ഡൽഹി: രോഗശയ്യയിലുള്ള തന്റെ അമ്മയ്ക്ക് താങ്ങായി നിന്ന കേരളത്തിൽ നിന്നുള്ള നഴ്സുമാരുടെ സ്നേഹപരിചരണങ്ങളെ വാനോളം പ്രശംസിച്ച് കോൺഗ്രസ് നേതാവ് രാഹുൽ ഗാന്ധി. കഴിഞ്ഞ ദിവസം സോണിയാ ഗാന്ധിയെ ആശുപത്രിയിൽ പ്രവേശിപ്പിച്ചതിനെത്തുടർന്നുണ്ടായ വൈകാരികമായ അനുഭവങ്ങളാണ് അദ്ദേഹം സമൂഹമാധ്യമങ്ങളിലൂടെ പങ്കുവെച്ചത്.

ഏതൊരു മകനെയും പോലെ ആകുലതകളോടെ ആശുപത്രിയിലെ അമ്മയുടെ മുറിയിലുണ്ടായിരുന്ന തനിക്ക് വലിയ ആശ്വാസം നൽകിയത് അവിടെയുണ്ടായിരുന്ന മലയാളി നഴ്സുമാരുടെ സാന്നിധ്യമായിരുന്നുവെന്ന് രാഹുൽ കുറിച്ചു.

ആശുപത്രിയിലെ അമ്മയുടെ മുറിയിലെ ഒരു ചെറിയ സോഫയിൽ ഇരിക്കുമ്പോൾ തന്റെ മനസ്സ് നിറയെ അമ്മയുടെ ആരോഗ്യത്തെക്കുറിച്ചുള്ള ആശങ്കകളായിരുന്നു. എന്നാൽ ഓരോ മണിക്കൂറിലും മുറിയിലേക്ക് കടന്നുവന്ന് അമ്മയെ പരിശോധിക്കുകയും, പുഞ്ചിരിയോടെ അവരുടെ കൈകൾ പിടിക്കുകയും ചെയ്ത കേരളത്തിൽ നിന്നുള്ള നഴ്സ് തനിക്ക് വലിയ സമാധാനമാണ് നൽകിയതെന്ന് അദ്ദേഹം ഓർത്തെടുത്തു.

"നിങ്ങൾ രാത്രി ഉറങ്ങുമോ അതോ രാത്രി മുഴുവൻ ജോലിയിലാണോ?" എന്ന തന്റെ ചോദ്യത്തിന്, "ഞാൻ രാത്രി മുഴുവൻ ജോലിയിലാണ്" എന്നായിരുന്നു ആ നഴ്സിന്റെ ശാന്തമായ മറുപടി. ലോകം മുഴുവൻ നിശബ്ദമായി ഉറങ്ങുമ്പോൾ, കേരളത്തിലെ ഈ കരുത്തരായ സ്ത്രീകൾ ഡൽഹിയിലും രാജ്യത്തുടനീളവും ലോകത്തിന്റെ വിവിധ കോണുകളിലും മനുഷ്യജീവനുകൾക്ക് കാവലിരിക്കുകയാണെന്ന് അദ്ദേഹം പറഞ്ഞു.

കേരളത്തിലെ നഴ്സുമാർ എത്രയോ ആൺമക്കളെയും പെൺമക്കളെയും സഹോദരങ്ങളെയും അവരുടെ ഏറ്റവും പ്രയാസകരമായ നിമിഷങ്ങളിൽ ആശ്വസിപ്പിച്ചിട്ടുണ്ടാകുമെന്ന് താൻ ആ നിമിഷം ചിന്തിച്ചുപോയതായി രാഹുൽ ഗാന്ധി കുറിച്ചു. രോഗികൾക്ക് മരുന്നിനോടൊപ്പം നൽകുന്ന ആശ്വാസവാക്കുകളും കരുതലും സ്നേഹവുമാണ് കേരളത്തിന്റെ യഥാർത്ഥ ആത്മാവ്.

ജാതിയോ മതമോ വർണ്ണമോ നോക്കാതെ മനുഷ്യത്വത്തിന് മുൻഗണന നൽകുന്ന കേരളീയ സംസ്കാരത്തിന്റെ പ്രതിഫലനമാണ് ഈ നഴ്സുമാരിലൂടെ ലോകം കാണുന്നത്. കഠിനാധ്വാനവും ആത്മാർത്ഥതയും കൈമുതലായുള്ള കേരളത്തിലെ നഴ്സുമാരോടുള്ള ആദരവ് പ്രകടിപ്പിച്ചുകൊണ്ടാണ് രാഹുൽ തന്റെ കുറിപ്പ് അവസാനിപ്പിച്ചത്. ഈ കുറിപ്പ് ഇതിനോടകം തന്നെ സോഷ്യൽ മീഡിയയിൽ വലിയ ചർച്ചകൾക്കും പ്രശംസകൾക്കും വഴിയൊരുക്കിയിട്ടുണ്ട്.

രാഹുൽ ഗാന്ധികേരളംനഴ്സസ്

സ്വന്തം ലേഖകൻ