പെണ്ണിന്റെ കഴുത്തിൽ താലിക്കെട്ടിയതും ചുറ്റും അസാധാരണ കാഴ്ചകൾ; ഒറ്റ നിമിഷം കൊണ്ട് ഇരച്ചെത്തിയത് ഒമ്പത് കൂറ്റൻ ലോറികൾ; എല്ലാം കണ്ട് അമ്പരന്ന് അതിഥികൾ; സത്യാവസ്ഥ അറിഞ്ഞപ്പോൾ ആശ്വാസം
ബെയ്ജിങ്: സാധാരണയായി ആഡംബര കാറുകളിലും പൂക്കളാൽ അലങ്കരിച്ച വാഹനങ്ങളിലുമാണ് വിവാഹ ഘോഷയാത്രകൾ നടക്കാറുള്ളത്. എന്നാൽ ചൈനയിൽ നടന്ന ഒരു വിവാഹം ഇതിൽ നിന്നെല്ലാം വ്യത്യസ്തമായി ലോകശ്രദ്ധ നേടുകയാണ്. ഒൻപത് സെപ്റ്റിക് ടാങ്ക് ലോറികളിലാണ് വരൻ വധുവിനെ കൂട്ടിക്കൊണ്ടുപോകാൻ എത്തിയത്. തന്റെ തൊഴിലിനോടുള്ള ആദരസൂചകമായി വരൻ നടത്തിയ ഈ വേറിട്ട നീക്കം സോഷ്യൽ മീഡിയയിൽ വൈറലായി.
ചൈനയിലെ അൻഹുയി പ്രവിശ്യയിൽ നിന്നുള്ള മുപ്പതുകാരനായ പാൻ ഹാവോനാൻ ആണ് ഈ വ്യത്യസ്തമായ വിവാഹയാത്രയ്ക്ക് പിന്നിൽ. ഫിലിം എഡിറ്റിംഗിൽ ബിരുദധാരിയായ പാൻ, തന്റെ സ്വന്തം സ്റ്റാർട്ടപ്പ് പരാജയപ്പെട്ടതോടെയാണ് പിതാവിന്റെ സെപ്റ്റിക് ടാങ്ക് ക്ലീനിംഗ് ബിസിനസ്സിലേക്ക് ഇറങ്ങിയത്. മലിനജല സംസ്കരണ മേഖലയിൽ 20 വർഷത്തിലേറെ പരിചയമുള്ള പിതാവിനെ സഹായിക്കാൻ എത്തിയ പാൻ, തന്റെ ജോലിയിൽ വലിയ അഭിമാനം കണ്ടെത്തുകയായിരുന്നു.
സാധാരണയായി മോശം ജോലിയായി പലരും കരുതുന്ന ഈ പ്രൊഫഷനോടുള്ള തന്റെ ആദരവ് പ്രകടിപ്പിക്കാനാണ് വിവാഹത്തിന് സെപ്റ്റിക് ടാങ്ക് ലോറികൾ ഉപയോഗിക്കാൻ പാൻ തീരുമാനിച്ചത്.
പാനിന്റെ ഈ ആഗ്രഹം കേട്ട് വധു ലി യാക്കിംഗ് ഒട്ടും അത്ഭുതപ്പെട്ടില്ല. പകരം, അദ്ദേഹത്തിന്റെ ആശയത്തിന് അവർ പൂർണ്ണ പിന്തുണ നൽകി. കഠിനാധ്വാനത്തിലൂടെ സത്യസന്ധമായി പണം സമ്പാദിക്കുന്ന പാനിന്റെ ജോലി ഏതൊരു പ്രൊഫഷനെയും പോലെ മാന്യമാണെന്ന് ലി പറഞ്ഞു. ഈ ലോറി യാത്ര തനിക്ക് വളരെ മനോഹരമായും വ്യത്യസ്തമായും തോന്നിയെന്നും അവർ കൂട്ടിച്ചേർത്തു. പാനിന്റെ മാതാപിതാക്കൾക്ക് ആദ്യം ഈ കാര്യത്തിൽ മടിയുണ്ടായിരുന്നെങ്കിലും വധുവിന്റെയും വരന്റെയും ഉറച്ച തീരുമാനം അവർ അംഗീകരിക്കുകയായിരുന്നു.
മാർച്ച് 28-നായിരുന്നു പാനിന്റെയും ലിയുടെയും വിവാഹം. ഒൻപത് ലോറികളാണ് വിവാഹ ഘോഷയാത്രയ്ക്കായി അണിനിരന്നത്. ഇതിൽ രണ്ട് ലോറികൾ പാനിന്റെ സ്വന്തം കമ്പനിയിലേതും ബാക്കിയുള്ളവ സഹപ്രവർത്തകരുടേതുമായിരുന്നു. ലോറികൾ എല്ലാം നന്നായി കഴുകി വൃത്തിയാക്കി ചുവന്ന കടലാസ് പൂക്കൾ കൊണ്ട് മനോഹരമായി അലങ്കരിച്ചിരുന്നു. ലോറികൾ നിരനിരയായി റോഡിലൂടെ നീങ്ങുന്നത് കണ്ട് നാട്ടുകാരും അത്ഭുതപ്പെട്ടു.
"ജോലിയിൽ അഴുക്ക് പുരളുന്നുണ്ടാകാം, എന്നാൽ അതിൽ നിന്നുള്ള വരുമാനം തികച്ചും സത്യസന്ധമാണ്. മറ്റ് പല മേഖലകളെക്കാളും സുരക്ഷിതവുമാണ് ഈ തൊഴിൽ," എന്ന് പാൻ അഭിമാനത്തോടെ പറയുന്നു. സോഷ്യൽ മീഡിയയിൽ വീഡിയോ വൈറലായതോടെ വലിയ രീതിയിലുള്ള പിന്തുണയാണ് ദമ്പതികൾക്ക് ലഭിക്കുന്നത്. തൊഴിലിന്റെ മഹത്വം ഉയർത്തിപ്പിടിച്ച പാനിനെയും അദ്ദേഹത്തിന് കരുത്തുറ്റ പിന്തുണ നൽകിയ ലിയെയും നിരവധിപ്പേർ അഭിനന്ദിച്ചു. കപടമായ ആഡംബരങ്ങളേക്കാൾ സത്യസന്ധമായ ജീവിതത്തിന് പ്രാധാന്യം നൽകുന്ന ഇത്തരം തീരുമാനങ്ങൾ സമൂഹത്തിന് നല്ലൊരു മാതൃകയാണെന്ന് പലരും അഭിപ്രായപ്പെട്ടു.
