കൗമാരക്കാലത്ത് തനിക്ക് ഒട്ടും ഇഷ്ടമില്ലാത്ത പ്രായക്കൂടുതലുള്ള ഒരാളോടൊപ്പം വീട്ടുകാര് കെട്ടിച്ചുവിട്ടു; പിന്നീട് അങ്ങോട്ട് ദുരിത പൂര്ണമായ ജീവിതം; ഗാര്ഹിക പീഡനത്തില് സഹികെട്ട് അരുംകൊല; ഒടുവില് ഭര്ത്താവിനെ കൊന്ന 'ബാലവധു'വിനെ തൂക്കിലേറ്റിയ ഭരണകൂടവും; ഇറാനില് ഇനിയും മരണം കാത്ത് ജയിലില് ഒരാള്
ടെഹ്റാൻ: ഇറാനിൽ ഗാർഹിക പീഡനത്തെ തുടർന്ന് ഭർത്താവിനെ കൊലപ്പെടുത്തിയ കേസിൽ 'ബാലവധു'വിനെ തൂക്കിലേറ്റി. 24 വയസ്സുള്ള റാണ ഫറാജ് ഓഗ്ലിയെയാണ് കുപ്രസിദ്ധമായ തബ്രിസ് സെൻട്രൽ ജയിലിൽ വെച്ച് വധശിക്ഷയ്ക്ക് വിധേയയാക്കിയത്. വിവാദമായ ഈ സംഭവം ഇറാനിലെ നീതിന്യായ വ്യവസ്ഥയുടെ ക്രൂരത ഒരിക്കൽ കൂടി ലോകത്തിന് മുന്നിൽ തുറന്നുകാട്ടി.
16 വയസ്സിൽ, റാണയെ രണ്ട് പതിറ്റാണ്ടോളം പ്രായക്കൂടുതലുള്ള ഒരാളെക്കൊണ്ട് നിർബന്ധിച്ച് വിവാഹം കഴിപ്പിക്കുകയായിരുന്നു. വിവാഹശേഷം വർഷങ്ങളോളം റാണ ഗാർഹിക പീഡനത്തിനും നിർബന്ധിത ജീവിതത്തിനും ഇരയായി. ഭർത്താവിനെ കൊലപ്പെടുത്തിയെന്നാരോപിച്ച് രണ്ട് വർഷം മുമ്പാണ് റാണ അറസ്റ്റിലായത്. അടിസ്ഥാനപരമായ നീതി ഉറപ്പാക്കാതെ നടത്തിയ വിചാരണക്കൊടുവിൽ വധശിക്ഷ വിധിച്ചു.
കോടതിയിൽ തനിക്ക് ഒരു അഭിഭാഷകനെ ആവശ്യമില്ലെന്ന് റാണ ഉദ്യോഗസ്ഥരോട് പറഞ്ഞു. ഒരൊറ്റ ആവശ്യം മാത്രമാണ് അവർ ഉന്നയിച്ചത്. "മരണതുല്യമായ ഈ ജീവിതത്തിൽ നിന്ന് എന്നെ മോചിപ്പിക്കണം."
ഡിസംബർ 3-നാണ് വധശിക്ഷ നടപ്പാക്കിയത്. എന്നാൽ, ഇറാനിലെ ഔദ്യോഗിക മാധ്യമങ്ങൾ റാണയുടെ മരണം സ്ഥിരീകരിച്ചിട്ടില്ല. രാജ്യത്തെ ജയിലുകൾക്കുള്ളിൽ നടക്കുന്ന വധശിക്ഷയുടെ വ്യാപ്തി മറച്ചുവെക്കാനുള്ള ശ്രമമാണിതെന്ന് മനുഷ്യാവകാശ പ്രവർത്തകർ ആരോപിക്കുന്നു.
റാണയുടെ മരണം ഈ വർഷം ഇറാനിൽ വധശിക്ഷയ്ക്ക് വിധേയരാക്കപ്പെട്ട സ്ത്രീകളുടെ എണ്ണം 57 ആയി ഉയർത്തി. രാജ്യത്ത് രേഖപ്പെടുത്തിയതിൽ വെച്ച് ഏറ്റവും ഉയർന്ന കണക്കാണിത്. 2024-ൽ ആകെ 34 സ്ത്രീകളെയാണ് തൂക്കിലേറ്റിയത്. 2007 മുതൽ ഇതുവരെ 320 സ്ത്രീകൾ വധിക്കപ്പെട്ടു. ഇതിൽ മിക്കവരും ഗാർഹിക പീഡനം, ബാലവിവാഹം, സ്വയരക്ഷ എന്നിവയുമായി ബന്ധപ്പെട്ട കൊലപാതക കേസുകളിലെ പ്രതികളാണ്.
പ്രസിഡന്റ് മസൂദ് പെസേഷ്യൻ അധികാരമേറ്റ ശേഷം വധശിക്ഷാ നിരക്ക് കുത്തനെ വർധിച്ചതായും, അദ്ദേഹത്തിൻ്റെ ഭരണകാലത്ത് ആകെ 2,600-ൽ അധികം പേരെ വധിച്ചതായും റിപ്പോർട്ടുകൾ പറയുന്നു.
റാണയുടെ വധശിക്ഷ മറ്റൊരു ബാലവധുവായ ഗോലി കുഖാൻ്റെ (25) ഭാവിയെക്കുറിച്ചുള്ള ആശങ്കകൾ കടുത്ത ദാരിദ്ര്യത്തിൽ വളർന്ന കുഖാനെ 12-ാം വയസ്സിൽ ബന്ധുവിനൊപ്പം കൂടെ നിർബന്ധിച്ച് വിവാഹം കഴിപ്പിച്ചു. 13-ാം വയസ്സിൽ അവർ ആദ്യത്തെ കുഞ്ഞിന് ജന്മം നൽകി. വർഷങ്ങളോളം പീഡനം സഹിച്ച കുഖാൻ്റെ കേസ് 2018-ൽ ആരംഭിച്ചു.
ഭർത്താവ് തങ്ങളുടെ അഞ്ചു വയസ്സുള്ള മകനെ മർദ്ദിക്കുന്നത് കണ്ട കുഖാൻ സഹായത്തിനായി സഹോദരനെ വിളിച്ചു. തുടർന്നുണ്ടായ വഴക്കിനിടെ ഭർത്താവ് മരണപ്പെട്ടു. എഴുതാനും വായിക്കാനും അറിയാത്ത കുഖാന് ചോദ്യം ചെയ്യലിൽ അഭിഭാഷകൻ്റെ സഹായം ലഭിച്ചില്ല. നഷ്ടപരിഹാരം നൽകി രക്ഷപ്പെടാൻ അവസരമുണ്ടായിരുന്നെങ്കിലും, കുഖാൻ്റെ കുടുംബത്തിന് 80,000 പൗണ്ട് ഡിസംബറിനുള്ളിൽ നൽകാൻ സാധിച്ചില്ലെങ്കിൽ തൂക്കുമരം കാത്തിരിക്കുകയാണ്. അതേസമയം, കഴിഞ്ഞ വാരാന്ത്യത്തിൽ മാത്രം രാജ്യത്തുടനീളം 24 പേരെ തൂക്കിലേറ്റിയതായും ഇറാൻ ഇൻ്റർനാഷണൽ റിപ്പോർട്ട് ചെയ്യുന്നു.
