അടൂർ: സിപിഎം നേതാക്കളുടെ തിട്ടൂരം അനുസരിച്ച് പ്രവർത്തിക്കാത്തതിന്റെ പേരിൽ തൊഴിലുറപ്പ് ജോയിന്റ് പ്രൊജക്ട് കോ-ഓർഡിനേറ്ററെ സിപിഎമ്മിന്റെ വനിതാ പഞ്ചായത്ത് പ്രസിഡന്റിന്റെ മുറിയിൽ പൂട്ടിയിട്ട് ചെരുപ്പൂരി തല്ലി. ഭയന്നു പോയ ഉദ്യോഗസ്ഥൻ പരാതി കൊടുക്കാൻ മടിച്ചു നിൽക്കുമ്പോൾ തങ്ങളെ മർദിച്ചുവെന്ന് കാട്ടി വനിതകൾ അടക്കം പഞ്ചായത്തംഗങ്ങൾ ചികിൽസ തേടുകയും പരാതി നൽകുകയും ചെയ്തു.

കടമ്പനാട് പഞ്ചായത്ത് ഉച്ചയ്ക്ക് ഒന്നയോടെയാണ് സംഭവം. തൊഴിലുറപ്പ് ശജപിസി മലപ്പുറം വള്ളിക്കുന്ന് സ്വദേശി അജിഷിനാണ് മർദനമേറ്റത്. പഞ്ചായത്ത് പ്രസിഡന്റ്് പ്രിയങ്കാ പ്രതാപിന്റെ നേതൃത്വത്തിൽ പ്രസിഡന്റിന്റെ ചേംബറിലേക്ക വിളിച്ചു വരുത്തി ബന്ദിയാക്കിയ ശേഷം ഒരു വനിത ചെരുപ്പൂരി അടിക്കുകയായിരുന്നുവെന്ന് പറയുന്നു. അടിയേറ്റ് തന്റെ കണ്ണട ഊരിത്തെറിച്ചു പോയെന്ന് അജീഷ് പറഞ്ഞു. തികച്ചും ആസൂത്രിതമായിട്ടായിരുന്നു ആക്രമണം. ഇതിനായി പഞ്ചായത്തിലെ സിസിടിവി ഓഫ് ചെയ്തിരുന്നു.

പഞ്ചായത്തിൽ തൊഴിലുറപ്പ് തൊഴിലാളികൾക്ക് തൊഴിൽ നിഷേധിച്ച സംഭവവുമായി ബന്ധപ്പെട്ട് പരാതിയിൽ അന്വേഷണം നടത്തുന്നതിന് വേണ്ടി ചെന്നതായിരുന്നു അജീഷ്. ഇദ്ദേഹം വന്ന വാഹനത്തിന്റെ ഡ്രൈവർക്കും മർദനമേറ്റു. പഞ്ചായത്ത് നടത്തിയ ശുചീകരണത്തിൽ പങ്കെടുക്കാതിരുന്ന 15 പേരെ 12-ാം വാർഡിലെ തൊഴിലുറപ്പ് മസ്റ്റർ റോളിൽ നിന്ന് ഒഴിവാക്കിയിരുന്നു. ഇതു സംബന്ധിച്ച് പഞ്ചായത്ത് കമ്മറ്റി തീരുമാനമെടുത്തിരുന്നുവെന്ന് പറയുന്നു. ഇങ്ങനെ ഒഴിവാക്കപ്പെട്ട തൊഴിലാളികൾ ചേർന്ന് പഞ്ചായത്തിന് മുന്നിൽ സമരം നടത്തുകയും തൊഴിലുറപ്പ് ജില്ലാ ഓഫീസർക്ക് പരാതി നൽകുകയും ചെയ്തിരുന്നു.

ശുചീകരണ ദിനാചരണത്തിൽ പങ്കെടുക്കാത്ത തൊഴിലുറപ്പ് തൊഴിലാളികളെ അടുത്ത ജോലിക്കായുള്ള മസ്റ്റർ റോളിൽ നിന്ന് മാറ്റി നിർത്തണമെന്നത് പഞ്ചായത്ത് കമ്മറ്റി തീരുമാനമായിരുന്നുവെന്ന് പഞ്ചായത്ത് വൈസ് പ്രസിഡന്റ് എസ്. രാധാകൃഷ്ണൻ നേരത്തേ വ്യക്തമാക്കിയിരുന്നു. കമ്മറ്റി തീരുമാന പ്രകാരം 12-ാം വാർഡിലെ 15 തൊഴിലാളികളുടെ പേര് മസ്റ്റർ റോളിൽ നിന്ന് നീക്കി. 12-ാം വാർഡായ പാണ്ടിമലപ്പുറത്ത് 14 ദിവസം നടക്കുന്ന തൊഴിൽ ദിനങ്ങളിൽ ഉൾപ്പെടേണ്ടവരുടെ പേരാണ് മസ്റ്റർ റോളിൽ നിന്ന് ഒഴിവാക്കിയത്.

തൊഴിൽ ചെയ്യാനാകാതെ മടങ്ങിയ തൊഴിലാളികൾ പരാതിയുമായി പഞ്ചായത്തിൽ ചെന്നെങ്കിലും ഫലമുണ്ടായില്ല. പഞ്ചായത്ത് സെക്രട്ടറിക്ക് പരാതി നൽകിയെങ്കിലും അടുത്ത ജോലിക്ക് എസ്റ്റിമേറ്റ് തയാറാക്കട്ടെ എന്നായിരുന്നു മറുപടി. ഇനി ഇവർക്ക് തൊഴിൽ ദിനം കിട്ടണമെങ്കിൽ മൂന്നു മാസമെങ്കിലും വേണ്ടി വരും. എല്ലാ പാർട്ടിയിലും പെട്ടവർക്കാണ് തൊഴിൽ നിഷേധിച്ചത്. കാൻസർ രോഗികൾ അടക്കമുള്ള തൊഴിലാളികൾക്ക് തൊഴിൽ കിട്ടാതെ വന്നതോടെ ജെപിസി ആയിട്ടുള്ള അജീഷ് കഴിഞ്ഞ ദിവസം പഞ്ചായത്തിൽ വന്ന് അവരെ മസ്റ്റർ റോളിൽ ഉൾക്കൊള്ളിക്കാൻ നിർദ്ദേശം നൽകി.

ഇതോടെ സിപിഎമ്മിന്റെ ജില്ലാ ഏരിയാ നേതാക്കൾ ഇദ്ദേഹത്തെ വിളിച്ച് പാർട്ടി പറയുന്നതു പോലെ ചെയ്യണമെന്ന് നിർദേശിച്ചു. എന്നാൽ, സർക്കാർ ഉദ്യോഗസ്ഥനായ തനിക്ക് തൊഴിലാളികളുടെ ഭാഗത്തെ ന്യായം നോക്കിയേ കഴിയൂവെന്ന് ഇദ്ദേഹം പ്രതികരിച്ചു. മാത്രവുമല്ല 15 തൊഴിലാളികളെ ഉൾക്കൊള്ളിച്ച് പുതിയ മസ്റ്റർ റോൾ നൽകി. ബുധനാഴ്ച ഇവർക്ക് തൊഴിൽ നൽകേണ്ടിയിരുന്നു. എന്നാൽ, പുതിയ മസ്റ്റർ റോൾ കിട്ടിയില്ലെന്ന് പറഞ്ഞ് തൊഴിൽ മുടക്കി. വിവരം തൊഴിലാളികൾ അറിയിച്ചതിൻ പ്രകാരം അജീഷ് പഞ്ചായത്തിൽ തിരക്കിയപ്പോൾ മസ്റ്റർ റോൾ കിട്ടിയില്ലെന്നും അതുമായി വരാനും അറിയിച്ചു. അതിൻ പ്രകാരം വ്യാഴാഴ്ച ഉച്ചയ്്ക്ക് ഓഫീസിൽ എത്തിയപ്പോഴായിരുന്നു മർദനം.

താൻ വരുമ്പോൾ പ്രസിഡന്റ് അവിടെ ഉണ്ടായിരുന്നില്ലെന്ന് അജീഷ് പറഞ്ഞു. അതിനാൽ തൊഴിലുറപ്പ് പദ്ധതിയുടെ ഓഫീസിലേക്ക് പോയിരുന്നു. അവിടെ ഇരിക്കുമ്പോൾ തന്നെ ചിലർ വന്ന തന്നെ ഭീഷണിപ്പെടുത്തുകയും അസഭ്യം വിളിക്കുകയും ചെയ്തിരുന്നു. പറയാനുള്ള കാര്യങ്ങൾ പറഞ്ഞ് തീർത്ത് പോകാനൊരുങ്ങിയ തന്നെ പ്രസിഡന്റിന്റെ റൂമിലേക്ക് വിളിച്ചു കൊണ്ടു പോവുകയും അടച്ചിട്ട് അസഭ്യം വിളിക്കുകയുമായിരുന്നു.

ആസൂത്രിതമായിട്ടാണ് മർദനം നടന്നതെന്ന് കോൺഗ്രസിന്റെ പഞ്ചായത്തംഗങ്ങൾ പറഞ്ഞു. ഉദ്യോഗസ്ഥനെ തന്ത്രപൂർവം പ്രസിഡന്റിന്റെ മുറിയിൽ കയറ്റി കതകടച്ചു. അവിടെ ഇട്ട് മർദിക്കുന്നതിനായി കസേരയും മറ്റും മാറ്റിയിട്ടിരുന്നുവെന്ന് ഉദ്യോഗസ്ഥൻ പറഞ്ഞു. പ്രസിഡന്റ്, വൈസ് പ്രസിഡന്റ്, വനിതകൾ അടക്കമുള്ള പഞ്ചായത്തംഗങ്ങൾ എന്നിവർ ചേർന്ന് രൂക്ഷമായ അസഭ്യ വർഷം നടത്തിയെന്ന് അജീഷ് പറഞ്ഞു. ഗുണ്ടായിസവും ഉണ്ടായി. ഇതിനിടെയാണ് ചുരിദാർ ധരിച്ച ഒരു സ്ത്രീ ചെരുപ്പൂരി മുഖത്ത് അടിച്ചതെന്ന് ഉദ്യോഗസ്ഥൻ പറഞ്ഞു. ഈ രംഗമെല്ലാം മൊബൈൽ ഫോണിൽ ഷൂട്ട് ചെയ്യുന്നുമുണ്ടായിരുന്നു. അടിയേറ്റ് കണ്ണട തെറിച്ചു പോയി. ബിഡിഓ ആയി സർക്കാർ സർവീസിൽ പ്രവേശിച്ച തനിക്ക് ഇത് ആദ്യത്തെ അനുഭവമാണെന്ന് അജീഷ് പറഞ്ഞു.

ഇതു സംബന്ധിച്ച് പരാതിക്ക് പോകാൻ താൽപര്യമില്ലെന്ന് അജീഷ് പറയുന്നു. അതേ സമയം, വനിതകൾ അടക്കമുള്ള പഞ്ചായത്തംഗങ്ങൾ അജീഷ് തങ്ങളെ മർദിച്ചുവെന്ന് ആരോപിച്ച് ചികിൽസ തേടി. സിപിഎം ജില്ലാ സെക്രട്ടറിയുടെയും ഏരിയാ സെക്രട്ടറിയുടെയും നിർദേശപ്രകാരം ആസൂത്രണം ചെയ്ത് ഉദ്യോഗസ്ഥനെ മർദിക്കുകയായിരുന്നുവെന്ന് കോൺഗ്രസ് ആരോപിച്ചു. ഇതിനെതിരേ കോൺഗ്രസിന്റെ നേതൃത്വത്തിൽ പഞ്ചായത്തിന് മുന്നിൽ ധർണയും നടത്തി. സിപിഎമ്മിന്റെ സർവീസ് സംഘടനയിൽപ്പെട്ട ആളാണ് മർദനമേറ്റ ഉദ്യോഗസ്ഥനെന്ന് പറയുന്നു.

 

ശ്രീലാല്‍ വാസുദേവന്‍

    ശ്രീലാല്‍ വാസുദേവന്‍ മറുനാടന്‍ മലയാളി പത്തനംതിട്ട ന്യൂസ് കോണ്‍ട്രിബ്യൂട്ടര്‍