ഗെയിൻസ്വിൽ: കോളേജ് ബാസ്കറ്റ്ബോൾ ചരിത്രത്തിലെ ഏറ്റവും ഉയരം കൂടിയ കളിക്കാരനെന്ന റെക്കോർഡുമായ ഒളിവിയർ റിയോക്സ്. ഫ്ലോറിഡ ഗേറ്റേഴ്സിനായി താരം അരങ്ങേറ്റം കുറിച്ചത്. 7 അടി 9 ഇഞ്ച് ഉയരമുള്ള റിയോക്സ് അരങ്ങേറ്റ മത്സരത്തിൽ നോർത്ത് ഫ്ലോറിഡ ഓസ്പ്രീസിനെതിരെ 104-64 ന് ഫ്ലോറിഡ ഗേറ്റേഴ്സ് വിജയിച്ചിരുന്നു. 19 വയസ്സുള്ള റിയോക്സ്, കാനഡയിലെ മോൺട്രിയലിൽ നിന്നുള്ള താരമാണ്. ഷാക്വിൽ ഓ'നീൽ, ഗിയോർഗെ മുരേസൻ, മനുട്ടെ ബോൾ തുടങ്ങിയ ഇതിഹാസ താരങ്ങളെക്കാൾ ഉയരമുണ്ട് റിയോക്സിന്.

മത്സരം അവസാനിക്കാൻ 2 മിനിറ്റ് 9 സെക്കൻഡ് ബാക്കി നിൽക്കേയാണ് താരത്തെ കളത്തിലിറക്കിയത്. വലിയ ആവേശത്തോടെയാണ് താരത്തെ കാണികൾ കളിക്കളത്തിലേക്ക് വരവേറ്റത്. ഇതിന്റെ ദൃശ്യങ്ങൾ സാമൂഹ്യ മാധ്യമങ്ങളിൽ വൈറലായിരുന്നു. കളത്തിലിറങ്ങിയ റിയോക്കിനെ സഹതാരങ്ങളും എതിർ ടീമിലെ കളിക്കാരും അമ്പരപ്പോടെയാണ് നോക്കിയത്. നോർത്ത് ഫ്ലോറിഡയുടെ 6 അടി 8 ഇഞ്ച് ഉയരമുള്ള ട്രേ കാഡി റിയോക്കിന്റെ ഉയരം കണ്ട് പുഞ്ചിരിക്കുന്ന ദൃശ്യങ്ങൾ സാമൂഹിക മാധ്യമങ്ങളിൽ വൈറലായി.

ഈ മത്സരത്തിൽ റിയോക്സിന് പോയിൻ്റുകൾ നേടാൻ കഴിഞ്ഞില്ലെങ്കിലും, അദ്ദേഹത്തിൻ്റെ അരങ്ങേറ്റം കോളേജ് ബാസ്കറ്റ്ബോൾ ചരിത്രത്തിൽ ഇടംപിടിച്ചു. 7 അടി 7 ഇഞ്ച് ഉയരമുണ്ടായിരുന്ന കെൻ്റി ജോർജ് (UNC അഷെവിൽ), മൈക്ക് ലാനിയർ (ഹാർഡിൻ-സിമ്മൺസ്) എന്നിവരെയാണ് റിയോക്സ് മറികടന്നത്. 'വളരെ നല്ല അനുഭവമായിരുന്നു. സഹകളിക്കാർ, ആരാധകർ എല്ലാവരുടെയും പിന്തുണ അദ്ഭുതകരമായിരുന്നു. എല്ലാവരും എന്നെ പിന്തുണച്ചു, അതിന് ഞാൻ വളരെ നന്ദിയുള്ളവനാണ്.' എന്നായിരുന്നു മത്സരശേഷം റിയോക്സ് പ്രതികരിച്ചത്. റിയോക്സിനെ കളത്തിലിറക്കാൻ കോച്ച് ടോഡ് ഗോൾഡന് സമ്മർദ്ദമുണ്ടായിരുന്നു.

കോളേജ് ബാസ്കറ്റ്ബോൾഒളിവിയർ റിയോക്സ്ഫ്ലോറിഡ ഗേറ്റേഴ്സ്

സ്വന്തം ലേഖകൻ