ഇഡിയുടെ കുറ്റപത്രത്തില്‍ വിധി ഡസംബര്‍ 16ന് വരുമെന്ന് പ്രതീക്ഷ; ആഴ്ചകള്‍ക്ക് മുമ്പ് കേന്ദ്ര ഏജന്‍സിയുടെ ശുപാര്‍ശയില്‍ ക്രിമിനല്‍ ഗൂഡാലോചനാ കേസ് എടുത്ത് ഡല്‍ഹി പോലീസ്; രാഹുലിനേയും സോണിയയേയും വെട്ടിലാക്കാന്‍ കേന്ദ്ര ഏജന്‍സികളുടെ നീക്കം തകൃതി; നാഷനല്‍ ഹെറാള്‍ഡ് കള്ളപ്പണ കേസില്‍ ഇനി എന്തും സംഭവിക്കാം
ന്യൂഡല്‍ഹി: നാഷനല്‍ ഹെറാള്‍ഡ് കള്ളപ്പണം വെളുപ്പിക്കല്‍ കേസില്‍ ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിക്കും സോണിയാ ഗാന്ധിക്കും എതിരെ കടുത്ത നടപടികളിലേക്ക് കേന്ദ്ര ഏജന്‍സികള്‍. ഇരുവര്‍ക്കും എതിരെ ക്രിമിനല്‍ ഗൂഢാലോചന കുറ്റം ചുമത്തി. ഇ.ഡിയുടെ പരാതിയുടെ അടിസ്ഥാനത്തിലാണ് ഡല്‍ഹി പൊലീസ് കേസെടുത്തത്. കേസില്‍ ഇവരെ അറസ്റ്റു ചെയ്യുമോ എന്നതാണ് ഉയരുന്ന ചോദ്യം.
നാഷണല്‍ ഹെറാള്‍ഡ് കേസില്‍ ഇ ഡി സമര്‍പ്പിച്ച കുറ്റപത്രത്തില്‍ വിധി പറയുന്നത് ഡിസംബര്‍ 16-ലേക്ക് മാറ്റിയിരുന്നു. ഡല്‍ഹി റൗസ് അവന്യൂ കോടതിയാണ് വിധി പറയുക. കളളപ്പണം വെളുപ്പിക്കല്‍ നിരോധന നിയമപ്രകാരമാണ് ഇ ഡി കുറ്റപത്രം സമര്‍പ്പിച്ചത്. ഇതിനിടെയാണ് പുതിയ കേസ്. ഡല്‍ഹി പൊലീസിന്റെ സാമ്പത്തിക കുറ്റകൃത്യ വിഭാഗമാണ് ഇരുവര്‍ക്കും എതിരെ എഫ്‌ഐആര്‍ റജിസ്റ്റര്‍ ചെയ്തത്. സാം പിത്രോദയും കേസില്‍ പ്രതിയാണ്. സോണിയ ഗാന്ധി കേസിലെ ഒന്നാം പ്രതിയും രാഹുല്‍ ഗാന്ധി രണ്ടാം പ്രതിയുമാണ്. നാഷനല്‍ ഹെറാള്‍ഡ് കേസില്‍ വിധി പറയുന്നത് ഡല്‍ഹി കോടതി ഡിസംബര്‍ 16ലേക്ക് മാറ്റിവച്ചതിനു പിന്നാലെയാണ് പുതിയ എഫ്‌ഐആര്‍ വിവരങ്ങള്‍ പുറത്തുവന്നത്. ഒക്ടോബര്‍ മൂന്നിനാണ് എഫ്‌ഐആര്‍ റജിസ്റ്റര്‍ ചെയ്തത്. പ്രിവന്‍ഷന്‍ ഓഫ് മണി ലോണ്ടറിങ് ആക്ട് സെക്ഷന്‍ 66(2) പ്രകാരം, ഏതൊരു ഏജന്‍സിയോടും ഒരു ഷെഡ്യൂള്‍ഡ് കുറ്റകൃത്യം റജിസ്റ്റര്‍ ചെയ്യാനും അന്വേഷിക്കാനും ആവശ്യപ്പെടാന്‍ ഇ.ഡിക്ക് അധികാരമുണ്ട്.
നാഷനല്‍ ഹെറാള്‍ഡ് പത്രത്തിന്റെ മാതൃ കമ്പനിയായ അസോസിയേറ്റഡ് ജേണല്‍സ് ലിമിറ്റഡിനെ വഞ്ചനയിലൂടെ കൈക്കലാക്കാന്‍ ക്രിമിനല്‍ ഗൂഢാലോചന നടത്തിയെന്നാണ് എഫ്‌ഐആറില്‍ പറയുന്നത്. കൊല്‍ക്കത്ത ആസ്ഥാനമായുള്ള ഷെല്‍ കമ്പനിയായ ഡോട്ടെക്സ് മര്‍ച്ചന്റൈസ്, രണ്ട് കോണ്‍ഗ്രസ് നേതാക്കള്‍ക്ക് 76 ശതമാനം ഓഹരിയുള്ള ലാഭേച്ഛയില്ലാതെ പ്രവര്‍ത്തിക്കുന്ന കമ്പനിയായ യങ് ഇന്ത്യന്‍ എന്ന സ്ഥാപനത്തിന് ഒരു കോടി രൂപ നല്‍കിയതായി ആരോപിക്കപ്പെടുന്നു. ഈ ഇടപാടിലൂടെ യങ് ഇന്ത്യന്‍, കോണ്‍ഗ്രസിനു 50 ലക്ഷം രൂപ നല്‍കുകയും ഏകദേശം 2,000 കോടി രൂപയുടെ ആസ്തിയുള്ള അസോസിയേറ്റഡ് ജേണല്‍സ് ലിമിറ്റഡിന്റെ നിയന്ത്രണം നേടുകയും ചെയ്തുവെന്നാണ് ആരോപണം. ഇഡി കേസിലെ വിധി രാഹുലിനും സോണിയയ്ക്കും എതിരായാല്‍ കടുത്ത നടപടികളിലേക്ക് ഡല്‍ഹി പോലീസ് കടക്കും. ഇതിന് വേണ്ടിയാണ് പുതിയ കേസെടുക്കുന്നത്.
ഇപ്പോള്‍ പ്രവര്‍ത്തനരഹിതമായ നാഷണല്‍ ഹെറാള്‍ഡ് പത്രത്തിന്റെ ഉടമസ്ഥരായ അസോസിയേറ്റഡ് ജേര്‍ണല്‍സിന്റെ കോടികള്‍ വില വരുന്ന ആസ്തി സോണിയയും രാഹുലും ഡയറക്ടര്‍മാരായ യംഗ് ഇന്ത്യന്‍ എന്ന കമ്പനി തട്ടിയെടുത്തുവെന്ന ബിജെപി നേതാവ് സുബ്രഹ്‌മണ്യന്‍ സ്വാമിയുടെ പരാതിയിലാണ് ഇഡി കേസെടുത്തത്. നാഷണല്‍ ഹെറാള്‍ഡ് ദിനപത്രത്തിന്റെ നടത്തിപ്പ് കമ്പനിയായിരുന്ന അസോസിയേറ്റഡ് ജേണല്‍സ് ലിമിറ്റഡ്, ഇന്ത്യന്‍ നാഷണല്‍ കോണ്‍ഗ്രസില്‍ നിന്ന് 90 കോടി രൂപ പലിശയില്ലാ വായ്പ എടുത്തിരുന്നു. ഈ തുക തിരിച്ചടയ്ക്കാതെ വന്നപ്പോള്‍ 2010ല്‍ അഞ്ചു ലക്ഷം രൂപ മൂലധനവുമായി രൂപീകരിച്ച യംഗ് ഇന്ത്യന്‍ എന്ന കമ്പനി 5000 കോടിയുടെ സ്വത്തുള്ള അസോസിയേറ്റഡ് ജേണല്‍സ് കമ്പനിയെ കൈവശപ്പെടുത്തിയെന്നാണ് ആരോപണം.
സോണിയ, രാഹുല്‍, മല്ലികാര്‍ജുന്‍ ഖാര്‍ഗെ, സാം പിട്രോഡ തുടങ്ങിയവരാണ് യംഗ് ഇന്ത്യന്‍ കമ്പനിയുടെ ഡയറക്ടര്‍മാര്‍. സോണിയാ ഗാന്ധിയും രാഹുല്‍ ഗാന്ധിയും കൂട്ടാളികളും ചേര്‍ന്ന്, കോടിക്കണക്കിനു രൂപയുടെ സ്വത്തുള്ള എ.ജെ.എല്‍ എന്ന കമ്പനിയെ യംഗ് ഇന്ത്യ എന്നൊരു കമ്പനി രൂപീകരിച്ച് തട്ടിയെടുത്തുവെന്നാണ് പരാതിക്കാരന്‍ ആരോപിക്കുന്നത്.
