ഹോളിവുഡ് താരവും മനുഷ്യാവകാശ പ്രവർത്തകയുമായ ആഞ്ജലീന ജോളി, തൻ്റെ മാസ്റ്റെക്ടമി ശസ്ത്രക്രിയയുടെ പാടുകൾ വെളിപ്പെടുത്തിക്കൊണ്ടുള്ള ഫോട്ടോഷൂട്ടിലൂടെ ലോകശ്രദ്ധ നേടി. സ്തനാർബുദ സാധ്യത മുന്നിൽ കണ്ട് സ്തനങ്ങൾ നീക്കം ചെയ്ത ശസ്ത്രക്രിയയാണ് മാസ്റ്റെക്ടമി (Mastectomy). ശാരീരിക മാറ്റങ്ങളെക്കുറിച്ചുള്ള പൊതുബോധത്തെയും സൗന്ദര്യ സങ്കൽപ്പങ്ങളെയും ചോദ്യം ചെയ്യുന്നതായിരുന്നു ഈ ഫോട്ടോഷൂട്ട്.

അർബുദ സാധ്യത തിരിച്ചറിഞ്ഞതിനെത്തുടർന്ന് 2013-ലാണ് ആഞ്ജലീന ജോളി പ്രിവന്റീവ് മാസ്റ്റെക്ടമിക്ക് വിധേയയായത്. താരത്തിൻ്റെ അമ്മ അർബുദം ബാധിച്ചാണ് മരിച്ചത്. തൻ്റെ ശരീരത്തിൽ കാൻസറിന് കാരണമാകുന്ന BRCA1 ജീൻ ഉണ്ടെന്ന് കണ്ടെത്തിയതോടെയാണ് ജോളി ഈ കടുപ്പമേറിയ തീരുമാനം എടുത്തത്. ഈ ശസ്ത്രക്രിയക്ക് ശേഷം മാറിടങ്ങൾ പുനഃസൃഷ്ടിക്കുന്ന ശസ്ത്രക്രിയയും അവർ നടത്തിയിരുന്നു.

പുറത്തുവന്ന ഫോട്ടോഷൂട്ടിൽ, മാസ്റ്റെക്ടമിക്ക് ശേഷമുള്ള പാടുകൾ മറച്ചുവെക്കാതെ ആത്മവിശ്വാസത്തോടെ അവർ പോസ് ചെയ്തു. സ്തനമില്ലാത്തതോ, ശസ്ത്രക്രിയയുടെ പാടുകളുള്ളതോ ആയ സ്ത്രീ ശരീരം അപൂർണമല്ലെന്നും, അത് ധീരതയുടെയും അതിജീവനത്തിന്റെയും അടയാളമാണെന്നും ഈ ചിത്രങ്ങളിലൂടെ അവർ ലോകത്തോട് വിളിച്ചുപറഞ്ഞു.

ശസ്ത്രക്രിയക്ക് ശേഷം തൻ്റെ അനുഭവങ്ങൾ പങ്കുവെച്ച് ആഞ്ജലീന ജോളി മുമ്പ് എഴുതിയ ലേഖനങ്ങളും വലിയ ചർച്ചയായിരുന്നു. സ്വന്തം ശരീരം സംരക്ഷിക്കാൻ താൻ എടുത്ത തീരുമാനം മറ്റു സ്ത്രീകൾക്ക് പ്രചോദനമാകുമെങ്കിൽ അത് സന്തോഷമാണെന്നും, സ്ത്രീത്വത്തെ അടയാളപ്പെടുത്തുന്നത് മാറിടങ്ങളല്ലെന്നും അവർ അന്ന് വ്യക്തമാക്കിയിരുന്നു.

പുതിയ ഫോട്ടോഷൂട്ട് ചിത്രങ്ങൾ ലോകമെമ്പാടുമുള്ള സ്ത്രീകളെ, പ്രത്യേകിച്ച് സ്തനാർബുദത്തെ അതിജീവിച്ചവരെയും അതിൻ്റെ ഭീഷണി നേരിടുന്നവരെയും സ്വാധീനിച്ചു. സൗന്ദര്യത്തെക്കുറിച്ചുള്ള പരമ്പരാഗത ചിന്തകളെ ഉടച്ചുവാർത്ത ഈ ഫോട്ടോഷൂട്ട്, ആഞ്ജലീന ജോലിയെ അതിജീവനത്തിൻ്റെയും സ്ത്രീശക്തിയുടെയും പ്രതീകമായി വീണ്ടും അടയാളപ്പെടുത്തി. തൻ്റെ ആരോഗ്യപരമായ തീരുമാനങ്ങളെക്കുറിച്ച് തുറന്നുപറയാനുള്ള താരത്തിന്റെ ധൈര്യത്തെ ലോകമെമ്പാടുമുള്ള ആരാധകരും മാധ്യമങ്ങളും അഭിനന്ദിച്ചു.

ആഞ്ജലീന ജോളിശസ്ത്രക്രിയ പാടുകൾകാൻസർ അതിജീവനം

മറുനാടൻ മലയാളി ബ്യൂറോ