പുതിയ ടാങ്കര് വിമാനങ്ങള് വാങ്ങുന്നതിനേക്കാള് 20 മുതല് 30 ശതമാനം വരെ കുറഞ്ഞ ചിലവില് ബോയിംഗ് വിമാനങ്ങള് ടാങ്കറുകളായി മാറ്റിയെടുക്കാം; റഷ്യന് വിമാനങ്ങളെ കൈവിട്ട് ഇന്ത്യ; ബോയിംഗ് 767 വിമാനങ്ങള് ഇന്ധന ടാങ്കറുകളാക്കാന് ഒരുങ്ങി വ്യോമസേന; ആ തന്ത്രത്തിന് പിന്നിലെ കാരണങ്ങള് ഇങ്ങനെ
മുംബൈ: റഷ്യന് നിര്മ്മിത ഇല്-78 വിമാനങ്ങള്ക്ക് പകരമായി സിവിലിയന് ബോയിംഗ് 767 വിമാനങ്ങളെ ആകാശത്ത് വെച്ച് ഇന്ധനം നിറയ്ക്കാവുന്ന ടാങ്കറുകളാക്കി മാറ്റാന് ഇന്ത്യന് വ്യോമസേന പദ്ധതിയിടുന്നു. റഷ്യന് വിമാനങ്ങള് നേരിടുന്ന സാങ്കേതിക തകരാറുകളും സ്പെയര് പാര്ട്സുകളുടെ ലഭ്യതക്കുറവുമാണ് ഇത്തരമൊരു സുപ്രധാന നീക്കത്തിന് ഇന്ത്യയെ പ്രേരിപ്പിക്കുന്നത്.
ആറ് പഴയ ബോയിംഗ് 767 വിമാനങ്ങള് വാങ്ങി അവയെ ഇന്ധനം നിറയ്ക്കുന്ന ടാങ്കര് വിമാനങ്ങളാക്കി മാറ്റാനാണ് ഇന്ത്യ ലക്ഷ്യമിടുന്നത്. ഏകദേശം 100 കോടി ഡോളറാണ് ഇതിനായി ചിലവ് പ്രതീക്ഷിക്കുന്നത്. ഹിന്ദുസ്ഥാന് എയറോനോട്ടിക്സ് ലിമിറ്റഡും ഇസ്രായേല് എയറോസ്പേസ് ഇന്ഡസ്ട്രീസും സംയുക്തമായാണ് ഈ വിമാനങ്ങളുടെ പരിവര്ത്തന ജോലികള് ഏറ്റെടുക്കുന്നത്.
നിലവില് ഇന്ത്യയുടെ പക്കലുള്ള ആറ് റഷ്യന് ഇല്-78 വിമാനങ്ങള് അറ്റകുറ്റപ്പണികള്ക്കായി സ്പെയര് പാര്ട്സുകള് ലഭിക്കാതെ വലയുകയാണ്. ഉപരോധങ്ങള് മൂലം റഷ്യയില് നിന്നുള്ള വിതരണം തടസ്സപ്പെട്ടതും ലോകമെമ്പാടും ബോയിംഗ് വിമാനങ്ങളുടെ പാര്ട്സുകള് എളുപ്പത്തില് ലഭ്യമാണെന്നതും ഈ തീരുമാനത്തിന് പിന്നിലെ പ്രധാന കാരണങ്ങളാണ്.
വ്യോമസേനയുടെ ആവശ്യം നിറവേറ്റാന് ആകെ 12 ടാങ്കര് വിമാനങ്ങളാണ് ഇന്ത്യക്ക് വേണ്ടത്. പുതിയ ബോയിംഗ് വിമാനങ്ങള് 2030-2031 കാലയളവില് സേനയുടെ ഭാഗമാകുമെന്ന് കരുതുന്നു. ഈ സാങ്കേതിക കൈമാറ്റത്തിലൂടെ സ്വന്തമായി ടാങ്കര് വിമാനങ്ങള് നിര്മ്മിക്കാനുള്ള ശേഷി ഇന്ത്യക്ക് ലഭിക്കുമെന്നത് പ്രതിരോധ മേഖലയില് വലിയ നേട്ടമായി കണക്കാക്കപ്പെടുന്നു.
ഇന്ത്യന് വ്യോമസേനയുടെ ദീര്ഘദൂര ആക്രമണ ശേഷി വര്ദ്ധിപ്പിക്കുന്നതിനായി ആറ് മള്ട്ടി-റോള് ടാങ്കര് ട്രാന്സ്പോര്ട്ട് വിമാനങ്ങള് വാങ്ങുന്നതിനുള്ള ഏകദേശം 9,000 കോടി രൂപയുടെ പദ്ധതിക്ക് പ്രതിരോധ മന്ത്രാലയം അംഗീകാരം നല്കി. ആകാശത്ത് വെച്ച് തന്നെ പോര്വിമാനങ്ങളില് ഇന്ധനം നിറയ്ക്കാന് ശേഷിയുള്ള ഈ വിമാനങ്ങള് വ്യോമസേനയുടെ കരുത്ത് ഇരട്ടിയാക്കും.
നിലവില് ഇന്ത്യ ഉപയോഗിക്കുന്ന ആറ് ഇല്-78 വിമാനങ്ങള് 20 വര്ഷത്തിലേറെ പഴക്കമുള്ളതാണ്. ഇവയുടെ അറ്റകുറ്റപ്പണികള്ക്കായി സ്പെയര് പാര്ട്സുകള് ലഭിക്കാന് വലിയ പ്രയാസമാണ് നേരിടുന്നത്. ഈ വിമാനങ്ങളുടെ പ്രവര്ത്തനക്ഷമത 50 ശതമാനത്തില് താഴെയാണെന്ന് സി.എ.ജി റിപ്പോര്ട്ടുകള് ചൂണ്ടിക്കാട്ടിയിരുന്നു.
യുക്രൈന് യുദ്ധത്തെത്തുടര്ന്ന് റഷ്യക്ക് മേല് ഏര്പ്പെടുത്തിയ ഉപരോധങ്ങള് കാരണം വിമാനഭാഗങ്ങള് കൃത്യസമയത്ത് ലഭിക്കാത്തത് ഇന്ത്യക്ക് വലിയ പ്രതിസന്ധിയുണ്ടാക്കുന്നുണ്ട്. ലോകമെമ്പാടും സിവില് ആവശ്യങ്ങള്ക്കായി വ്യാപകമായി ഉപയോഗിക്കുന്ന വിമാനമാണ് ബോയിംഗ് 767. അതിനാല് ഇതിന്റെ സ്പെയര് പാര്ട്സുകളും സാങ്കേതിക സഹായവും എളുപ്പത്തില് ലഭ്യമാണ്.
ഇന്ത്യയുടെ ഹിന്ദുസ്ഥാന് എയറോനോട്ടിക്സ് ലിമിറ്റഡും ഇസ്രായേല് എയറോസ്പേസ് ഇന്ഡസ്ട്രീസും ചേര്ന്നാണ് ഈ പദ്ധതി നടപ്പാക്കുന്നത്. പത്ത് വര്ഷത്തില് താഴെ മാത്രം പഴക്കമുള്ള ബോയിംഗ് 767 വിമാനങ്ങള് വാങ്ങി അവയെ ടാങ്കറുകളാക്കി മാറ്റും. റഷ്യന് വിമാനങ്ങളേക്കാള് ഇരട്ടി വേഗത്തില് (മിനിറ്റില് 4,000 ലിറ്റര്) ഇന്ധനം നിറയ്ക്കാന് ഈ ടാങ്കറുകള്ക്ക് സാധിക്കും. ഇവയ്ക്ക് 12,200 കിലോമീറ്റര് വരെ നിര്ത്താതെ പറക്കാനുള്ള ശേഷിയുണ്ട്.
ഇസ്രായേലിന്റെ 'ബെഡെക്' ഏവിയേഷന് ഗ്രൂപ്പിന്റെ സാങ്കേതിക വിദ്യയാണ് ഇതില് ഉപയോഗിക്കുന്നത്. ഇതിലൂടെ ഭാവിയില് സ്വന്തമായി ടാങ്കര് വിമാനങ്ങള് നിര്മ്മിക്കാനുള്ള ശേഷി ഇന്ത്യക്ക് കൈവരും. ആകാശത്ത് വെച്ച് തന്നെ ഇന്ധനം നിറയ്ക്കുന്നതിലൂടെ റാഫേല്, സുഖോയ്-30 തുടങ്ങിയ വിമാനങ്ങള്ക്ക് കൂടുതല് ദൂരം പറന്ന് ശത്രു കേന്ദ്രങ്ങളില് ആക്രമണം നടത്താന് സാധിക്കും.
പുതിയ ടാങ്കര് വിമാനങ്ങള് വാങ്ങുന്നതിനേക്കാള് 20 മുതല് 30 ശതമാനം വരെ കുറഞ്ഞ ചിലവില് ബോയിംഗ് വിമാനങ്ങള് ഇത്തരത്തില് മാറ്റിയെടുക്കാം.
