‍ നിങ്ങള്‍ക്ക് വീട്ടുവളപ്പില്‍ പച്ചക്കറികള്‍ കൃഷി ചെയ്യാം. വീട്ടുവളപ്പില്‍ കൃഷി ചെയ്യുന്നത് കൂടുതല്‍ ബുദ്ധിമുട്ടാണ്, എന്നിട്ടും ചിലര്‍ അത് ചെയ്യുന്നത് ഇഷ്ടപ്പെടുന്നതുകൊണ്ടാണ്. അതുപോലെയാകും ഭാവിയില്‍ ജോലി,' മസ്‌ക് പറഞ്ഞു.
360 ബില്യണ്‍ ഡോളര്‍ ആസ്തിയുള്ളതും, അടുത്തിടെ ഒരു ട്രില്യണ്‍ ഡോളര്‍ വരെ മൂല്യമുള്ള റെക്കോര്‍ഡ് പേ പാക്കേജിന് അംഗീകാരം നല്‍കിയതുമായ മസ്‌ക്, പണം അപ്രസക്തമാകുമെന്ന തന്റെ വാദത്തില്‍ ഉറച്ചുനിന്നു. 'എല്ലാവരെയും സമ്പന്നരാക്കാന്‍ ഒരൊറ്റ വഴിയേ ഉള്ളൂ, അത് AI-യും റോബോട്ടിക്‌സുമാണ്,' അദ്ദേഹം കൂട്ടിച്ചേര്‍ത്തു. സാങ്കേതിക മുന്നേറ്റങ്ങള്‍ നിലവിലെ വേഗതയില്‍ തുടരുകയാണെങ്കില്‍, ഭാവിയില്‍ സുഖകരമായ ജീവിതം നയിക്കാന്‍ പണം സമ്പാദിക്കേണ്ട ആവശ്യമില്ലെന്നും അദ്ദേഹം വ്യക്തമാക്കി. വൈദ്യുതിക്ക് ചില പരിമിതികള്‍ ഉണ്ടാകുമെങ്കിലും കറന്‍സിക്ക് പ്രാധാന്യം ഇല്ലാതാകുമെന്ന് അദ്ദേഹം പ്രവചിച്ചു.
ടെസ്ല വികസിപ്പിക്കുന്ന ഹ്യൂമനോയിഡ് റോബോട്ടായ ഓപ്റ്റിമസിനെയും ('ടെസ്ല ബോട്ട്') മസ്‌ക് എടുത്തുപറഞ്ഞു. ഈ റോബോട്ടുകള്‍ ദാരിദ്ര്യം ഇല്ലാതാക്കാന്‍ സഹായിക്കുമെന്നും ഒരു ദിവസം എല്ലാവര്‍ക്കും ഇത്തരം ഉപകരണങ്ങള്‍ സ്വന്തമാക്കാന്‍ കഴിയുമെന്നും അദ്ദേഹം പ്രതീക്ഷ പ്രകടിപ്പിച്ചു. മനുഷ്യന്റെ സാമൂഹികവും സാമ്പത്തികവുമായ ഭാവിയെക്കുറിച്ചുള്ള ഇലോണ്‍ മസ്‌കിന്റെ ഈ കാഴ്ചപ്പാടുകള്‍, സാങ്കേതികവിദ്യയുടെ വിപ്ലവകരമായ സ്വാധീനത്തെയാണ് അടിവരയിടുന്നത്.
