നെറ്റ്ഫ്ലിക്സിനെ മലര്ത്തിയടിക്കാന് എല്ലിസന്റെ 'പാരമൗണ്ട്' കളി തുടങ്ങി; വാര്ണര് ബ്രദേഴ്സിനെ ഏറ്റെടുക്കാന് 9 ലക്ഷം കോടിയുടെ വമ്പന് ഓഫര്; സ്ട്രീമിംഗിനേക്കാള് ബിഗ് സ്ക്രീന് സിനിമാ നിര്മ്മാണത്തിന് മുന്ഗണന നല്കുന്ന പാരമൗണ്ടിന്റെ വരവില് തിയേറ്റര് പ്രേമികള്ക്ക് സന്തോഷം; ഇടപെട്ട് ട്രംപ്; നെറ്റ്ഫ്ലിക്സിന് തിരിച്ചടിയോ?
നെറ്റ്ഫ്ലിക്സിനെ മലര്ത്തിയടിക്കാന് എല്ലിസന്റെ 'പാരമൗണ്ട്' കളി തുടങ്ങി
ന്യൂയോര്ക്ക്: ഹോളിവുഡിലെ ലോകപ്രശസ്തമായ സ്റ്റുഡിയോ വാര്ണര് ബ്രദേഴ്സിനെ ഏറ്റെടുക്കാന് ഒടിടി രംഗത്തെ ഭൂമനായ നെറ്റ്ഫ്ളിക്സുമായി കരാറിലെത്തിയത് വലിയ വാര്ത്തയായിരുന്നു. 7.5 ലക്ഷം കോടിയുടെ കരാറാണ് നെറ്റ്ഫ്ളിക്സ് മുന്നോട്ടുവച്ചത്. ഇതോടെ, തിയേറ്റര് വ്യവസായത്തിന് വലിയ തിരിച്ചടി നേരിടുമെന്ന ആശങ്ക ഉയര്ന്നിരുന്നു. അതിനിടെയാണ് തിയേറ്റര് പ്രേമികളെ കൊതിപ്പിക്കുന്ന പുതിയ വാര്ത്ത. വാര്ണര് ബ്രദേഴ്സിനായി പാരമൗണ്ടും രംഗത്ത് എത്തിയിരിക്കുന്നു. അതും നെറ്റ്ഫ്ളിക്സിനേക്കാള് വലിയ ഓഫറുമായി.
വാര്ണര് ബ്രദേഴ്സിനെ ആര് വിഴുങ്ങും?
വാര്ണര് ബ്രദേഴ്സിനെ വിഴുങ്ങുന്നത് സ്ട്രീമിംഗ് ഭീമനായ നെറ്റ്ഫ്ലിക്സോ അതോ പാരമ്പര്യ പ്രതാപികളായ പാരമൗണ്ടോ? ലോകം ഉറ്റുനോക്കുന്ന ഏറ്റവും വലിയ കുത്തക പോരാട്ടത്തിനാണ് ഹോളിവുഡ് സാക്ഷ്യം വഹിക്കുന്നത്. 83 ബില്യണ് ഡോളറിന് (ഏകദേശം 7.5 ലക്ഷം കോടി രൂപ) വാര്ണറിനെ ഏറ്റെടുക്കാന് നെറ്റ്ഫ്ലിക്സ് കരാര് ഒപ്പിട്ടതിന് തൊട്ടുപിന്നാലെ, 108 ബില്യണ് ഡോളറിന്റെ (ഏകദേശം 9 ലക്ഷം കോടി രൂപ) 'ഓള് ക്യാഷ്' ഓഫറുമായി ഡേവിഡ് എല്ലിസന്റെ പാരമൗണ്ട് രംഗത്തെത്തിയിരിക്കുകയാണ്.
നെറ്റ്ഫ്ലിക്സിന്റെ 'സ്റ്റോക്ക്' കളിക്ക് പാരമൗണ്ടിന്റെ 'ക്യാഷ്' മറുപടി
വാര്ണര് ബ്രദേഴ്സിന്റെ സ്റ്റുഡിയോകളും എച്ച്.ബി.ഒ (HBO) ഉള്പ്പെടെയുള്ള ചാനലുകളും സ്വന്തമാക്കി ഹോളിവുഡ് അടക്കിഭരിക്കാനായിരുന്നു നെറ്റ്ഫ്ലിക്സിന്റെ നീക്കം. പണവും ഓഹരികളും ചേര്ന്നതായിരുന്നു നെറ്റ്ഫ്ലിക്സ് കോ-സി.ഇ.ഒ ടെഡ് സരന്ഡോസ് മുന്നോട്ടുവെച്ച ഓഫര്. എന്നാല് ഓഹരി ഉടമകളെ പ്രലോഭിപ്പിക്കാന് മുഴുവന് പണവുമായി പാരമൗണ്ട് എത്തിയതോടെ നെറ്റ്ഫ്ലിക്സ് പ്രതിരോധത്തിലായി. ജനുവരി 8 വരെയാണ് പാരമൗണ്ട് നല്കിയിരിക്കുന്ന കാലാവധി.
സി.എന്.എന് ഇനി എല്ലിസന്റെ കയ്യിലേക്കോ?
നെറ്റ്ഫ്ലിക്സിന്റെ കരാറില് സി.എന്.എന് (CNN) ഉള്പ്പെട്ടിരുന്നില്ല. എന്നാല് വാര്ണര് ബ്രദേഴ്സ് ഡിസ്കവറിയെ പൂര്ണ്ണമായും വിഴുങ്ങാനാണ് പാരമൗണ്ട് സി.ഇ.ഒ ഡേവിഡ് എല്ലിസണ് ലക്ഷ്യമിടുന്നത്. ഇതിന് പിന്നില് ഡേവിഡിന്റെ പിതാവും ഒറാക്കിള് സ്ഥാപകനുമായ ശതകോടീശ്വരന് ലാറി എല്ലിസന്റെ ബുദ്ധിയുണ്ടെന്നാണ് റിപ്പോര്ട്ട്. സി.എന്.എന് ഏറ്റെടുത്താല് അവിടുത്തെ മുന്നിര അവതാരകരെ പുറത്താക്കാനും പ്രോഗ്രാമുകളില് വിപ്ലവകരമായ മാറ്റങ്ങള് വരുത്താനും ലാറിക്ക് പദ്ധതിയുണ്ട്.
ഇടപെട്ട് ട്രംപ്; നെറ്റ്ഫ്ലിക്സിന് തിരിച്ചടിയോ?
നെറ്റ്ഫ്ലിക്സ് സി.ഇ.ഒ സരന്ഡോസുമായി വൈറ്റ് ഹൗസില് ചര്ച്ച നടത്തിയ പ്രസിഡന്റ് ഡൊണാള്ഡ് ട്രംപ് ഈ കരാറില് ആശങ്ക പ്രകടിപ്പിച്ചു കഴിഞ്ഞു. കുത്തകവല്ക്കരണം (Antitrust) തടയേണ്ടതുണ്ടെന്നും വിപണി വിഹിതം കൂടുതലാണെന്നും ട്രംപ് നിരീക്ഷിച്ചു. ഏറ്റവും ഉയര്ന്ന തുക നല്കുന്നവര്ക്ക് വാര്ണറിനെ നല്കണമെന്നാണ് ട്രംപിന്റെ നിലപാട്. പാരമൗണ്ടിന്റെ ഉയര്ന്ന ഓഫര് ട്രംപിനെ തൃപ്തിപ്പെടുത്താന് സാധ്യതയുള്ളതിനാല് നെറ്റ്ഫ്ലിക്സിന് കാര്യങ്ങള് എളുപ്പമാകില്ല.
ലക്ഷ്യം തിയേറ്ററുകളുടെ പ്രതാപം
സ്ട്രീമിംഗിനേക്കാള് ബിഗ് സ്ക്രീന് സിനിമാ നിര്മ്മാണത്തിന് മുന്ഗണന നല്കാനാണ് പാരമൗണ്ട് ലക്ഷ്യമിടുന്നത്. വര്ഷത്തില് 20 വമ്പന് ചിത്രങ്ങള് തിയേറ്ററുകളില് എത്തിക്കുമെന്ന് എല്ലിസണ് പ്രഖ്യാപിച്ചു കഴിഞ്ഞു. ഹോളിവുഡിന്റെ പ്രതാപകാലം തിരികെ കൊണ്ടുവരാനാണ് തന്റെ ശ്രമമെന്നാണ് എല്ലിസണ് അവകാശപ്പെടുന്നത്.
നിര്ണ്ണായകമായ ഡിസംബര് - ജനുവരി
ഹോളിവുഡിന്റെ ഭാവിയെ തന്നെ മാറ്റിമറിക്കാന് പോകുന്ന ഈ ലയനയുദ്ധത്തില് പാരമൗണ്ടിന്റെ ഉയര്ന്ന ഓഫറിനോട് വാര്ണര് ഷെയര്ഹോള്ഡര്മാര് എങ്ങനെ പ്രതികരിക്കും എന്നതാണ് ഇനി അറിയേണ്ടത്. ട്രംപിന്റെയും ലാറി എല്ലിസന്റെയും ഇടപെടലുകള് പാരമൗണ്ടിന് അനുകൂലമായാല് നെറ്റ്ഫ്ലിക്സിന് ഹോളിവുഡിന്റെ ഈ 'കൊട്ടാരക്കെട്ട്' നഷ്ടപ്പെടും. ലോക സിനിമയില് സ്ട്രീമിംഗ് കുത്തകയാണോ അതോ തിയേറ്റര് പ്രതാപമാണോ വിജയിക്കുകയെന്ന് ജനുവരി എട്ടോടെ വ്യക്തമാകും
