'അഡോൾഫ് ഹിറ്റ്‌ലർ' എതിരില്ലാതെ അഞ്ചാം തവണയും വിജയിച്ചു; നിമിഷ നേരം കൊണ്ട് ഒംപുന്ദ്ജ മണ്ഡലത്തിൽ നിന്ന് വാർത്ത പരന്നു; ഇത് കേട്ടതോടെ ചിലർക്ക് കൗതുകവും ആവേശവും; ലോക ചരിത്രത്തെ തന്നെ രണ്ടായി കീറിയ നാസി ഏകാധിപതിയുടെ പേരുള്ള ആ നേതാവിനെ കണ്ട് ആളുകൾക്ക് അമ്പരപ്പ്; കൂടെ ഒരു പ്രഖ്യാപനവും
കാൻബറ: വംശഹത്യയിലൂടെ ലോക ചരിത്രത്തിലെ ഇരുണ്ട അധ്യായം കുറിച്ച ജർമ്മൻ ഏകാധിപതിയുടെ പേര് വഹിക്കുന്ന നമിബിയൻ പ്രാദേശിക രാഷ്ട്രീയ നേതാവ് വീണ്ടും തിരഞ്ഞെടുപ്പിൽ വിജയിച്ച് ആഗോള മാധ്യമശ്രദ്ധ ആകർഷിച്ചിരിക്കുകയാണ്. തെക്ക്-പടിഞ്ഞാറൻ ആഫ്രിക്കൻ രാജ്യമായ നമിബിയയിലെ ഒംപുന്ദ്ജ മണ്ഡലത്തിൽ നിന്നുള്ള കൗൺസിലർ 'അഡോൾഫ് ഹിറ്റ്‌ലർ ഊനോണ' ആണ് അഞ്ചാം തവണയും വൻ ഭൂരിപക്ഷത്തോടെ വിജയം നേടിയത്.
ഈ തിരഞ്ഞെടുപ്പ് വിജയത്തിന് പിന്നാലെ, തന്റെ പേരിനെച്ചൊല്ലിയുള്ള ആഗോള വിവാദങ്ങൾ പൂർണ്ണമായും അവസാനിപ്പിക്കാൻ ഒരുങ്ങുകയാണ് 59-കാരനായ ഊനോണ. പേരിന്റെ 'ഹിറ്റ്‌ലർ' എന്ന ഭാഗം ഔദ്യോഗികമായി ഉപേക്ഷിക്കുമെന്നും ഇനിമുതൽ അഡോൾഫ് ഊനോണ എന്ന പേരിൽ അറിയപ്പെടാനാണ് ആഗ്രഹിക്കുന്നതെന്നും അദ്ദേഹം പ്രഖ്യാപിച്ചു.
അഞ്ചാം തവണയും വിജയം
ഭരണകക്ഷിയായ സ്വാപോ (SWAPO - South West Africa People's Organization) പാർട്ടിയുടെ മുതിർന്ന നേതാവാണ് അഡോൾഫ് ഊനോണ. 2004 മുതൽ ഈ മണ്ഡലത്തെ പ്രതിനിധീകരിക്കുന്ന അദ്ദേഹം, കഴിഞ്ഞ 20 വർഷത്തിലേറെയായി ജനങ്ങൾക്കിടയിൽ പ്രവർത്തിക്കുന്ന ജനപ്രിയനായ നേതാവാണ്. അടുത്തിടെ നടന്ന തിരഞ്ഞെടുപ്പിലും അദ്ദേഹം വിജയം ഉറപ്പിച്ചു. 2020-ലെ തിരഞ്ഞെടുപ്പിൽ 85% വോട്ടുകൾ നേടിയാണ് ഊനോണ തന്റെ വിജയം നേടിയത്.
നാമിബിയയുടെ സ്വാതന്ത്ര്യ പ്രസ്ഥാനത്തിൽ നിന്ന് ഉയർന്നുവന്ന സ്വാപോ പാർട്ടി ദശാബ്ദങ്ങളായി രാജ്യത്ത് അധികാരത്തിലിരിക്കുന്ന ഒരു ഇടതുപക്ഷ പാർട്ടിയാണ്. വർണ്ണവിവേചന വിരുദ്ധ പോരാട്ടങ്ങളിലൂടെയും പ്രാദേശിക വികസന പ്രവർത്തനങ്ങളിലൂടെയും ഊനോണ തന്റെ മണ്ഡലത്തിൽ ജനപിന്തുണ നേടി. അദ്ദേഹത്തിൻ്റെ രാഷ്ട്രീയ ജീവിതത്തെ വിലയിരുത്തുന്നവർ പേരല്ല, മറിച്ച് പ്രാദേശികമായ അദ്ദേഹത്തിൻ്റെ ഇടപെടലുകളാണ് ഈ തുടർച്ചയായ വിജയത്തിന് പിന്നിലെന്ന് ചൂണ്ടിക്കാട്ടുന്നു.
പേരിന് പിന്നിലെ ചരിത്രം
ജർമ്മൻ കോളനിയായിരുന്ന നമിബിയയിൽ (1884 മുതൽ 1915 വരെ ജർമ്മൻ സൗത്ത്-വെസ്റ്റ് ആഫ്രിക്ക) ജർമ്മൻ പേരുകൾ ഇപ്പോഴും സാധാരണമാണ്. എന്നാൽ, ലോകം കണ്ട ഏറ്റവും ക്രൂരനായ ഏകാധിപതിയുടെ പേര് ലഭിച്ചതിൻ്റെ പശ്ചാത്തലം ഊനോണ മുൻപ് വ്യക്തമാക്കിയിരുന്നു.
"എൻ്റെ പിതാവാണ് എനിക്ക് ഹിറ്റ്‌ലർ എന്ന് പേരിട്ടത്. അഡോൾഫ് ഹിറ്റ്‌ലർ എന്ന പേര് എന്തിനെയാണ് പ്രതിനിധാനം ചെയ്യുന്നതെന്ന് അദ്ദേഹത്തിന് അറിവില്ലായിരുന്നു. കുട്ടിക്കാലത്ത് എനിക്കിത് സാധാരണ പേരായിരുന്നു," അദ്ദേഹം ഒരു ജർമ്മൻ പത്രത്തോട് പറഞ്ഞു.
"വളർന്നപ്പോഴാണ് ഈ മനുഷ്യൻ ലോകം മുഴുവൻ കീഴടക്കാൻ ശ്രമിച്ചതും ദശലക്ഷക്കണക്കിന് ആളുകളെ കൊന്നൊടുക്കിയതും ഞാൻ മനസ്സിലാക്കിയത്. ആ കാര്യങ്ങളുമായി എനിക്ക് ഒരു ബന്ധവുമില്ല. ഹിറ്റ്‌ലറുടെ സ്വഭാവമോ ലക്ഷ്യങ്ങളോ എനിക്കില്ല," ഊനോണ ശക്തമായി നിഷേധിച്ചു.
ഔദ്യോഗികമായി 'ഹിറ്റ്‌ലർ' ഒഴിവാക്കുന്നു
വർഷങ്ങളായി തൻ്റെ പേര് കാരണം അന്താരാഷ്ട്രതലത്തിൽ ശ്രദ്ധാകേന്ദ്രമാവുന്ന പശ്ചാത്തലത്തിലാണ് ഈ തിരഞ്ഞെടുപ്പ് വിജയത്തിന് പിന്നാലെ പേര് മാറ്റാനുള്ള നിർണായക തീരുമാനം അദ്ദേഹം കൈക്കൊണ്ടത്.
"എൻ്റെ പേര് അഡോൾഫ് ഹിറ്റ്‌ലർ എന്നല്ല. ഞാൻ അഡോൾഫ് ഊനോണയാണ്. കഴിഞ്ഞ കാലങ്ങളിൽ പലരും എന്നെ 'അഡോൾഫ് ഹിറ്റ്‌ലർ' എന്ന് വിളിക്കുകയും, ഞാൻ അറിയാത്ത ഒരു വ്യക്തിയുമായി എന്നെ ബന്ധപ്പെടുത്താൻ ശ്രമിക്കുകയും ചെയ്തിട്ടുണ്ട്," ഊനോണ നമിബിയൻ മാധ്യമങ്ങളോട് പറഞ്ഞു. തൻ്റെ സ്വഭാവവുമായോ ലക്ഷ്യങ്ങളുമായോ യാതൊരു സാമ്യവുമില്ലാത്ത ഈ പേര് ഔദ്യോഗിക രേഖകളിൽ നിന്ന് നീക്കം ചെയ്യാനുള്ള നടപടികൾ സ്വീകരിച്ചതായും അദ്ദേഹം അറിയിച്ചു. പൊതുരംഗത്ത് എല്ലായ്പ്പോഴും 'ഹിറ്റ്‌ലർ' എന്ന ഭാഗം ഒഴിവാക്കിയാണ് താൻ സംസാരിക്കാറെന്നും അദ്ദേഹം കൂട്ടിച്ചേർത്തു.
പേരിനെക്കുറിച്ചുള്ള വിവാദങ്ങൾക്കപ്പുറം തൻ്റെ മണ്ഡലത്തിലെ ജനങ്ങൾ തന്നിൽ അർപ്പിച്ച വിശ്വാസത്തിന് ഊനോണ നന്ദി അറിയിച്ചു. പ്രാദേശിക ഭരണത്തിൽ ശ്രദ്ധ കേന്ദ്രീകരിച്ച് ജനങ്ങൾക്ക് വേണ്ടി പ്രവർത്തിക്കാനാണ് തൻ്റെ ഇപ്പോഴത്തെ ലക്ഷ്യമെന്നും അദ്ദേഹം വ്യക്തമാക്കി.
