ലണ്ടൻ: ആകാശമധ്യേ വിമാനത്തിൽ വെച്ച് യാത്രക്കാരി മരിച്ചതിനെത്തുടർന്ന് മൃതദേഹവുമായി ബ്രിട്ടീഷ് എയർവേയ്‌സ് വിമാനം പറന്നത് 13.5 മണിക്കൂർ. ഹോങ്കോങ്ങിൽ നിന്ന് ലണ്ടനിലേക്ക് പുറപ്പെട്ട ബിഎ32 (BA32) വിമാനത്തിലാണ് 60 വയസ്സുള്ള യാത്രക്കാരി മരിച്ചത്. വിമാനത്തിന്റെ പിന്നിലെ ഗാലിയിൽ (ഭക്ഷണം തയ്യാറാക്കുന്ന സ്ഥലം) മൃതദേഹം സൂക്ഷിച്ചാണ് വിമാനം ലണ്ടനിലെ ഹീത്രോ വിമാനത്താവളത്തിലേക്ക് യാത്ര തുടർന്നത്. വിമാനത്തിനുള്ളിൽ മൃതദേഹം അഴുകി ദുർഗന്ധം പടർന്നതായും യാത്രക്കാർക്ക് കടുത്ത മാനസിക പ്രയാസം നേരിട്ടതായും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

എയർബസ് എ350-1000 വിമാനം ഹോങ്കോങ്ങിൽ നിന്ന് പറന്നുയർന്ന് ഏകദേശം ഒരു മണിക്കൂർ പിന്നിട്ടപ്പോഴാണ് ദാരുണമായ മരണം സംഭവിച്ചത്. സാധാരണയായി യാത്രയ്ക്കിടയിലെ മരണം 'മെഡിക്കൽ എമർജൻസി' ആയി കണക്കാക്കാറില്ലാത്തതിനാൽ, വിമാനം തിരികെ ഹോങ്കോങ്ങിലേക്ക് വിടാനോ അടുത്തുള്ള വിമാനത്താവളത്തിൽ ഇറക്കാനോ പൈലറ്റുമാർ തയ്യാറായില്ല. പകരം ലക്ഷ്യസ്ഥാനമായ ലണ്ടനിലേക്ക് തന്നെ യാത്ര തുടരാൻ തീരുമാനിക്കുകയായിരുന്നു.

മൃതദേഹം എവിടെ സൂക്ഷിക്കണമെന്ന കാര്യത്തിൽ ജീവനക്കാർക്കിടയിൽ വലിയ തർക്കം നടന്നു. ആദ്യം മൃതദേഹം ടോയ്‌ലറ്റിൽ വെക്കാൻ ആലോചിച്ചെങ്കിലും അത് പ്രായോഗികമല്ലെന്ന് കണ്ട് ഒഴിവാക്കി. ഒടുവിൽ മൃതദേഹം പൊതിഞ്ഞ് വിമാനത്തിന്റെ പിന്നിലെ ഗാലിയിലേക്ക് മാറ്റി.

മൃതദേഹം കിടത്തിയ ഗാലിയിലെ തറ ചൂടാക്കുന്ന സംവിധാനം (Heated floor) പ്രവർത്തിക്കുന്നുണ്ടായിരുന്നു. ഇത് ശ്രദ്ധിക്കാതെ മൃതദേഹം അവിടെ സൂക്ഷിച്ചത് മൃതദേഹം വേഗത്തിൽ അഴുകാനും വിമാനത്തിനുള്ളിൽ അസഹനീയമായ ദുർഗന്ധം പടരാനും കാരണമായി. മരിച്ച സ്ത്രീയുടെ കുടുംബാംഗങ്ങളും മറ്റ് യാത്രക്കാരും വിമാനം തിരികെ ഹോങ്കോങ്ങിലേക്ക് വിടണമെന്ന് ആവശ്യപ്പെട്ടെങ്കിലും അധികൃതർ അത് നിരാകരിച്ചു. 331 യാത്രക്കാരാണ് വിമാനത്തിൽ ഉണ്ടായിരുന്നത്.

13 മണിക്കൂർ നീണ്ട ദുരിതയാത്രയ്ക്കൊടുവിൽ വിമാനം ലണ്ടനിലെ ഹീത്രോയിൽ ലാൻഡ് ചെയ്തു. വിമാനം നിലത്തിറങ്ങിയ ഉടൻ തന്നെ ലണ്ടൻ പോലീസ് വിമാനത്തിനുള്ളിൽ പ്രവേശിച്ച് നടപടികൾ ആരംഭിച്ചു. അന്വേഷണം പൂർത്തിയാകുന്നത് വരെ 45 മിനിറ്റോളം യാത്രക്കാർക്ക് വിമാനത്തിൽ തന്നെ ഇരിക്കേണ്ടി വന്നു. പശ്ചിമേഷ്യയിലെ യുദ്ധവും മറ്റ് നയതന്ത്ര പ്രതിസന്ധികളും ആഗോളതലത്തിൽ ചർച്ചയാകുമ്പോൾ, വിമാനക്കമ്പനികളുടെ ഇത്തരം മനുഷ്യത്വമില്ലാത്ത നടപടികൾ വലിയ വിമർശനങ്ങൾക്ക് വഴിവെച്ചിരിക്കുകയാണ്.

ബ്രിട്ടീഷ് എയർവേയ്‌സ്വിമാനം

മറുനാടൻ മലയാളി ബ്യൂറോ