കിം ജോങ് ഉന്‍ കളിക്കുന്നത് 'തീക്കളികള്‍'! ലോകരാജ്യങ്ങളുടെ തലയ്ക്ക് മുകളില്‍ 'ആണവ ഫാക്ടറി' തുറന്നു; അമേരിക്കയുടെ നെഞ്ചിലേക്ക് മിസൈലയക്കാന്‍ 'ഹ്വാസോങ്-20' റെഡി; ആണവപോര്‍മുനകള്‍ ഈ വര്‍ഷം 150 ല്‍ അധികമാകും; റഷ്യന്‍ സഹായത്തില്‍ കിമ്മിന്റെ ഭ്രാന്തന്‍ തന്ത്രങ്ങള്‍! നയതന്ത്രം പരാജയപ്പെട്ടാല്‍ ഉത്തര കൊറിയ ഗുരുതര ആണവഭീഷണി
കിം ജോങ് ഉന്‍ കളിക്കുന്നത് 'തീക്കളികള്‍'!
പ്യോങ്യാങ് (ഉത്തര കൊറിയ): നാടന്‍ ബോംബുകള്‍ മലയിടുക്കുകളില്‍ ഒളിപ്പിച്ചുവച്ച ഒരുഒറ്റപ്പെട്ട രാഷ്ട്രമായി ഉത്തര കൊറിയയെ എഴുതി തള്ളിയിരുന്നവര്‍ക്ക് ഇനി തിരുത്താം. ഉത്തര കൊറിയ അതിവേഗം ഒരു സമ്പൂര്‍ണ്ണ ആണവ ഫാക്ടറിയായി മാറുകയാണ്. കിം ജോങ് ഉന്നിന്റെ ഭരണത്തിന്‍ കീഴില്‍, പുതിയ ആണവ പോര്‍മുനകള്‍ക്കായി ഇന്ധനം ഉത്പാദിപ്പിക്കുകയും ലോകത്ത് എവിടെയും എത്താന്‍ ശേഷിയുള്ള മിസൈലുകള്‍ പരീക്ഷിക്കുകയും ചെയ്യുന്ന ഭീകര ശക്തിയായി ഉത്തര കൊറിയ മാറിയിരിക്കുന്നു. യുഎസ് മാധ്യമങ്ങളുടെ റിപ്പോര്‍ട്ടുകളും ഉപഗ്രഹ ചിത്രങ്ങളും ആശങ്ക വര്‍ദ്ധിപ്പിക്കുകയാണ്.
യോങ്ബ്യോണ്‍: 24 മണിക്കൂറും പ്രവര്‍ത്തിക്കുന്ന ആണവ നിര്‍മ്മാണശാല
ഉത്തര കൊറിയയുടെ ആണവ സംവിധാനത്തിന്റെ ഹൃദയമായ യോങ്ബ്യോണ്‍ ആണവ സമുച്ചയം ഇപ്പോള്‍ ഒരൊറ്റ ആണവ നിര്‍മ്മാണ ശാലയായി മാറിയിരിക്കുന്നു. ഉപഗ്രഹ ചിത്രങ്ങള്‍ നല്‍കുന്ന വിവരങ്ങള്‍ ഞെട്ടിക്കുന്നതാണ്: സമുച്ചയത്തിന്റെ പരിസരം പുതിയ കെട്ടിടങ്ങള്‍, കോണ്‍ക്രീറ്റ് നിര്‍മ്മാണങ്ങള്‍, ആവി ഉയരുന്ന റിയാക്ടറുകള്‍, കൂടുന്ന ആണവ മാലിന്യം എന്നിവയാല്‍ നിറഞ്ഞിരിക്കുന്നു.
2025 'നിര്‍ണായക വര്‍ഷ'മാണെന്നും ആണവശക്തി വര്‍ദ്ധിപ്പിക്കണമെന്ന് കിം ജോങ് ഉന്‍ ശാസ്ത്രജ്ഞരോട് ആഹ്വാനം ചെയ്തിരുന്നു. ഇതിന്റെ ഭാഗമായാണ് യോങ്ബ്യോണില്‍ 24 മണിക്കൂറും പ്രവര്‍ത്തിക്കുന്നത്.
റേഡിയോ കെമിക്കല്‍ ലബോറട്ടറിക്ക് വടക്കുകിഴക്കായി ഒരു പുതിയ യുറേനിയം സമ്പുഷ്ടീകരണ കേന്ദ്രം അതിവേഗം ഉയര്‍ന്നിട്ടുണ്ട്. യുറേനിയം സമ്പുഷ്ടീകരിക്കുന്ന സെന്‍ട്രിഫ്യൂജുകള്‍ പുറന്തള്ളുന്ന താപം നിയന്ത്രിക്കുന്നതിനുള്ള ഉപകരണങ്ങള്‍ പുറംഭിത്തികളില്‍ സ്ഥാപിച്ചിരിക്കുന്നത് ഇത് ഒരു ആധുനിക സമ്പുഷ്ടീകരണ പ്ലാന്റാണ് എന്നതിന്റെ സൂചനയാണ്.
ഏറ്റവും പുതിയ ഭീഷണി: 'ഹ്വാസോങ്-20'
കിം ജോങ് ഉന്‍ കഴിഞ്ഞ മാസം അനാവരണം ചെയ്ത 'ഏറ്റവും ശക്തമായ ആണവ ആയുധം' എന്ന് ഭരണകൂടം വിശേഷിപ്പിച്ച മിസൈല്‍ ആണ് ഹ്വാസോങ്-20. ഈ മിസൈലിന് യുഎസിലെ ഏത് ഭാഗത്തും എത്താന്‍ കഴിയും എന്നാണ് റിപ്പോര്‍ട്ടുകള്‍. ഹ്വാസോങ്-14, ഹ്വാസോങ്-15 പോലുള്ള ഭൂഖണ്ഡാന്തര മിസൈലുകള്‍ക്ക് (ICBMs) പുറമേ, ഖര ഇന്ധനം ഉപയോഗിക്കുന്ന ഹ്വാസോങ്-18 പോലുള്ള മിസൈലുകളും ഉത്തര കൊറിയ നിര്‍മ്മിച്ചു കഴിഞ്ഞു. ഖര ഇന്ധനം ഉപയോഗിക്കുന്ന മിസൈലുകള്‍ കുറഞ്ഞ സമയത്തിനുള്ളില്‍ വിക്ഷേപിക്കാന്‍ കഴിയുന്നതിനാല്‍ ഇവ കണ്ടെത്താനും പ്രതിരോധിക്കാനും പ്രയാസമാണ്.
കിം ജോങ് ഉന്റെ തന്ത്രം
കിം ജോങ് ഉന്നിനെയും ഉത്തര കൊറിയയെയും 'യുക്തിരഹിതര്‍' എന്ന് ലേബല്‍ ചെയ്യുന്നത് 'അപകടകരമായ തെറ്റിദ്ധാരണയാണ്' എന്ന് ഓക്സ്ഫോര്‍ഡ് യൂണിവേഴ്സിറ്റിയിലെ വിദഗ്ദ്ധന്‍ ഡോ. എഡ്വേര്‍ഡ് ഹോവല്‍ അഭിപ്രായപ്പെട്ടു. 'കിം ജോങ് ഉന്‍ യുക്തിരഹിതനോ ഭ്രാന്തനോ അല്ല. നേരെമറിച്ച്, തന്റെ 'അമൂല്യമായ വാളായ' ആണവായുധങ്ങള്‍ ഉപേക്ഷിക്കാതെ തന്നെ അന്താരാഷ്ട്ര സമൂഹത്തില്‍ നിന്ന് പ്രതിഫലം നേടുക എന്നതാണ് അദ്ദേഹത്തിന്റെ വ്യക്തമായ തന്ത്രം.'
തന്റെ ആയുധശേഖരം ആരും എടുത്തുകളയാന്‍ ധൈര്യപ്പെടില്ലെന്ന കിമ്മിന്റെ വര്‍ധിച്ചുവരുന്ന ആത്മവിശ്വാസം, യാതൊരു നിയന്ത്രണവുമില്ലാതെ ആണവ വികസനം തുടരാന്‍ അദ്ദേഹത്തിന് അവസരം നല്‍കുന്നു.
വിദഗ്ദ്ധരുടെ കണക്കനുസരിച്ച് ഉത്തര കൊറിയയുടെ ആണവശേഖരം അതിവേഗം വര്‍ധിക്കുകയാണ്. ഈ വര്‍ഷം ആദ്യം ഉത്തര കൊറിയക്ക് ഏകദേശം 50 ഓളം പോര്‍മുനകള്‍ ഉണ്ടായിരുന്നു. നിലവിലെ നിരക്കില്‍ പോയാല്‍ ഏതാനും വര്‍ഷങ്ങള്‍ക്കുള്ളില്‍ ഇത് 150-ല്‍ അധികമായി ഉയരാനും 2030-ഓടെ ചെറിയ ശീതയുദ്ധ ആണവശക്തികളുടെ നിലയിലേക്ക് (നൂറുകണക്കിന് പോര്‍മുനകള്‍) എത്താനും സാധ്യതയുണ്ട്.
ചെറിയ അളവില്‍ ട്രിറ്റിയം ഉപയോഗിച്ച് കൂടുതല്‍ ശക്തമായ സ്ഫോടനങ്ങള്‍ സൃഷ്ടിക്കാന്‍ കഴിയുന്ന ബൂസ്റ്റഡ് ഫിഷന്‍ ആയുധങ്ങളിലേക്കും കൂടുതല്‍ മിസൈലുകളില്‍ ഘടിപ്പിക്കാന്‍ കഴിയുന്ന ചെറിയ പോര്‍മുനകളിലേക്കും ഉത്തര കൊറിയ നീങ്ങുന്നതായും റിപ്പോര്‍ട്ടുകളുണ്ട്.
