കാച്ചിയില്‍ നടക്കാനിരുന്ന അര്‍ജന്റീനയുടെ സൗഹൃദ മത്സരം റദ്ദാക്കിയതിനെ തുടര്‍ന്ന് കേരളം ഉള്‍പ്പെടെ ദക്ഷിണേന്ത്യയിലെ ഫുട്‌ബോള്‍ ആരാധകരുടെ ആവേശം കണക്കിലെടുത്ത് തീരുമാനം; ഹൈദരാബാദില്‍ മെസി എത്തുന്നത് ഡിസംബര്‍ 13ന്; തെലുങ്കാന ആഹ്ലാദത്തില്‍; ഹൈദരാബാദില്‍ തെളിയുന്നത് മാര്‍ച്ചില്‍ മെസി കേരളത്തില്‍ വരില്ലെന്ന സത്യം
ഹൈദരാബാദ്: മെസിയെ കാണാന്‍ ആഗ്രഹിക്കുന്ന കേരളത്തിലെ ഫുട്‌ബോള്‍ പ്രേമികള്‍ക്ക് ഹൈദരാബാദില്‍ പോയാല്‍ ഇതിഹാസം പന്തു തട്ടുന്നത് കാണാം. ലയണല്‍ മെസ്സിയും തെലങ്കാന മുഖ്യമന്ത്രി എ. രേവന്ത് റെഡ്ഡിയും തമ്മിലുള്ള ഒരു സ്വപ്ന ഫുട്‌ബോള്‍ മത്സരത്തിന് ഹൈദരാബാദിലെ രാജീവ് ഗാന്ധി അന്താരാഷ്ട്ര സ്റ്റേഡിയം വേദിയാകും. 2025 ഡിസംബര്‍ 13-നാണ് ഉപ്പലില്‍ ആണ് ഈ മത്സരം നടക്കുക.
'ജി.ഒ.എ.ടി. ഇന്ത്യാ ടൂര്‍ 2025'-ന്റെ ഭാഗമായി ഇന്ത്യയിലെത്തുന്ന മെസ്സി, തന്റെ പ്രശസ്തമായ പത്താം നമ്പര്‍ ജേഴ്‌സിയണിഞ്ഞ് കളത്തിലിറങ്ങുമ്പോള്‍, മുഖ്യമന്ത്രി രേവന്ത് റെഡ്ഡി ഒന്‍പതാം നമ്പര്‍ ജേഴ്‌സി ധരിക്കും. ഉപ്പലിലെ രാജീവ് ഗാന്ധി അന്താരാഷ്ട്ര സ്റ്റേഡിയത്തില്‍ നടക്കുന്ന ഈ മത്സരം, തെലങ്കാനയിലെ കായിക മേഖലയില്‍ വലിയ ഉണര്‍വ്വ് സൃഷ്ടിക്കുമെന്നും അന്താരാഷ്ട്ര തലത്തില്‍ സംസ്ഥാനത്തിന്റെ പ്രതിച്ഛായ ഉയര്‍ത്താന്‍ സഹായിക്കുമെന്നും പ്രതീക്ഷിക്കപ്പെടുന്നു.
മെസ്സിയുടെ ഡിസംബറിലെ ഇന്ത്യന്‍ പര്യടനത്തില്‍ ഹൈദരാബാദും വേദിയാകും. 'ഗോട്ട് ടൂര്‍ ഓഫ് ഇന്ത്യ 2025' പരിപാടിയില്‍ അഹമ്മദാബാദിനു പകരം ഹൈദരാബാദിനെ ഉള്‍പ്പെടുത്തിയതായി സംഘാടകര്‍ നേരത്തെ പ്രഖ്യാപിച്ചിരുന്നു. ഇപ്പോഴിതാ തെലങ്കാന മുഖ്യമന്ത്രി രേവന്ത് റെഡ്ഡിയും മെസ്സിയുടെ സന്ദര്‍ശനം സമൂഹമാധ്യമമായ എക്സിലൂടെ പ്രഖ്യാപിച്ചു. 'ലയണല്‍ മെസ്സിയെ തെലങ്കാന സ്വാഗതം ചെയ്യുന്നു! 'തെലങ്കാന റൈസിംഗ് 2047' വിഷന്‍ ഭാഗമായി മെസ്സി ഈ ഡിസംബറില്‍ ഹൈദരാബാദില്‍ എത്തുന്നുവെന്നാണ് രേവന്ത് റെഡ്ഡി കുറിച്ചത്. സംസ്ഥാനത്തിന്റെ ആഗോള പ്രതിച്ഛായയും സുസ്ഥിര വളര്‍ച്ചയും പ്രോത്സാഹിപ്പിക്കുന്ന ഒരു സംരംഭമായ 'തെലങ്കാന റൈസിംഗ് 2047' ന്റെ ആഗോള അംബാസഡറാകാന്‍ മെസ്സിയെ ക്ഷണിക്കാനും സര്‍ക്കാര്‍ പദ്ധതിയിട്ടിട്ടുണ്ടെന്ന് റിപ്പോര്‍ട്ടുകള്‍ പറയുന്നു.
ഹൈദരാബാദ് ആദ്യം ടൂര്‍ ലിസ്റ്റില്‍ ഉണ്ടായിരുന്നില്ല. കൊച്ചിയില്‍ നടക്കാനിരുന്ന അര്‍ജന്റീനയുടെ സൗഹൃദ മത്സരം റദ്ദാക്കിയതിനെ തുടര്‍ന്ന് കേരളം ഉള്‍പ്പെടെ ദക്ഷിണേന്ത്യയിലെ ഫുട്‌ബോള്‍ ആരാധകരുടെ ആവേശം കണക്കിലെടുത്താണ് ഹൈദരാബാദിനെ ഉള്‍പ്പെടുത്തിയതെന്നാണ് റിപ്പോര്‍ട്ട്. അതായത് ഇനി ഉടനൊന്നും മെസി ഇന്ത്യയിലേക്ക് വരാന്‍ ഇടയില്ല. കൊച്ചിയില്‍ മാര്‍ച്ചില്‍ അര്‍ജന്റീന കളിക്കുമെന്ന അവകാശ വാദങ്ങളെ സംശയത്തില്‍ നിര്‍ത്തുന്നതാണ് ഈ വാദങ്ങള്‍. ഡിസംബര്‍ 12ന് രാത്രി മയാമിയില്‍ നിന്ന് ന്യൂഡല്‍ഹിയിലെത്തുന്ന മെസ്സി 13ന് രാവിലെ കൊല്‍ക്കത്തയിലും വൈകിട്ട് ഹൈദരാബാദിലും വിവിധ ചടങ്ങുകളില്‍ പങ്കെടുക്കും.
14ന് മുംബൈയിലും 15ന് ന്യൂഡല്‍ഹിയിലുമായി അവസാനിക്കുന്ന പര്യടനത്തിനിടെ മെസ്സി പ്രധാനമന്ത്രി നരേന്ദ്രമോദിയുമായി കൂടികാഴ്ച നടത്തും. ഇന്ത്യാ സന്ദര്‍ശനത്തിന് എത്തുന്ന വിവരം മെസ്സി നേരത്തെ തന്റെ സമൂഹമാധ്യമ പേജുകള്‍ വഴി ഔദ്യോഗികമായി അറിയിച്ചിരുന്നു. 2011 സെപ്റ്റംബറില്‍ കൊല്‍ക്കത്തയിലെ സോള്‍ട്ട്ലേക് സ്റ്റേഡിയത്തില്‍ നടന്ന അര്‍ജന്റീന വെനസ്വേല സൗഹൃദ ഫുട്‌ബോള്‍ മത്സരം കളിക്കാനാണ് മെസി മുമ്പ് ഇന്ത്യയിലെത്തിയത്.
