എന്തെങ്കിലും അത്ഭുതം നടക്കാൻ കർത്താവിനോട് ഞാൻ കരഞ്ഞ് പ്രാർത്ഥിച്ചു; എന്നിട്ടും എന്റെ മോൻ പോയി..!! താൻ താലോലിച്ച് വളർത്തിയ മകനെ നഷ്ടപ്പെട്ട വേദനയിൽ വിലപിക്കുന്ന പ്രമുഖ കത്തോലിക്കാ ഇൻഫ്ലുവൻസർ; വിശ്വാസലോകത്തെ കണ്ണീരിലാഴ്ത്തി പുതുവർഷ തലേന്ന് അവന്റെ മടക്കം; ആ അഞ്ച് വയസ്സുകാരന്റെ ജീവനെടുത്തത് ഈ അസുഖമെന്ന് ഡോക്ടർമാർ
പ്രശസ്ത കത്തോലിക്കാ ഇൻഫ്ലുവൻസറും വാഗ്മിയുമായ പോൾ ജെ. കിമ്മിന്റെ അഞ്ച് വയസ്സുകാരനായ മകൻ മൈക്കയുടെ മരണം വിശ്വാസലോകത്തെ കണ്ണീരിലാഴ്ത്തുന്നു. പനിയും തുടർന്നുണ്ടായ ആരോഗ്യപ്രശ്നങ്ങളും മൂലം 11 ദിവസത്തോളം ആശുപത്രിയിൽ മരണത്തോട് മല്ലിട്ട ശേഷമാണ് പുതുവത്സര തലേന്ന് മൈക്ക യാത്രയായത്.
ഡിസംബർ 21-നാണ് മൈക്കയെ അടിയന്തര സാഹചര്യത്തിൽ ആശുപത്രിയിൽ പ്രവേശിപ്പിച്ചത്. കടുത്ത പനി ബാധിച്ചതിനെത്തുടർന്ന് കുട്ടിക്ക് സെപ്സിസ് (Sepsis - രക്തത്തിലെ അണുബാധ), അപസ്മാരം (Seizures) എന്നിവ ബാധിച്ചു. നില വഷളായതിനെത്തുടർന്ന് കുട്ടിയെ വെന്റിലേറ്ററിലേക്ക് മാറ്റി. ചികിത്സയുടെ ഓരോ ഘട്ടത്തിലും പോൾ തന്റെ 3.4 ലക്ഷത്തിലധികം വരുന്ന ഇൻസ്റ്റാഗ്രാം അനുയായികളോട് പ്രാർത്ഥനകൾ അഭ്യർത്ഥിച്ചിരുന്നു.
ഡിസംബർ 27-ന് പുറത്തുവന്ന എംആർഐ (MRI) സ്കാനിംഗ് റിപ്പോർട്ടിൽ കുട്ടിയുടെ തലച്ചോറിന് ഗുരുതരമായ ക്ഷതങ്ങൾ സംഭവിച്ചതായും വൈദ്യശാസ്ത്രപരമായി തിരിച്ചുവരവ് അസാധ്യമാണെന്നും ഡോക്ടർമാർ അറിയിച്ചിരുന്നു. എങ്കിലും ഒരു അത്ഭുതത്തിനായി പോളും കുടുംബവും അവസാന നിമിഷം വരെ പ്രത്യാശയോടെ കാത്തിരുന്നു. മകന്റെ ജീവൻ നിലനിർത്താനായി നിയമപരവും വൈദ്യശാസ്ത്രപരവുമായ എല്ലാ സാധ്യതകളും തേടിയതായി പോൾ പറഞ്ഞു.
ജനുവരി ഒന്നിന് പങ്കുവെച്ച വൈകാരികമായ വീഡിയോയിലൂടെയാണ് പോൾ മകന്റെ മരണവാർത്ത ലോകത്തെ അറിയിച്ചത്. "11 ദിവസം നീണ്ട കഠിനമായ പോരാട്ടത്തിനൊടുവിൽ മൈക്ക പിതാവായ ദൈവത്തിന്റെ ഭവനത്തിലേക്ക് മടങ്ങിപ്പോയി," എന്ന് കണ്ണുനീരോടെ അദ്ദേഹം പറഞ്ഞു. തന്റെ ജീവിതത്തിൽ നേരിട്ട ഏറ്റവും കഠിനമായ പരീക്ഷണമാണിതെന്നും എങ്കിലും ദൈവഹിതത്തിൽ താൻ വിശ്വസിക്കുന്നുവെന്നും പോൾ കൂട്ടിച്ചേർത്തു.
മകന്റെ വിയോഗത്തിൽ തകർന്നുപോയെങ്കിലും, മൈക്കയുടെ ജീവിതവും അവന് വേണ്ടി ലോകമെമ്പാടുമുള്ളവർ നടത്തിയ പ്രാർത്ഥനകളും അനേകം ആത്മാക്കളെ ദൈവത്തിലേക്ക് അടുപ്പിക്കാൻ സഹായിച്ചുവെന്ന് അദ്ദേഹം വിശ്വസിക്കുന്നു. "കാഴ്ചയാലല്ല, വിശ്വാസത്താലാണ് ഞങ്ങൾ ഇനി ജീവിക്കാൻ പഠിക്കേണ്ടത്. അതിനായി എല്ലാവരും പ്രാർത്ഥിക്കണം," എന്ന് അദ്ദേഹം അഭ്യർത്ഥിച്ചു.
മൈക്കയുടെ വേർപാടിൽ ലോകത്തിന്റെ വിവിധ ഭാഗങ്ങളിൽ നിന്നുള്ള പ്രമുഖർ അനുശോചനം രേഖപ്പെടുത്തി. പ്രശസ്ത ഗായിക ഗ്വെൻ സ്റ്റെഫാനി (Gwen Stefani) ഉൾപ്പെടെയുള്ളവർ സോഷ്യൽ മീഡിയയിലൂടെ പോളിനും കുടുംബത്തിനും പിന്തുണ അറിയിച്ചു. മൈക്കയുടെ ചികിത്സാ ചെലവുകൾക്കും കുടുംബത്തെ സഹായിക്കാനുമായി ആരംഭിച്ച ഗോഫണ്ട്മി (GoFundMe) ക്യാമ്പയിനിലൂടെ ഇതിനകം 3,50,000 ഡോളറിലധികം (ഏകദേശം 2.9 കോടി രൂപ) സമാഹരിക്കപ്പെട്ടു.
പോൾ ജെ. കിമ്മിനെക്കുറിച്ച്
അമേരിക്കയിലെ കാലിഫോർണിയ കേന്ദ്രീകരിച്ച് പ്രവർത്തിക്കുന്ന പോൾ ജെ. കിം പ്രശസ്തനായ കത്തോലിക്കാ സുവിശേഷകനും തെറാപ്പിസ്റ്റും എഴുത്തുകാരനുമാണ്. യുവാക്കൾക്കും പുരുഷന്മാർക്കും വേണ്ടിയുള്ള നിരവധി കോൺഫറൻസുകളുടെ സംഘാടകനായ അദ്ദേഹം, 'A Catholic Guide To Adulting' എന്ന പ്രശസ്തമായ പുസ്തകത്തിന്റെ രചയിതാവ് കൂടിയാണ്. ആറ് മക്കളാണ് പോളിനും ഭാര്യക്കുമുള്ളത്.
മകന്റെ വിയോഗത്തിലും തളരാതെ വിശ്വാസത്തെ മുറുകെപ്പിടിക്കുന്ന പോളിന്റെ വീഡിയോ സോഷ്യൽ മീഡിയയിൽ ദശലക്ഷക്കണക്കിന് ആളുകളെയാണ് സ്പർശിച്ചത്. ഒരു പിതാവ് എന്ന നിലയിൽ തന്റെ കടമകൾ പരമാവധി ചെയ്തുവെന്നും ഇനി മകൻ സ്വർഗത്തിലിരുന്ന് തങ്ങളെ നയിക്കുമെന്നും വിശ്വസിച്ചുകൊണ്ട് പോൾ മകന് വിട നൽകി.
