പെരുമ്പാവൂർ സിഗ്നൽ ജംഗ്ഷനിലുണ്ടായത് വൻ അപകടം; കോണ്ടോട്ടി ആർട്‌സ് ആൻഡ് സയൻസ് കോളേജിലെ വിദ്യാർത്ഥികൾക്ക് ആർക്കും ഗുരുതര പരിക്കില്ല; മൂന്നാറിൽ നിന്നുള്ള വിദ്യാർത്ഥി യാത്ര അർദ്ധരാത്രിയായത് ചട്ടവിരുദ്ധം; ലോറിയുമായി കൂട്ടിയിടിച്ച് ബസ് മറിഞ്ഞു; ഡ്രൈവർമാരുടെ ഉറക്കം സംശയത്തിൽ
കൊച്ചി: എറണാകുളം പെരുമ്പാവൂരിൽ കോളേജ് ബസും ലോറിയും കൂട്ടിയിടിച്ച് ഉണ്ടായത് വൻ അപകടം. 20 വിദ്യാർത്ഥികൾക്ക് പരിക്കേറ്റു. ലോറിയും കൂട്ടിയിടിച്ച ബസ് മറിഞ്ഞു. പരിക്കേറ്റ 20 പേരിൽ ഗുരുതരമായി പരിക്കേറ്റ മൂന്ന് വിദ്യാർത്ഥികളെ എറണാകുളം രാജഗിരി ആശുപത്രിയിലേക്ക് മാറ്റി. മറ്റുള്ളവരെ പെരുമ്പാവൂരിലേ ആശുപത്രിയിലേക്കും മാറ്റി. ഇവരുടെ പരിക്ക് ഗുരുതരമല്ല. ലോറി ഡ്രൈവർക്കും പരിക്കേറ്റിട്ടുണ്ട്.
പെരുമ്പാവൂർ സിഗ്നൽ ജംഗ്ഷനിലാണ് അപകടമുണ്ടായത്. കൊണ്ടോട്ടിയിൽനിന്നുള്ള ആർട്‌സ് ആൻഡ് സയൻസ് കോളേജിലെ വിദ്യാർത്ഥികളുമായി വന്ന ബസാണ് അപകടത്തിൽ പെട്ടത്. വിനോദ യാത്ര സംഘമായിരുന്നു. ഇന്ന് പുലർച്ചെ 2.15നാണ് അപകടമുണ്ടായത്. 38 വിദ്യാർത്ഥികളാണ് ബസിലുണ്ടായിരുന്നത്.
ഇതിനുപുറമെ ഒരു അദ്ധ്യാപകനും അദ്ദേഹത്തിന്റെ കുടുംബവും ബസ് ഡ്രൈവറും സഹായിയും ഉണ്ടായിരുന്നു. മൂന്നാറിൽനിന്ന് വിനോദ യാത്ര കഴിഞ്ഞ് കൊണ്ടോട്ടിയിലേക്ക് തിരിച്ചുപോകുന്നതിനിടെ പെരുമ്പാവൂർ സിങ്‌നൽ ജംങ്ഷനിൽ വെച്ച് മൂവാറ്റുപ്പുഴ ഭാഗത്തേക്ക് പോകുന്ന ലോറിയുമായി കൂട്ടിയിടിക്കുകയായിരുന്നു.
രാത്രിയിൽ വിദ്യാഭ്യാസ സ്ഥാപനങ്ങളിൽനിന്നും വിനോദ യാത്ര പോകുന്നതിന് സംസ്ഥാനത്ത് വിലക്ക് നിലനിൽക്കെയാണ് അതിരാവിലെയുള്ള യാത്രക്കിടെ വിനോദ യാത്രാ സംഘം സഞ്ചരിച്ച ബസ് അപകടത്തിൽപ്പെട്ടത്. അതുകൊണ്ട് തന്നെ വിശദ അന്വേഷണം ഈ സംഭവത്തിലുണ്ടാകും. രാവിലെ കൊണ്ടോട്ടിയിൽ എത്താൻ വേണ്ടിയായിരുന്നു യാത്രയെന്നാണ് സൂചന.
ഡ്രൈവർമാരിൽ ആരോ ഉറങ്ങിയതും അപകട കാരണമായി വിലയിരുത്തുന്നുണ്ട്. ഭാഗ്യം കൊണ്ടാണ് ആർക്കും ഗുരുതര പരിക്കുണ്ടാകാത്തത്.
