'അഴിമതി നടത്തിയാല് അത് നാണക്കേടോടെ തന്നെ അനുഭവിക്കേണ്ടി വരും'; വയര്ലെസിലൂടെ 'അഴിമതി വിരുദ്ധ' സന്ദേശം നല്കി തിരുവനന്തപുരം റൂറല് എസ് പി; പൂവാറിലെ നടപടി പോലീസിന് താക്കീതാകുമ്പോള്
തിരുവനന്തപുരം: പോലീസ് സേനയിലെ അഴിമതിക്കാരെ തുറന്നുകാട്ടാനും നടപടിയെടുക്കാനും ഔദ്യോഗിക വയര്ലെസ് സന്ദേശവും. പൂവാര് സ്റ്റേഷനിലെ രണ്ട് എസ്ഐമാരെ കൈക്കൂലി ആരോപണത്തിന്റെ പേരില് സ്ഥലം മാറ്റിയത് വയര്ലെസിലൂടെ പരസ്യമായി പ്രഖ്യാപിച്ച നടപടി പോലീസിന്റെ ചരിത്രത്തില് തന്നെ അപൂര്വ്വമാണ്.
സാധാരണ ഗതിയില് സ്ഥലം മാറ്റ ഉത്തരവുകള് രേഖാമൂലം അറിയിക്കുന്നതാണ് രീതി. എന്നാല്, എല്ലാവരും കേള്ക്കുന്ന വയര്ലെസ് സന്ദേശത്തിലൂടെ തന്നെ നടപടി വിവരം പുറത്തുവിട്ടത് മറ്റുദ്യോഗസ്ഥര്ക്കുള്ള കൃത്യമായ താക്കീതാണ്. 'അഴിമതി നടത്തിയാല് അത് നാണക്കേടോടെ തന്നെ അനുഭവിക്കേണ്ടി വരും' എന്ന സന്ദേശമാണ് ഇതിലൂടെ എസ്പി നല്കുന്നത്.
പൂവാര് സ്റ്റേഷനുമായി ബന്ധപ്പെട്ട് നേരത്തെയും പല പരാതികളും ഉയര്ന്നിരുന്നു. മണല് മാഫിയയുമായും സാമൂഹിക വിരുദ്ധരുമായും ചില ഉദ്യോഗസ്ഥര്ക്കുള്ള അവിശുദ്ധ ബന്ധം പോലീസിന്റെ വിശ്വാസ്യതയെ ബാധിക്കുന്ന ഘട്ടത്തിലാണ് ജില്ലാ പോലീസ് മേധാവി നേരിട്ട് ഇടപെട്ടത്. ജോസ്, ബിനു ജസ്റ്റസ് എന്നീ എസ്ഐമാര്ക്കെതിരെയുള്ള നടപടി ഉദാഹരണമായി കാട്ടി സേനയെ ശുദ്ധീകരിക്കാനാണ് നീക്കം.
പരാതിക്കാരുടെ കൈയ്യില് നിന്ന് പണം വാങ്ങുന്ന രീതി പോലീസ് സ്റ്റേഷനുകളില് തുടരുന്നത് സര്ക്കാരിനും ആഭ്യന്തര വകുപ്പിനും വലിയ തലവേദനയാണ്. പോലീസിലെ ക്രിമിനലുകളെയും അഴിമതിക്കാരെയും പിരിച്ചുവിടുന്ന നടപടികള് സംസ്ഥാന വ്യാപകമായി നടക്കുമ്പോള്, തലസ്ഥാനത്തെ ഈ വയര്ലെസ് സന്ദേശം അഴിമതിക്കെതിരെയുള്ള 'സീറോ ടോളറന്സ്' നയത്തിന്റെ ഭാഗമാണ്.
ഉയര്ന്ന ഉദ്യോഗസ്ഥന് തന്നെ കീഴുദ്യോഗസ്ഥരുടെ വീഴ്ചകള് പരസ്യമായി വിളിച്ച് പറയുന്നത് സേനയുടെ മനോവീര്യത്തെ ബാധിക്കുമെന്ന് ഒരു വിഭാഗം വാദിക്കുമ്പോഴും, തെറ്റുകാരെ സംരക്ഷിക്കില്ലെന്ന നിലപാടിന് പൊതുജന മധ്യത്തില് വലിയ സ്വീകാര്യതയാണ് ലഭിക്കുന്നത്. വരും ദിവസങ്ങളില് ജില്ലയിലെ മറ്റു സ്റ്റേഷനുകളിലും സമാനമായ പരിശോധനകളും നടപടികളും ഉണ്ടാകുമെന്ന സൂചനയാണിത്.
