യുദ്ധക്കപ്പലുകളും അന്തര്‍വാഹിനികളും ശംഖുമുഖത്ത് നങ്കൂരമിട്ടു; വ്യോമസേനാ ദിനത്തിന് ഒരുങ്ങുമ്പോള്‍ ആശങ്കയായി പാങ്ങോട്ടെ ബംഗാളിയുടെ നുഴഞ്ഞു കയറ്റം; പധാന കവാടത്തിലൂടെ അല്ല ഇയാള്‍ അതീവ സുരക്ഷാ മേഖലയില്‍ എത്തിയത് എന്ന് നിഗമനം; മിലിറ്ററി ക്യാമ്പിലേക്ക് 19-കാരന്‍ അതിക്രമിച്ചു കയറിയത് എന്തിന്? തിരുവനന്തപുരത്ത് സൈന്യം ജാഗ്രതയില്‍
തിരുവനന്തപുരം: പാങ്ങോട് മിലിറ്ററി സ്റ്റേഷനിലേക്ക് അതിക്രമിച്ചു കയറിയ യുവാവിനെ വിശദമായി ചോദ്യം ചെയ്യും. ക്യാമ്പിനുള്ളിലൂടെ കിലോമീറ്ററോളം നടന്ന ശേഷമാണ് മിലിറ്ററി പൊലീസ് ഇയാളെ കാണുന്നതും കസ്റ്റഡിയിലെടുത്തതും. ഇത് വലിയ സുരക്ഷാ വീഴ്ചയാണ്. ഈ സാഹചര്യത്തില്‍ നിരീക്ഷണം കൂടുതല്‍ ശക്തമാക്കും. പൂജപ്പുര സ്റ്റേഷനിലെത്തിച്ച യുവാവിനെ രഹസ്യന്വേഷണ വിഭാഗം ചോദ്യം ചെയ്യുകയാണ്. തിരുവനന്തപുരത്ത് സൈന്യം അതീവ ജാഗ്രതയിലാണ്.
തിരുവനന്തപുരത്ത് നാവിക സേനയുടെ സൈനികാഭ്യാസം നടക്കാനിരിക്കെയാണ്. ഡിസംബര്‍ മൂന്നിനാണ് രാഷ്ട്രപതി ദ്രൗപതി മുര്‍മു മുഖ്യാതിഥിയാകുന്ന നാവിക സേന ദിനാഘോഷം. ആഘോഷത്തിന്റെ ഭാഗമായുള്ള അഭ്യാസ പ്രകടനങ്ങളില്‍ പങ്കെടുക്കാനായി നാവിക സേന കപ്പലുകള്‍ ശംഖമുഖത്ത് എത്തിത്തുടങ്ങുകയാണ്. ഇന്ത്യന്‍ നാവിക സേന ദിനാഘോഷം ആദ്യമായി കേരളത്തിലെത്തുകയാണെന്നതാണ് പ്രത്യേകത. നാവികസേനയുടെ പടക്കപ്പലുകളും, അന്തര്‍വാഹിനികളും, യുദ്ധവിമാനങ്ങളുമെല്ലാം ആഘോഷത്തിന്റെ ഭാഗമായുള്ള അഭ്യാസപ്രകടനങ്ങളില്‍ പങ്കെടുക്കാന്‍ ശംഖുമുഖത്തെത്തും. ഇതിനിടെയാണ് തിരുവനന്തപുരത്തെ മിലിറ്ററി ക്യാമ്പിലേക്കുള്ള നുഴഞ്ഞു കയറ്റം. ഈ സാഹചര്യത്തിലാണ് സൈന്യം അതീവ ജാഗ്രതയിലേക്ക് മാറുന്നത്.
വെള്ളിയാഴ്ച രാത്രിയിലാണ് സുരക്ഷാ ഉദ്യോഗസ്ഥരെ വെട്ടിച്ച് കോല്‍ക്കത്ത സ്വദേശിയായ ബല്‍മാണി ബെറാമു എന്ന യുവാവ് ക്യാമ്പിനുള്ളില്‍ കടന്നത്.കേരളത്തിലേക്ക് ഇയാള്‍ എത്തിയിട്ട് കുറച്ചധികം കാലമായെന്നും വിവിധ ജോലികള്‍ ചെയ്തുവരികയാണെന്നുമാണ് ലഭിക്കുന്ന വിവരം. കൊല്‍ക്കത്ത സ്വദേശിയായ 19കാരന്‍ ഇന്നലെ രാത്രിയാണ് മിലിറ്ററി ക്യാമ്പിലേക്ക് അതിക്രമിച്ചു കയറിയത്. മിലിറ്റിറി ക്യാമ്പിനുള്ളിലേക്ക് പൊതുജനങ്ങള്‍ക്ക് പ്രവേശനം അനുവദിച്ചിട്ടില്ല. സുരക്ഷ ക്രമീകരണങ്ങള്‍ മറികടന്നാണ് യുവാവ് ക്യാമ്പിനുള്ളില്‍ കയറിയത്. മിലിറ്ററി സ്റ്റേഷന്‍ പരിധിക്കുള്ളില്‍ അനുവാദമില്ലാതെ പ്രവേശിക്കുന്നത് കുറ്റകരമാണ്. പിടികൂടി കസ്റ്റഡിയിലെടുത്ത ശേഷം ബല്‍മണി ബറാമുവിനെ പൂജപ്പുര പൊലീസ് സ്റ്റേഷനിലേക്കാണ് എത്തിച്ചത്.
യുവാവ് ക്യാമ്പിന്റെ പ്രധാന കവാടത്തിലൂടെയല്ല, മറിച്ച് മറ്റേതെങ്കിലും മാര്‍ഗ്ഗത്തിലൂടെയാണ് കടന്നുകയറിയതെന്ന് പ്രതിരോധ വൃത്തങ്ങള്‍ സൂചിപ്പിച്ചു. എന്നാല്‍ ഇയാള്‍ എങ്ങനെയാണ് സുരക്ഷാ വലയം ഭേദിച്ച് അകത്തുകടന്നതെന്ന് ഇപ്പോഴും വ്യക്തമല്ല. സൈനിക ഉദ്യോഗസ്ഥര്‍ പിടികൂടിയ ഉടന്‍ തന്നെ മിലിട്ടറി ഇന്റലിജന്‍സ് വിഭാഗം ഇയാളെ ചോദ്യം ചെയ്യലിന് വിധേയനാക്കി. ചോദ്യം ചെയ്യലില്‍ ഇയാള്‍ക്ക് മാനസികാസ്വാസ്ഥ്യമുണ്ടെന്ന് ബോധ്യമായതിനെത്തുടര്‍ന്നാണ് പോലീസിന് കൈമാറാന്‍ തീരുമാനിച്ചതെന്ന് സൈനിക വൃത്തങ്ങള്‍ വ്യക്തമാക്കി.
പിടിയിലായ യുവാവ് ബംഗാള്‍ സ്വദേശിയാണെന്ന് മാത്രമാണ് പോലീസിനോട് ആവര്‍ത്തിച്ചു പറയുന്നത്. കൂടുതല്‍ വിവരങ്ങള്‍ നല്‍കാത്തത് അന്വേഷണ ഉദ്യോഗസ്ഥരെ വലയ്ക്കുന്നുണ്ട്. ഇയാള്‍ കേരളത്തിലെത്തിയത് എങ്ങനെയെന്നും, സൈനിക ക്യാമ്പിനുള്ളില്‍ അതിക്രമിച്ചുകടന്നതിന്റെ യഥാര്‍ത്ഥ ഉദ്ദേശ്യമെന്താണെന്നും കണ്ടെത്താനുള്ള ശ്രമങ്ങള്‍ പൂജപ്പുര പോലീസ് ഊര്‍ജ്ജിതമാക്കിയിരിക്കുകയാണ്. ഇയാള്‍ക്ക് മാനസികാസ്വാസ്ഥ്യമുണ്ടെന്ന് പൂജപ്പുര പോലീസ് സ്റ്റേഷനിലെ ഉദ്യോഗസ്ഥരും സ്ഥിരീകരിച്ചു.
യുവാവിന്റെ പശ്ചാത്തലം, യാത്രാവിവരങ്ങള്‍, മാനസികനില എന്നിവ സംബന്ധിച്ച വിവരങ്ങള്‍ ശേഖരിക്കുന്നതിനായി പോലീസ് അന്വേഷണം വ്യാപിപ്പിച്ചിട്ടുണ്ട്. ഈ സംഭവത്തെ അതീവ ഗൗരവത്തോടെയാണ് അധികൃതര്‍ കാണുന്നത്.
