സ്കീ ലിഫ്റ്റിന്റെ ചെയർ കേബിളിൽ നിന്ന് തെന്നിമാറി; പിന്നാലെ മറ്റൊരു ചെയറിലേക്ക് ഇടിച്ചുകയറി; ഭാര്യയുടെ കൺമുന്നിൽ താഴേക്ക് പതിച്ച് 34കാരൻ; വിനോദയാത്രയ്ക്കെത്തിയ മുൻ ജർമ്മൻ താരം സെബാസ്റ്റ്യൻ ഹെർട്ട്നറിന് ദാരുണാന്ത്യം; ഞെട്ടൽ മാറാതെ ഫുട്ബോൾ ലോകം
പോഡ്ഗോറിക്ക: മൊണ്ടിനെഗ്രോയിലെ സ്കീ റിസോർട്ടിലുണ്ടായ ദാരുണമായ അപകടത്തിൽ മുൻ ജർമ്മൻ ഫുട്ബോൾ താരം സെബാസ്റ്റ്യൻ ഹെർട്ട്നർ (34) അന്തരിച്ചു. ഭാര്യയ്ക്കൊപ്പം സ്കീ ലിഫ്റ്റിൽ യാത്ര ചെയ്യുന്നതിനിടെയായിരുന്നു അപകടം. അപകടത്തിന്റെ കൃത്യമായ കാരണം വ്യക്തമല്ലെങ്കിലും ലിഫ്റ്റിലെ സുരക്ഷാ സംവിധാനത്തിലുണ്ടായ പാളിച്ചയാണോ അതോ മറ്റ് കാരണങ്ങളാണോ എന്ന് പോലീസ് അന്വേഷിച്ചുവരികയാണ്.
മൊണ്ടിനെഗ്രോയിലെ സാവിൻ കുക്ക് സ്കീ റിസോർട്ടിൽ വെച്ച് കഴിഞ്ഞ ശനിയാഴ്ചയാണ് അപകടം നടന്നത്. ഹെർട്ട്നറും ഭാര്യയും ഇരുന്നിരുന്ന ലിഫ്റ്റിന്റെ ചെയർ കേബിളിൽ നിന്ന് തെന്നിമാറി പുറകിലെ മറ്റൊരു ചെയറിലേക്ക് ഇടിച്ചുകയറുകയായിരുന്നു. ഇതിന്റെ ആഘാതത്തിൽ ഹെർട്ട്നർ താഴ്ചയിലേക്ക് വീഴുകയും സംഭവസ്ഥലത്ത് വെച്ച് തന്നെ മരിക്കുകയും ചെയ്തു. അദ്ദേഹത്തിന്റെ മുപ്പതുകാരിയായ ഭാര്യ പരിക്കുകളോടെ ലിഫ്റ്റിൽ കുടുങ്ങിപ്പോയെങ്കിലും പിന്നീട് രക്ഷാപ്രവർത്തകർ അവരെ ആശുപത്രിയിലെത്തിച്ചു.
ജർമ്മൻ ക്ലബ്ബായ വി.എഫ്.ബി സ്റ്റുട്ട്ഗാർട്ടിന്റെ അക്കാദമിയിലൂടെ വളർന്ന താരമാണ് സെബാസ്റ്റ്യൻ ഹെർട്ട്നർ. ജർമ്മനിയുടെ ജൂനിയർ ദേശീയ ടീമുകൾക്കായി (U18, U19) അദ്ദേഹം കളിച്ചിട്ടുണ്ട്. പ്രമുഖ ക്ലബ്ബുകളായ 1860 മ്യൂണിക്ക്, എർസ്ഗെബിർഗെ ഔ, ഡാംസ്റ്റാഡ് എന്നിവർക്കായി രണ്ടാം ഡിവിഷനിൽ കളിച്ചിട്ടുണ്ട്. ഡിഫൻഡറായിരുന്ന അദ്ദേഹം ലിഗയിൽ 60-ലധികം മത്സരങ്ങളിൽ സ്റ്റുട്ട്ഗാർട്ടിന്റെ റിസർവ് ടീമിനായി ബൂട്ട് കെട്ടിയിട്ടുണ്ട്. ക്രിസ്റ്റോഫ് ക്രാമർ, ഫെലിക്സ് ക്രൂസ് തുടങ്ങിയ പ്രമുഖ താരങ്ങൾക്കൊപ്പം കരിയർ ആരംഭിച്ച താരമായിരുന്നു ഹെർട്ട്നർ.
ഹെർട്ട്നറുടെ മരണത്തിൽ സ്റ്റുട്ട്ഗാർട്ട് ക്ലബ്ബ് അനുശോചനം രേഖപ്പെടുത്തി. "ഞങ്ങളുടെ ക്യാപ്റ്റൻ സെബാസ്റ്റ്യൻ ഹെർട്ട്നർ അവധിക്കാലത്തെ ഒരു അപകടത്തിൽ മരിച്ച വിവരം അങ്ങേയറ്റത്തെ ദുഃഖത്തോടെ അറിയിക്കുന്നു. ഞങ്ങൾ സ്തംഭിച്ചുപോയിരിക്കുന്നു," എന്ന് ഇടിഎസ്വി ഹാംബർഗ് ക്ലബ്ബ് ഔദ്യോഗിക കുറിപ്പിലൂടെ അറിയിച്ചു.
അപകടത്തിന്റെ പശ്ചാത്തലത്തിൽ റിസോർട്ടിലെ ലിഫ്റ്റ് താൽക്കാലികമായി അടച്ചുപൂട്ടുകയും സംഭവത്തെക്കുറിച്ച് സമഗ്രമായ അന്വേഷണം നടത്താൻ പ്രാദേശിക അധികൃതർ ഉത്തരവിടുകയും ചെയ്തിട്ടുണ്ട്. മൊണ്ടിനെഗ്രോയിലെ അധികൃതർ സംഭവത്തിൽ അന്വേഷണം ആരംഭിച്ചിട്ടുണ്ട്. ലിഫ്റ്റിന്റെ സാങ്കേതിക തകരാറാണോ അപകടത്തിന് കാരണമെന്ന് പരിശോധിച്ചുവരികയാണ്.
