ബലാത്സംഗ കേസില് രാഹുല് മാങ്കൂട്ടത്തിലിന് മുന്കൂര് ജാമ്യമില്ല; അറസ്റ്റിന് തടസ്സമില്ലെന്ന് കോടതി; ബലാത്സംഗവും ഗര്ഭഛിദ്രവും നടന്നുവെന്നു സ്ഥാപിക്കുന്ന ഡോക്ടറുടെ മൊഴി നിര്ണായകമായി; പാലക്കാട് എംഎല്എ കീഴടങ്ങും? പാര്ട്ടിയില്നിന്നും പുറത്താക്കി കോണ്ഗ്രസ് നേതൃത്വം
തിരുവനന്തപുരം: യുവതിയെ ബലാത്സംഗം ചെയ്യുകയും ഭീഷണിപ്പെടുത്തി ഗര്ഭഛിദ്രം നടത്തുകയും ചെയ്തെന്ന കേസില് രാഹുല് മാങ്കൂട്ടത്തിലിന് മുന്കൂര് ജാമ്യമില്ല. ജില്ലാ പ്രിന്സിപ്പല് സെഷന്സ് കോടതിയാണ് മുന്കൂര് ജാമ്യാപേക്ഷ തള്ളിയത്. പ്രിന്സിപ്പല് സെഷന്സ് കോടതി ജഡ്ജി എസ്.നസീറയാണ് കേസ് പരിഗണിച്ചത്. രാഹുലിനെതിരെ പ്രോസിക്യൂഷന് പുതുതായി സമര്പ്പിച്ച തെളിവുകളും കോടതി ഇന്നു പരിശോധിച്ചിരുന്നു. രാഹുലിന്റെ ആവശ്യപ്രകാരം, കഴിഞ്ഞദിവസം അടച്ചിട്ട മുറിയില് ഒന്നരമണിക്കൂറോളം മുന്കൂര് ജാമ്യാപേക്ഷയില് വാദം നടന്നിരുന്നു. തുടര്ന്ന് തുടര്വാദം കേള്ക്കാന് വ്യാഴാഴ്ചത്തേക്ക് മാറ്റിവെക്കുകയായിരുന്നു. ഇന്ന് തുടര്വാദം കേട്ട കോടതി മുന്കൂര് ജാമ്യാപേക്ഷ തള്ളുകയായിരുന്നു.
രാഹുലിനെതിരെ പുതുതായി റജിസ്റ്റര് ചെയ്ത ബലാത്സംഗ കേസിന്റെ എഫ്ഐആറും പ്രോസിക്യൂഷന് കോടതിയില് ഹാജരാക്കിയിരുന്നു. രാഹുല് സ്ഥിരമായി ഇത്തരം കുറ്റകൃത്യം ചെയ്യുന്ന ആളാണെന്നും ജാമ്യം നല്കുന്നത് കേസിന്റെ തുടര്നടപടികളെ ബാധിക്കുമെന്നും പ്രോസിക്യൂഷന് വാദിച്ചു. ഇന്ന് തുടര്വാദത്തിന് മുന്നോടിയായി പ്രോസിക്യൂഷന് രാഹുലിനെതിരേ കൂടുതല് തെളിവുകള് ഹാജരാക്കി. യുവതിയുമായുള്ള ചാറ്റിന്റെ പൂര്ണ്ണ രൂപമടക്കം പ്രോസിക്യൂഷന് കോടതിയി. സമര്പ്പിച്ചതായാണ് വിവരം. അതിജീവിതയുടെ ചാറ്റുകളും വിവാഹ ഫോട്ടോയും അടക്കമാണ് പ്രതിഭാഗം കോടതിക്ക് മുമ്പാകെ ഹാജരാക്കിയത്. അതിജീവിതയെ ഗര്ഭച്ഛിദ്രത്തിന് സമ്മര്ദംചെലുത്തുന്ന വാട്സാപ്പ് ചാറ്റുകളെയിരുന്നു പ്രോസിക്യൂഷന് കൂടുതലായും ആശ്രയിച്ചത്. കോടതി അനുമതിയോടെ പിന്നീട് കൂടുതല് വാട്സാപ്പ് ചാറ്റുകള് കോടതിയില് ഹാജരാക്കുകയും ചെയ്തു. പ്രതിഭാഗത്തിന്റെ വാദം ആദ്യം കോടതി കേട്ടു. ശേഷം പ്രോസിക്യൂഷന് ഹാജരാക്കിയ പുതിയ തെളിവുകള് കോടതി പരിശോധിച്ചു. തുടര്ന്ന് വിധി പുറപ്പെടുവിക്കുകയായിരുന്നു.
ബലാത്സംഗവും ഗര്ഭഛിദ്രവും നടന്നുവെന്നു സ്ഥാപിക്കുന്നതിനു ഡോക്ടറുടെ മൊഴി സഹിതമുള്ള രേഖ പ്രോസിക്യൂഷന് കോടതിയില് ഹാജരാക്കി. നിസഹായയായ സ്ത്രീ കുടുംബപ്രശ്നം പറയാന് സമീപിച്ചപ്പോള് ഭീഷണിപ്പെടുത്തി നഗ്നദൃശ്യം പകര്ത്തിയശേഷം ബലാത്സംഗം ചെയ്യുകയും ഭീഷണിപ്പെടുത്തി ഗര്ഭഛിദ്രം നടത്തുകയും ചെയ്തെന്ന ആരോപണമാണ് രാഹുലിനെതിരെയുള്ളത്. ഗുരുതരമായ കുറ്റകൃത്യം നടന്നുവെന്നു ചൂണ്ടിക്കാട്ടുന്ന പൊലീസ് റിപ്പോര്ട്ടാണ് കോടതിയില് നല്കിയത്. നിര്ബന്ധിച്ച് ഗര്ഭഛിദ്രം നടത്തിയതിനു തെളിവുണ്ടെന്നും പൊലീസ് അറിയിച്ചു. ഇതു സംബന്ധിച്ച രേഖകള് ആണ് ഇന്ന് കോടതിയില് നല്കിയത്. യുവതിയുടെ കേസില് ഉഭയസമ്മതപ്രകാരമായിരുന്നു ശാരീരികബന്ധം എന്ന രാഹുലിന്റെ വാദം ഖണ്ഡിക്കാനാണ് വിവാഹവാഗ്ദാനം നല്കി 23കാരിയെ പീഡിപ്പിച്ചുവെന്ന കേസിലെ എഫ്ഐആര് കൂടി പ്രോസിക്യൂഷന് ഹാജരാക്കിയത്. പരാതിക്കാരിയായ യുവതിയുടെ വീട്ടിലെത്തി രാഹുല് ആത്മഹത്യാ ഭീഷണി മുഴക്കിയിരുന്നതായി പ്രോസിക്യൂഷന് കോടതിയെ അറിയിച്ചിരുന്നു. ഗര്ഭഛിദ്രത്തിനു സമ്മര്ദം ചെലുത്തിയായിരുന്നു ഭീഷണിയെന്നും ഫ്ളാറ്റില്നിന്നു ചാടുമെന്നു പറഞ്ഞുവെന്നുമാണ് പ്രോസിക്യൂഷന് വ്യക്തമാക്കുന്നത്.
അതേസമയം, രണ്ടാമത്തെ കേസും കെട്ടിച്ചമച്ചതാണെന്ന് പ്രതിഭാഗം കോടതിയില് ആരോപിച്ചു. കഴിഞ്ഞ ദിവസം ആരോ മെയിലില് അയച്ച പരാതിയുടെ അടിസ്ഥാനത്തില് തട്ടിക്കൂട്ടിയതാണ് പുതിയ കേസ് എന്നായിരുന്നു പ്രതിഭാഗം പറഞ്ഞത്. യുവതിയുമായി ഉഭയസമ്മതപ്രകാരമുള്ള ശാരീരിക ബന്ധമാണുണ്ടായതെന്നും യുവതിയുടെ ഇഷ്ടപ്രകാരമാണു ഗര്ഭഛിദ്രം നടത്തിയതെന്നുമാണ് പ്രതിഭാഗത്തിന്റെ നിലപാട്. ഫോണ് വിളികളും ചാറ്റുകളും റെക്കോര്ഡ് ചെയ്തും സ്ക്രീന് ഷോട്ടെടുത്തും സൂക്ഷിച്ചത് ഗൂഢോദ്ദേശ്യത്തോടെയാണെന്നും പരാതി നല്കാന് യുവതിക്ക് തൊഴില് സ്ഥാപനത്തില്നിന്നു സമ്മര്ദമുണ്ടായെന്നും സിപിഎം-ബിജെപി ഗൂഢാലോചനയാണു പരാതിക്കു പിന്നിലെന്നും പ്രതിഭാഗം വാദിച്ചു.
രാഹുല് മാങ്കൂട്ടത്തില് കീഴടങ്ങും
ഒളിവില് കഴിയുന്ന രാഹുല് മാങ്കൂട്ടത്തില് എം.എല്.എ. ഹൊസ്ദുര്ഗ് കോടതിയില് കീഴടങ്ങും എന്ന് സൂചന. ഇദ്ദേഹം സുള്ള്യയില് എത്തിയതായും റിപോര്ട്ടുണ്ട്. കോടതി പരിസരത്തെ പോലീസ് സാന്നിധ്യം രാഹുല് കീഴടങ്ങും എന്ന സൂചനയിലേക്ക് വിരല് ചൂണ്ടുന്നു. ഇദ്ദേഹം തമിഴ്നാട്- കര്ണാടക പരിസരത്ത് ഉള്ളതായി പൊലീസിന് വിവരം ലഭിച്ചിരുന്നു. സി.സി.ടി.വി. നിരീക്ഷണത്തിനു പുറത്തുള്ള മേഖലയില് ഒരിടത്ത് ഒളിവിലുണ്ടാകും എന്നാണ് അന്വേഷണ സംഘത്തിന്റെ നിഗമനം.
