അമേരിക്കൻ വിസ ലഭിക്കാൻ ഭയങ്കര കാലതാമസം; ഇന്ത്യയിൽ കുടുങ്ങിയ ജീവനക്കാർക്ക് ജോലി ചെയ്യാൻ അനുമതി നൽകി ആമസോൺ; നിയന്ത്രണങ്ങളോടെ അപൂർവ്വ ഇളവ് പ്രഖ്യാപിച്ച് കമ്പനി

ഡൽഹി: അമേരിക്കൻ വിസ ലഭിക്കാൻ നേരിടുന്ന കാലതാമസം കാരണം ഇന്ത്യയിൽ കുടുങ്ങിപ്പോയ തങ്ങളുടെ ജീവനക്കാർക്ക് ആമസോൺ പ്രത്യേക ഇളവ് അനുവദിച്ചു. 2025 ജനുവരി മുതൽ കമ്പനി നടപ്പിലാക്കിയ 'ആഴ്ചയിൽ അഞ്ച് ദിവസവും ഓഫീസിൽ വരണം' എന്ന കർശനമായ നിയമത്തിലാണ് ഇപ്പോൾ താൽക്കാലികമായ മാറ്റം വരുത്തിയിരിക്കുന്നത്. എങ്കിലും, ഈ ഇളവ് കടുത്ത നിയന്ത്രണങ്ങളോടു കൂടിയാണെന്നതാണ് ശ്രദ്ധേയം.

ആമസോൺ പുറത്തിറക്കിയ ആഭ്യന്തര മെമ്മോ പ്രകാരം, 2025 ഡിസംബർ 13-ഓടെ ഇന്ത്യയിലുണ്ടായിരുന്നതും വിസ സ്റ്റാമ്പിംഗിനായി തീയതികൾ മാറ്റി ലഭിച്ചതുമായ യുഎസ് അധിഷ്ഠിത ജീവനക്കാർക്ക് 2026 മാർച്ച് 2 വരെ ഇന്ത്യയിലിരുന്ന് ജോലി ചെയ്യാൻ അനുമതി നൽകി. സാധാരണഗതിയിൽ വിസ സംബന്ധമായ കാര്യങ്ങൾക്കായി വിദേശത്ത് പോകുന്നവർക്ക് 20 ദിവസം മാത്രമാണ് ആമസോൺ വർക്ക് ഫ്രം ഹോം (WFH) അനുവദിക്കാറുള്ളത്. എന്നാൽ നിലവിലെ സാഹചര്യം പരിഗണിച്ച് ഇതൊരു അപൂർവ്വ ഇളവായി കമ്പനി പ്രഖ്യാപിക്കുകയായിരുന്നു.

കടുത്ത നിയന്ത്രണങ്ങൾ ഇന്ത്യയിലിരുന്ന് ജോലി ചെയ്യാൻ അനുവാദം നൽകിയെങ്കിലും, ഇത്തരത്തിൽ ജോലി ചെയ്യുന്ന ജീവനക്കാർക്ക് അവരുടെ പ്രധാനപ്പെട്ട പല ജോലികളും ചെയ്യാൻ അനുവാദമില്ല. സോഫ്റ്റ്‌വെയർ എൻജിനീയർമാർക്ക് കോഡിംഗ് ചെയ്യാനോ, ടെസ്റ്റിംഗ് നടത്താനോ, സോഫ്റ്റ്‌വെയറിലെ പിഴവുകൾ പരിഹരിക്കാനോ അനുവാദമില്ല.

കമ്പനിയുടെ തന്ത്രപരമായ തീരുമാനങ്ങളിലോ, കരാറുകളിൽ ഒപ്പിടുന്നതിലോ പങ്കുചേരാൻ പാടില്ല.ഇന്ത്യയിലെ ആമസോൺ ഓഫീസുകൾ സന്ദർശിക്കാനോ അവിടെയിരുന്ന് ജോലി ചെയ്യാനോ പാടില്ല. വീടുകളിലിരുന്ന് മാത്രമേ ജോലി ചെയ്യാവൂ.

ഉപഭോക്താക്കളുമായോ പാർട്ണർമാരുമായോ നേരിട്ട് ആശയവിനിമയം നടത്താൻ പാടില്ല. എല്ലാ പ്രധാനപ്പെട്ട അംഗീകാരങ്ങളും തീരുമാനങ്ങളും അമേരിക്കയ്ക്ക് പുറത്തുള്ള ഉദ്യോഗസ്ഥർ തന്നെ കൈക്കൊള്ളണം.

എന്തുകൊണ്ട് ഈ പ്രതിസന്ധി?

ട്രംപ് ഭരണകൂടം കൊണ്ടുവന്ന വിസ നിയമങ്ങളിലെ മാറ്റങ്ങളാണ് ഈ പ്രതിസന്ധിക്ക് കാരണം. വിസ അപേക്ഷകരുടെ സോഷ്യൽ മീഡിയ അക്കൗണ്ടുകൾ പരിശോധിക്കണമെന്ന പുതിയ നിർദ്ദേശം വിസ പ്രോസസിംഗ് വൈകിപ്പിക്കാൻ കാരണമായി. പലർക്കും 2026-ലോ 2027-ലോ ഉള്ള തീയതികളാണ് ഇന്റർവ്യൂവിനായി ലഭിക്കുന്നത്. ഇത് ആമസോണിനെപ്പോലെയുള്ള വലിയ ടെക് കമ്പനികളെ സാരമായി ബാധിച്ചിട്ടുണ്ട്. 2024 സാമ്പത്തിക വർഷത്തിൽ മാത്രം ഏകദേശം 14,800 എച്ച്-1ബി (H-1B) അപേക്ഷകളാണ് ആമസോൺ നൽകിയത്.

ജീവനക്കാരുടെ ആശങ്ക കമ്പനിയുടെ ഈ തീരുമാനം ജീവനക്കാരെ ശമ്പള പട്ടികയിൽ നിലനിർത്താൻ സഹായിക്കുമെങ്കിലും, ജോലി ചെയ്യാൻ കഴിയാത്ത സാഹചര്യം അവരെ ആശങ്കയിലാക്കുന്നു. ഒരു സോഫ്റ്റ്‌വെയർ എൻജിനീയറുടെ ജോലിയുടെ 80 ശതമാനവും കോഡിംഗും ടെസ്റ്റിംഗും ആയിരിക്കെ, അത് ചെയ്യാൻ പാടില്ലെന്ന നിബന്ധന തങ്ങളുടെ ഉൽപ്പാദനക്ഷമതയെ ബാധിക്കുമെന്ന് അവർ പറയുന്നു.

ഗൂഗിൾ, ആപ്പിൾ, മൈക്രോസോഫ്റ്റ് തുടങ്ങിയ കമ്പനികളും തങ്ങളുടെ വിസയുള്ള ജീവനക്കാർക്ക് വിദേശയാത്രകൾ ഒഴിവാക്കാൻ നേരത്തെ തന്നെ മുന്നറിയിപ്പ് നൽകിയിരുന്നു. അമേരിക്കയുടെ കുടിയേറ്റ നയങ്ങളിലുണ്ടാകുന്ന പെട്ടെന്നുള്ള മാറ്റങ്ങൾ ആഗോള ടെക് ഭീമന്മാരുടെ പ്രവർത്തനങ്ങളെ എങ്ങനെ ബാധിക്കുന്നു എന്നതിന്റെ തെളിവാണ് ആമസോണിന്റെ ഈ പുതിയ നീക്കം.