ശ്രീഹരിക്കോട്ട: ഇന്ത്യയുടെ എർത്ത് ഒബ്സർവേഷൻ സാറ്റലൈറ്റ്-6 ഉൾപ്പടെ ഒമ്പത് ഉപഗ്രഹങ്ങളുമായി ഇസ്രോയുടെ പിഎസ്എൽവി-സി54 റോക്കറ്റ് വിക്ഷേപിച്ചു. ശനിയാഴ്ച രാവിലെ 11.56 ന് ശ്രീഹരിക്കോട്ടയിലെ സതിഷ് ധവാൻ ബഹിരാകാശ നിലയത്തിൽ നിന്നായിരുന്നു വിക്ഷേപണം. ഓഷ്യൻ സാറ്റ് പരമ്പരയിൽപ്പെട്ട ഭൗമ നിരീക്ഷണ ഉപഗ്രഹമാണ് പ്രധാനപ്പെട്ടത്. മറ്റുള്ളവ നാനോ സാറ്റലൈറ്റുകളാണ്. പിഎസ്എൽവി എക്സ്എൽ പതിപ്പിന്റെ 24-മത് വിക്ഷേപണമാണിത്.

20 മിനിറ്റിനുള്ളിൽ 742 കിലോമീറ്റർ ഉയരത്തിൽ എത്തിയ ശേഷം ഓഷ്യൻസാറ്റ് വേർപെട്ടു. റോക്കറ്റ് 516 കിലോമീറ്ററിലേക്കു താഴ്‌ത്തിയാണ് അടുത്ത ഉപഗ്രഹം സ്ഥാപിക്കുന്നത്. അവസാന ഉപഗ്രഹം 528 കിലോമീറ്റർ ഉയരത്തിലാണു സ്ഥാപിക്കുന്നത്.വരും മണിക്കൂറുകളിൽ ഓർബിറ്റ്-ചേഞ്ച് ത്രസ്റ്ററുകൾ രണ്ട് തവണ പ്രവർത്തിപ്പിച്ച് വിക്ഷേപണ വാഹനത്തിന്റെ ഭ്രമണപഥം ക്രമീകരിച്ച ശേഷം വരുന്ന മണിക്കൂറുകളിൽ മറ്റുള്ള നാനോ സാറ്റലൈറ്റുകൾ ഉപഭോക്താക്കളുടെ ആവശ്യം അനുസരിച്ച് വിവിധ ഓർബിറ്റുകളിൾ വിന്യസിക്കും. ഇസ്രോയുടെ ദൈർഘ്യമേറിയ ദൗത്യങ്ങളിൽ ഒന്നായിരിക്കും ഇത്.

 

ഓഷ്യൻസാറ്റ് പരമ്പരയിലെ മൂന്നാം തലമുറയിൽ പെട്ട ഭൗമ നിരീക്ഷണ ഉപഗ്രഹമാണ് എർത്ത് ഒബ്‌സർവേഷൻ സാറ്റലൈറ്റ്-6 (ഇഒഎസ്-6). ഓഷ്യൻസാറ്റ്-2 ന്റെ സേവനങ്ങളുടെ തുടർച്ചയാണ് പുതിയ ഉപഗ്രഹത്തിന്റെ ചുമതല. മെച്ചപ്പെട്ട സാങ്കേതിക സംവിധാനങ്ങളും പുതിയ ഉപഗ്രഹത്തിലുണ്ടാവും. സമുദ്രങ്ങളെ കുറിച്ച് പഠിക്കുന്നതിനും കാലാവസ്ഥാ നിരീക്ഷണത്തിനും വേണ്ടിയാണ് ഓഷ്യൻസാറ്റ് ഉപഗ്രങ്ങൾ തയ്യാറാക്കായിരിക്കുന്നത്.

ഇന്ത്യ-ഭൂട്ടാൻ സഹകരണത്തിലുള്ള ഐഎൻഎസ്-2ബി, സ്‌പേസ് ഫ്‌ളൈറ്റ് യുഎസ്എയുടെ നാല് നാനോ സാറ്റലൈറ്റുകൾ, സ്വിസ് വിവരവിനിമയ കമ്പനിയായ ആസ്‌ട്രോകാസ്റ്റിന്റെ ഒരു ഉപഗ്രഹം, ഹൈദരാബാദിൽ നിന്നുള്ള ധ്രുവ സ്‌പേസിന്റെ തൈബോൾട്ട്-1, തൈബോൾട്ട് 2 ഉപഗ്രഹങ്ങൾ, സ്റ്റാർട്ട് അപ്പ് ആയ പിക്‌സെലിന്റെ ആനന്ദ് എന്ന നാനോ സാറ്റലൈറ്റ് എന്നിവയാണ് വിക്ഷേപിക്കുന്ന മറ്റ് ഉപഗ്രഹങ്ങൾ.

മറുനാടന്‍ മലയാളി

    മറുനാടന്‍ മലയാളി ബ്യൂറോ