മാവോയിസ്റ്റ് സംഘടനകള് സാധാരണയായി സ്വീകരിക്കുന്ന 'പോലീസ് വിരുദ്ധ' നിലപാടുകള്; ഡെപ്യൂട്ടി കളക്ടറുടെ വാഹനം തകര്ത്തതും തിരഞ്ഞെടുപ്പ് ബൂത്ത് ആക്രമിച്ചതും ഇയാളുടെ തീവ്ര നിലപാടുകളുടെ ഉദാഹരണം; കോഴിക്കോട് ഗ്രേഡ് എസ് ഐയെ കുത്തിയ പ്രമോദ് ആളു ചില്ലറക്കാരനല്ല; കത്തിയുമായി എത്തിയത് മറ്റ് രണ്ടു പോലീസുകാരെ ലക്ഷ്യമിട്ടോ?
കോഴിക്കോട്: കോഴിക്കോട് ടൗണ് പോലീസ് സ്റ്റേഷനിലെ ഗ്രേഡ് എസ്ഐ ഷാഫിയ്ക്ക് കുത്തേറ്റ സംഭവത്തില് അന്വേഷണം പുതിയ വഴിത്തിരിവിലേക്ക്. ഷാഫിയെ കുത്തിപ്പരിക്കേല്പ്പിച്ച പ്രതി പ്രമോദ് ലക്ഷ്യം വച്ചത് മറ്റ് രണ്ട് ഉദ്യോഗസ്ഥരെയെന്ന നിഗമനത്തിലാണ് പോലീസ്. ടൗണ് പോലീസ് സ്റ്റേഷന് മുന്നിലുള്ള ഹോട്ടലില് വച്ച് പ്രതി ഒരു ഹോട്ടല് ജീവനക്കാരനുമായി തര്ക്കത്തിലേര്പ്പെട്ടു.
ആ സമയം ചായ കുടിക്കാനെത്തിയ എസ്ഐ ഷാഫി തര്ക്കത്തില് ഇടപെടുകയും പ്രതിയെ ശാന്തനാക്കാന് ശ്രമിക്കുകയും ചെയ്തു. തര്ക്കം പരിഹരിച്ച് പ്രതിയെ ഹോട്ടലിന് പുറത്തേക്ക് വിട്ടെങ്കിലും, പുറത്തു കാത്തുനിന്ന പ്രമോദ് ഷാഫി തിരികെ വരുന്നതിനിടെ കത്തിയെടുത്ത് കുത്തുകയായിരുന്നു. കുത്തേറ്റ എസ്ഐ ഷാഫി ആശുപത്രിയില് ചികിത്സയിലാണ്. പ്രതി പ്രമോദ് നിലവില് പോലീസ് കസ്റ്റഡിയിലാണ്. ഷാഫിയോട് പ്രതിക്ക് നേരിട്ട് വൈരാഗ്യമില്ലായിരുന്നെന്നും, പോലീസ് സേനയോടുള്ള പൊതുവായ പകയാണ് അക്രമത്തിലേക്ക് നയിച്ചതെന്നും പോലീസ് സ്ഥിരീകരിച്ചു.
നേരത്തെ മറ്റൊരു കേസില് പ്രമോദിനെ അറസ്റ്റ് ചെയ്ത രണ്ട് ഉദ്യോഗസ്ഥര് നിലവില് ടൗണ് പോലീസ് സ്റ്റേഷനിലാണ് ജോലി ചെയ്യുന്നത്. ഇവരെ ലക്ഷ്യം വച്ച് കത്തി കൈയില് കരുതിയിരുന്നതായി പ്രതി പലരോടും പറഞ്ഞതായുള്ള വിവരം പോലീസിന് ലഭിച്ചിട്ടുണ്ട്. ഇതുസംബന്ധിച്ച കൂടുതല് അന്വേഷണത്തിലേക്ക് കടന്നിരിക്കുകയാണ് പോലീസ്. കുത്തേറ്റ ഷാഫിയുമായി മുന് വൈരാഗ്യം ഒന്നുമില്ലെന്നാണ് പ്രതിയുടെ മൊഴി. പ്രമോദ് പ്രതിയായ പഴയ കേസുകളുടെ വിശദാംശങ്ങളും പോലീസ് ശേഖരിച്ചു. ശനിയാഴ്ച വൈകുന്നേരം പോലീസ് സ്റ്റേഷന് മുന്നിലെ ഹോട്ടലില് വച്ചുണ്ടായ തര്ക്കത്തിനെ തുടര്ന്നാണ് പ്രതി എസ്ഐയ്ക്കെതിരെ ആക്രമണം നടത്തിയത്.
വെസ്റ്റ് ഹില് സ്വദേശിയായ പ്രമോദ് എട്ട് ക്രിമിനല് കേസുകളില് പ്രതിയാണ്. കോഴിക്കോട് ഡെപ്യൂട്ടി കളക്ടറുടെ വാഹനം തല്ലിത്തകര്ത്തതും, ബൂത്ത് കയ്യേറി വോട്ടിംഗ് മെഷീന് നശിപ്പിച്ചതും ഉള്പ്പെടെയുള്ള കേസുകള് ഇയാള്ക്കെതിരെയുണ്ട്. മുന്പ് മറ്റൊരു കേസില് ഇയാളെ അറസ്റ്റ് ചെയ്ത ഉദ്യോഗസ്ഥരോടുള്ള പകയാണ് അക്രമത്തിന് പിന്നില്. അന്നത്തെ അറസ്റ്റിനിടെ താന് മര്ദ്ദനമേറ്റുവെന്നും, ജയിലില് നിന്ന് പുറത്തിറങ്ങിയാല് പോലീസുകാരെ നേരിടുമെന്നും ഇയാള് സുഹൃത്തുക്കളോട് പറഞ്ഞിരുന്നു. അക്രമത്തിന് മുന്കൂട്ടി പ്ലാന് ചെയ്ത പ്രമോദ്, സിപിഒ നിറാസിന്റെ ഫോട്ടോ പേഴ്സില് സൂക്ഷിച്ചിരുന്നു. ഇയാള് മാവോയിസ്റ്റുകളുമായി ബന്ധപ്പെട്ട കേസിലും പ്രതിയാണ്.
പ്രമോദ് നേരത്തെ മാവോയിസ്റ്റുകളുമായി ബന്ധപ്പെട്ട കേസില് പ്രതിയായിരുന്നു. പോലീസിനോടും ഭരണകൂടത്തോടുമുള്ള ഇയാളുടെ കടുത്ത ശത്രുതയ്ക്ക് പിന്നില് ഈ പ്രത്യയശാസ്ത്ര ബന്ധമുണ്ടെന്ന് സംശയിക്കുന്നു. എസ്ഐ ഷാഫിയെ കുത്തിപ്പരിക്കല്പ്പിച്ച ശേഷം പോലീസ് കസ്റ്റഡിയിലെടുക്കുമ്പോള് ഇയാള് പോലീസിനെതിരെയും സര്ക്കാരിനെതിരെയും പ്രകോപനപരമായ മുദ്രാവാക്യങ്ങള് മുഴക്കിയിരുന്നു. ഇത് ആസൂത്രിതമായ ഒരു പ്രതിഷേധത്തിന്റെ ഭാഗമാണോ എന്ന് പോലീസ് പരിശോധിക്കുന്നുണ്ട്.
മുന്പ് മറ്റൊരു കേസില് തന്നെ അറസ്റ്റ് ചെയ്തത് ടൗണ് സ്റ്റേഷനിലെ രണ്ട് പോലീസുകാരായിരുന്നു. അന്നത്തെ അറസ്റ്റിനിടയില് മര്ദ്ദനമേറ്റെന്ന് വിശ്വസിക്കുന്ന പ്രമോദ്, പോലീസിനെ പാഠം പഠിപ്പിക്കാന് ഉറച്ചാണ് ജയിലില് നിന്നിറങ്ങിയത്. മാവോയിസ്റ്റ് സംഘടനകള് സാധാരണയായി സ്വീകരിക്കുന്ന 'പോലീസ് വിരുദ്ധ' നിലപാടുകള് ഇയാളെ ഈ നീക്കത്തിന് പ്രേരിപ്പിച്ചിട്ടുണ്ടാകാം. ഡെപ്യൂട്ടി കളക്ടറുടെ വാഹനം തകര്ത്തതും തിരഞ്ഞെടുപ്പ് ബൂത്ത് ആക്രമിച്ചതും ഇയാളുടെ തീവ്ര നിലപാടുകളുടെ ഉദാഹരണങ്ങളായി പോലീസ് ചൂണ്ടിക്കാട്ടുന്നു.
