പത്തനംതിട്ട എആര് ക്യാമ്പിലെ ആക്രിസാധനങ്ങള് ആരുമറിയാതെ എസ്ഐ തൂക്കി വിറ്റു; സിസിടിവി ദൃശ്യങ്ങള് സഹിതം പരാതി എത്തിയപ്പോള് നെട്ടോട്ടം; വിറ്റു കിട്ടിയ പണം തിരികെ അടച്ചിട്ടും രക്ഷയില്ല: എസ്ഐക്കെതിരേ എസ്പിക്ക് റിപ്പോര്ട്ട്: നടപടി ഉണ്ടായേക്കും
പത്തനംതിട്ട: എആര് ക്യാമ്പില് നിന്നുള്ള ആക്രി സാധനങ്ങള് ആരുമറിയാതെ എസ്ഐ തൂക്കി വിറ്റു. എസ്ഐയോട് മുന്വൈരാഗ്യമുള്ള പോലീസുകാരന് ആക്രിക്കടയില് നിന്നുള്ള സിസിടിവി ദൃശ്യം അടക്കം പരാതിപ്പെട്ടതോടെ സംഭവം വിവാദമായി. ആക്രി വിറ്റു കിട്ടിയ പണം എസ്ഐ തിരികെ അടച്ചു തലയൂരാന് ശ്രമിച്ചെങ്കിലും എസ്പിക്ക് റിപ്പോര്ട്ട് ലഭിച്ചതോടെ നടപടി ഉറപ്പായി.
എആര് ക്യാമ്പിലെ എസ്ഐ ജയകുമാറിനെതിരേയാണ് പരാതി ഉയര്ന്നിരിക്കുന്നത്. മത്തി എന്ന അപരനാമത്തിലാണ് ജയകുമാര് അറിയപ്പെടുന്നത്. മദ്യപിച്ച് ബഹളമുണ്ടാക്കിയതിനും സഹപ്രവര്ത്തകനെ മര്ദിച്ചതിനും അടക്കം നിരവധി തവണ നടപടി നേരിട്ടിട്ടുള്ളയാളാണ് ജയകുമാര്.
കഴിഞ്ഞ ആഴ്ചയാണ് സംഭവം. എആര് ക്യാമ്പിലുണ്ടായിരുന്ന ആക്രി സാധനങ്ങള് വാഹനത്തില് കയറ്റി വടശേരിക്കരയ്ക്ക് സമീപം ചെങ്ങറ മുക്കിലുളള ആക്രി കടയില് എത്തിച്ചു വിറ്റ് പണം വാങ്ങുകയായിരുന്നു. ക്യാമ്പിലെ ആക്രി സാധനങ്ങള് വില്ക്കുന്നതിന് സര്ക്കാര് നടപടി ക്രമങ്ങളുണ്ട്. ടെണ്ടര് വിളിച്ചാണ് എന്തു സാധനവും വില്ക്കേണ്ടത്. ഇവിടെ ഒരു നടപടി ക്രമവും പാലിക്കാതെ എസ്ഐ സാധനങ്ങള് കൊണ്ടു പോയി വില്ക്കുകയായിരുന്നു.
ജയകുമാറിനോട് വിരോധമുള്ള ഒരു പോലീസുകാരനാണ് വില്പ്പന വിവാദമാക്കിയത്. ഇയാള് ആക്രിക്കടയിലെ സിസിടിവി ദൃശ്യങ്ങള് അടക്കം ശേഖരിച്ച് പരാതി നല്കുകയായിരുന്നു. തെളിവു സഹിതം പരാതി വന്നതോടെ എസ്ഐ വെട്ടിലായി. വിശദമായ റിപ്പോര്ട്ട് ക്യാമ്പ് കമാന്ഡന്റ് എസ്പിക്ക് സമര്പ്പിച്ചുവെന്നാണ് അറിയുന്നത്. എസ്ഐക്കെതിരേ നടപടിയുണ്ടായേക്കും.
