ആന്റണി വർഗ്ഗീസ് അഡ്വാൻസ് വാങ്ങിയത് പെങ്ങളുടെ കല്യാണ കാര്യം പറഞ്ഞുതന്നെ; 10 ലക്ഷം തിരികെ തന്നെങ്കിലും അയാളെ വിശ്വസിച്ച് ചെലവായ തുക അതിലും എത്രയോ; കുടുംബം എന്നു പറയുന്നത് ഒരാൾക്ക് മാത്രം ഉള്ളതല്ല; പെപ്പെ കളഞ്ഞിട്ട് പോയതോടെ ആ സിനിമ അവിടെ നിന്നു; ഇത് പറഞ്ഞില്ലെങ്കിൽ അത് ജൂഡിനോട് ചെയ്യുന്ന പാതകമാകും; പെപ്പെയ്‌ക്കെതിരെ വീഡിയോയുമായി നിർമ്മാതാക്കൾ
കൊച്ചി: മലയാള സിനിമയിൽ ഇത് വിവാദങ്ങളുടെ കാലമാണ്. പണിയിലെ അച്ചടക്കമില്ലായ്മ, ലഹരി, സത്യസന്ധതയില്ലായ്മ, സാമ്പത്തിക ഇടപാടുകളിലെ സുതാര്യതയില്ലായ്മ അങ്ങനെ നിരവധി ആരോപണങ്ങളാണ് യുവനടന്മാർക്കെതിരെ ഉയരുന്നത്. ഷെയിൻ നിഗമും, ശ്രീനാഥ് ഭാസിയുമായി സഹകരിക്കില്ലെന്ന് നിർമ്മാതാക്കൾ പ്രഖ്യാപിച്ചുകഴിഞ്ഞു. അതിനിടെയാണ് 10 ലക്ഷം അഡ്വാൻസ് വാങ്ങിയ ശേഷം നടൻ ആന്റണി വർഗീസ് എന്ന പെപ്പെ സിനിമയിൽ നിന്ന് പിന്മാറിയെന്ന ആരോപണവുമായി സംവിധായകൻ ജൂഡ് ആന്റണി ജോസഫ് കഴിഞ്ഞ ദിവസം രംഗത്തെത്തിയത്. പെങ്ങളുടെ കല്യാണം അഡ്വാൻസ് തുക കൊണ്ട് നടത്തിയിട്ട് പെപ്പെ സിനിമയിൽ നിന്ന് മുങ്ങിയെന്നായിരുന്നു ജൂഡിന്റെ ആരോപണം. എന്നാൽ, ആരോപണം വ്യാജമാണെന്നും, തന്റെ പെങ്ങളുടെ കല്യാണം മാതാപിതാക്കൾ കഷ്ടപ്പെട്ടുണ്ടാക്കിയ കാശ് കൊണ്ട് നടത്തിയതാണെന്നും, വിശദീകരിച്ച് കൊണ്ട് പെപ്പെ വാർത്താസമ്മേളനം നടത്തുകയും തെളിവുകൾ ഹാജരാക്കുകയും ചെയ്തു. ഇതിന് പിന്നാലെ, ആന്റണിയോടും കുടുംബത്തോടും ജൂഡ് മാപ്പ് പറയുകയും ചെയ്തു. ഇതോടെ കഥ തീർന്നെന്ന് കരുതിയാൽ തെറ്റി. പോപ്പെ സിനിമയിൽ നിന്ന് പിന്മാറിയെന്ന ആരോപണത്തിൽ വിശദീകരണവുമായി നിർമ്മാതാവ് അരവിന്ദ് കുറുപ്പും എക്‌സിക്യൂട്ടീവ് പ്രൊഡ്യൂസർ പ്രവീൺ കുമാറും രംഗത്തെത്തി. പ്രൊഡ്യൂസറും എക്‌സിക്യൂട്ടീവ് പ്രൊഡ്യൂസറും സത്യം വെളിപ്പെടുത്തുന്നു എന്ന കുറിപ്പോടെ യൂടൂബിൽ ഇട്ട വീഡിയോയിലാണ് ഇരുവരുടെയും വെളിപ്പെടുത്തൽ.
ചിത്രത്തിലേക്ക് ആന്റണിയുടെ പേര് നിർദ്ദേശിച്ചത് ജൂഡ് ആയിരുന്നു. രണ്ട് ലക്ഷം രൂപ അഡ്വാൻസ് കൊടുക്കാമെന്നായിരുന്നു ആദ്യം തീരുമാനിച്ചത്. എന്നാൽ 10 ലക്ഷം വേണമെന്ന് ആന്റണി ആവശ്യപ്പെട്ടു. 10 ലക്ഷം അഡ്വാൻസ് ആയി വേണമെന്ന് ആന്റണി പറഞ്ഞതിന്റെ കാരണം പെങ്ങളുടെ കല്യാണം തന്നെയാണെന്നും ഇവർ വ്യക്തമാക്കി. യൂട്യൂബ് ചാനലിൽ പങ്കുവച്ച വിഡിയോയിലൂടെയാണ് ഇരുവരുടേയും പ്രതികരണം. 'സത്യം അറിയാൻ താത്പര്യമുള്ളവർക്ക് വേണ്ടി മാത്രം' എന്ന തലക്കെട്ടോടെ ഈ വിഡിയോയും ആന്റണിയുമായുള്ള കരാറിന്റെ പകർപ്പും ജൂഡ് പങ്കുവച്ചിട്ടുണ്ട്.
''ഞാനൊരു സിനിമ ചെയ്യാൻ തീരുമാനിക്കുന്നു. ഒരു നല്ല ഗ്രൂപ്പിലാണ് വന്ന് പെട്ടതിന്റെ സന്തോഷം എനിക്കുണ്ടായിരുന്നു. അങ്ങനെ ആ സിനിമയുമായി മുന്നോട്ടുപോയി. ഇപ്പോൾ ഇത് പറയാൻ ഒരു കാരണമുണ്ട്. ഈ രണ്ട് സംഭവങ്ങളും ഞങ്ങൾ കേട്ടിരുന്നു. ഇതിൽ ഞാനാരെയും വിളിക്കാനും പോയില്ല. ഇതൊക്കെ കേട്ടപ്പോൾ ആവശ്യമില്ലാതെ ഇതിലൊരാൾ എനിക്കു വേണ്ടി 'സ്‌കേപ് ഗോട്ട്' ആകാൻ പോകുന്നു എന്നറിഞ്ഞതുകൊണ്ടാണ് ഇങ്ങനെയൊരു വിശദീകരണവുമായി വന്നത്. ഇതിൽ നിന്നും എനിക്കൊരു ലാഭവും ഉണ്ടാകാനും പോകുന്നില്ല. ഇപ്പോൾ ഇതു ഞാൻ പറഞ്ഞില്ലെങ്കിൽ അത് ജൂഡിനോട് ചെയ്യുന്ന പാതകമായി മാറും.
കാസ്റ്റിങ് നോക്കിയ സമയത്ത് ആന്റണിയുടെ പേര് നിർദ്ദേശിച്ചത് ജൂഡ് ആയിരുന്നു. വളരെ നല്ല അഭിപ്രായമാണ് ജൂഡ് പറഞ്ഞത്. കഥയിൽ ആന്റണി വർഗീസ് തൃപ്തനായിരുന്നു. ഈ സിനിമ റിലീസ് ചെയ്താൽ സൂപ്പർഹിറ്റാകുമെന്നു വരെ അന്ന് ചിന്തിച്ചു. രണ്ട് ലക്ഷം രൂപ അഡ്വാൻസ് കൊടുക്കാമെന്നായിരുന്നു ആദ്യം തീരുമാനിച്ചത്. ഞങ്ങൾ ആന്റണിയുമായി കൂടിക്കാഴ്ച നടത്തിയതിനു ശേഷമാണ് പ്രൊഡക്ഷൻ കൺട്രോളർ അദ്ദേഹത്തെ കാണുന്നത്. പുള്ളിക്ക് ഒരു ആവശ്യമുണ്ട്, അതിനാൽ 10 ലക്ഷം രൂപ അഡ്വാൻസ് വേണമെന്ന് പ്രൊഡക്ഷൻ കൺട്രോളർ ഞങ്ങളോട് പറഞ്ഞു. അതുകൊണ്ടാണ് 10 ലക്ഷം രൂപ തന്നെ കൊടുക്കാൻ തീരുമാനിച്ചത്. ആന്റണിയെ അന്ന് ജീവിതത്തിൽ ആദ്യമായാണ് കാണുന്നത്.
27 ജൂൺ 2019-ലാണ് അഡ്വാൻസ് കൊടുക്കുന്നത്. കഥയെപ്പറ്റി ആൻണിക്ക് അറിയാമായിരുന്നു. അജഗജാന്തരത്തിന്റെ ഷൂട്ടിങ് സമയത്താണ് പ്രിന്റ് ചെയ്ത തിരക്കഥ കൊടുക്കുന്നത്. കഥയിൽ യാതൊരു എതിരഭിപ്രായവും അപ്പോൾ ആന്റണി പറഞ്ഞിരുന്നില്ല. കഥ മുഴുവൻ ആന്റണിയെ വായിച്ചു കേൾപ്പിച്ചിരുന്നു. അതിനുശേഷമുള്ള ആഴ്ചകളിലും പിന്നീട് അഭിപ്രായമൊന്നും പറഞ്ഞുമില്ല. ഡിസംബർ ആദ്യവാരമാണ് കാസ്റ്റിങ് വിഡിയോ ഷൂട്ട് ചെയ്യുന്നത്. പുള്ളിയെ കിട്ടാൻ അൽപം ബുദ്ധിമുട്ടിയെങ്കിലും അദ്ദേഹം സഹകരിച്ചു. ജനുവരി 10-ന് സിനിമ ആരംഭിക്കാമെന്ന് പറഞ്ഞു. അജഗജാന്തരത്തിന്റെ ഷൂട്ട് കുറച്ച് ഭാഗങ്ങൾ ബാക്കിയുണ്ട് അത് കഴിഞ്ഞ് ചെയ്യാമെന്ന് പുള്ളി സമ്മതിച്ചു. ഡിസംബർ 10-നാണ് ഈ സംഭവം നടക്കുന്നത്. ആനപ്പറമ്പിൽ വേൾഡ് കപ്പ് എന്ന സിനിമയുടെ മലപ്പുറത്തുള്ള ലൊക്കേഷനിൽ എത്തിയാണ് അദ്ദേഹത്തെ കാണുന്നതും.
അങ്ങനെ ഞങ്ങൾ ബാക്കി വർക്കുകൾ എല്ലാം ചെയ്തു. വടക്കേ ഇന്ത്യയിലാണ് കൂടുതലും ഷൂട്ട്. ഒരു ട്രെയിൻ വാടയ്ക്ക് എടുക്കണമായിരുന്നു. ജനുവരി 10 എന്ന തിയതി വച്ച് റൂം ബുക്കിങ്ങും ഭക്ഷണത്തിന്റെയും യാത്രയുടേയും കാര്യങ്ങൾ അറേഞ്ച് ചെയ്തു. വാരണാസിയിൽ പോയി എല്ലാം തയാറാക്കി. തുടർച്ചയായി ഷൂട്ട് ചെയ്യാനായിരുന്നു പ്ലാൻ. ഇവിടെ കേരളത്തിലും ഹോട്ടലുകളൊക്കെ ബുക്ക് ചെയ്തിരുന്നു. ഡിസംബർ 23-ന് ജൂഡ് അദ്ദേഹത്തെ വിളിച്ചപ്പോഴാണ് സിനിമ ചെയ്യുന്നില്ല, താത്പര്യമില്ലെന്ന് ആന്റണി പറയുന്നത്. ഡിസംബർ 29-ന് സംവിധായകൻ നേരിട്ടു ചെന്ന് കാര്യങ്ങൾ പറഞ്ഞുമനസിലാക്കാൻ ശ്രമിച്ചു. അപ്പോഴും ഇത് ചെയ്യുന്നില്ലെന്ന് അറിയിച്ചു.
സിനിമ ആന്റണി ചെയ്യില്ലെന്ന് 100 ശതമാനം ഉറപ്പായതോടെയാണ് അഡ്വാൻസ് 10 ലക്ഷം തിരികെ ചോദിച്ചത്. ഇതിനൊപ്പം ചെലവായതിന്റെ അഞ്ച് ശതമാനവും ചോദിച്ചിരുന്നു. കൺട്രോളർ മുഖേനയാണ് ഞങ്ങളുമായി ആന്റണി ബന്ധപ്പെട്ടത്. അന്ന് കൈ കൊടുത്ത് പിരിഞ്ഞുവെന്നാണ് ആന്റണി വാർത്താസമ്മേളനത്തിൽ പറഞ്ഞത്, അങ്ങനെ സംഭവിച്ചിട്ടില്ല. ഇന്നു വരെ എന്റെ ഫോണിൽ വിളിച്ചിട്ടുപോലുമില്ല. ചെലവായ പൈസ തരില്ലെന്ന് ആന്റണി അറിയിക്കുകയും ഞങ്ങൾ അത് സമ്മതിക്കുകയും ചെയ്തു. ആറ് മാസം കഴിഞ്ഞ് 2020 ജനുവരി 27-ന് ആന്റണി 10 ലക്ഷം തിരികെ തന്നു.
പൈസ തിരിച്ച് തന്നല്ലോ, പിന്നെ എന്താ പ്രശ്‌നം എന്ന് പലരും ചോദിച്ചു. 10 ലക്ഷം മാത്രമല്ല ചെലവ്. ഒരാളെ വിശ്വസിച്ച് അടുത്ത 45 ദിവസം നമ്മൾ ചെലവാക്കുന്ന തുക വളരെ കൂടുതലാണ്. ഒരാൾ പത്ത് ലക്ഷം രൂപ മേടിച്ചിട്ട് ഒരു വർഷം കഴിഞ്ഞു തിരിച്ചുതരണമെങ്കിൽ അയാൾ എന്റെ സുഹൃത്ത് ആയിരിക്കണം, അല്ലെങ്കിൽ കടപ്പാട് ഉള്ള ആളായിരിക്കണം.
ആന്റണിയുടെ കുടുംബത്തെ ഈ പ്രശ്‌നത്തിലേയ്ക്ക് വലിച്ചിടുന്നത് വിഷമമുള്ള കാര്യം തന്നെയാണ്. കുടുംബം എന്നു പറയുന്നത് ഒരാൾക്ക് മാത്രം ഉള്ളതല്ല. പുള്ളി കളഞ്ഞിട്ട് പോയതോടെ ആ സിനിമ അവിടെ നിന്നു. ആന്റണി സ്വന്തം പ്രശ്‌നങ്ങൾ മാത്രമാണ് ചർച്ച ചെയ്തത്. ഞങ്ങൾക്ക് ആരോടും പരിഭവവും പരാതിയുമില്ല. ഞങ്ങൾ പ്രൊഡക്ഷൻ നിർത്തി, കമ്പനി പിരിച്ചുവിട്ടു. കുടുംബം എല്ലാവർക്കും പ്രധാനമാണ്. ഒരു തീരുമാനം എടുക്കുമ്പോൾ ഉറച്ച് നിൽക്കണം. ജൂഡുമായി ഒരുപാട് വിലയുള്ള ബന്ധമാണ് എനിക്കുള്ളത്. അത് കളയാൻ സാധിക്കില്ല. ഞാൻ ആയതുകൊണ്ടാണ് ജൂഡ് അത്രയും വികാരഭരിതനായത്. ഞാൻ കാരണം ജൂഡിന് ബുദ്ധിമുട്ട് ഉണ്ടാകരുത്.''അരവിന്ദ് പറഞ്ഞു.
''അഡ്വാൻസ് 10 ലക്ഷം വേണമെന്ന് ആന്റണി പറഞ്ഞതിന്റെ കാരണം പെങ്ങളുടെ കല്യാണം തന്നെയാണ്. അത് സത്യാവസ്ഥയാണ്. ആന്റണിയുടെ കുടുംബത്തിന് വിഷമമായി എന്നറിഞ്ഞതിൽ ഞങ്ങൾക്കും സങ്കടമുണ്ട്. ഈ സിനിമ ആന്റണി വേണ്ടെന്ന് വച്ചപ്പോൾ ഒരു കൂട്ടം ചെറുപ്പക്കാർ വഴിമുട്ടിയ അവസ്ഥയിൽ ഫ്‌ളാറ്റിൽ ഇരുന്നിട്ടുണ്ട്. ജൂഡ് ഉൾപ്പടെയുള്ളവർ പൊട്ടിക്കരഞ്ഞിട്ടാണ് അവിടെ നിന്നും ഇറങ്ങുന്നത്. സിനിമ നടക്കില്ലെന്ന് എല്ലാവരേയും അറിയിച്ചു. കുടുംബത്തിന്റെ കുറ്റം പറച്ചിലും ആളുകളുടെ പരിഹാസവും നേരിട്ടു.'' പ്രവീൺ പറഞ്ഞു.
