ഇംഗ്ലീഷ്, മാന്ദാരിന്, ഹിന്ദി, സ്പാനിഷ്, അറബിക്... ലോകത്തെ ഏറ്റവും കൂടുതല് പേര് സംസാരിക്കുന്ന ഭാഷകളുടെ റാങ്കിങ് ഇങ്ങനെ; 3000-ത്തോളം ഭാഷകള് വംശനാശത്തിന്റെ നിഴലില്! ഞെട്ടിക്കുന്ന റിപ്പോര്ട്ട് പുറത്ത്
ഇംഗ്ലീഷ്, മാന്ദാരിന്, ഹിന്ദി, സ്പാനിഷ്, അറബിക്... ലോകത്തെ ഏറ്റവും കൂടുതല് പേര് സംസാരിക്കുന്ന ഭാഷകളുടെ റാങ്കിങ് ഇങ്ങനെ
ലോകമെമ്പാടുമായി ഇന്ന് സംസാരിക്കപ്പെടുന്ന ഏഴായിരത്തിലധികം ഭാഷകളില് ഏതാണ്ട് 40 ശതമാനവും വംശനാശത്തിന്റെ വക്കിലാണെന്ന ഞെട്ടിപ്പിക്കുന്ന വിവരമാണ് അന്താരാഷ്ട്ര ഭാഷാ ഡാറ്റാബേസായ എത്നോളോഗ് പുറത്തുവിടുന്നത്. ആകെ സംസാരത്തിലുള്ള 7,159 ഭാഷകളില് 3,193 എണ്ണവും വരുംതലമുറകളിലേക്ക് കൈമാറപ്പെടാതെ അപ്രത്യക്ഷമാകാന് സാധ്യതയുള്ളവയാണ്. ഒരു ഭാഷ സംസാരിക്കുന്ന സമൂഹം തങ്ങളുടെ തനിമയും സംസ്കാരവും കുട്ടികള്ക്ക് പകര്ന്നു നല്കുന്നതിന് പകരം, കൂടുതല് പ്രബലമായ മറ്റു ഭാഷകളിലേക്ക് മാറുമ്പോഴാണ് ഇത്തരം വംശനാശ ഭീഷണികള് രൂപപ്പെടുന്നത്. നിലവില് 454 ഭാഷകള് ലോകത്തിന് പൂര്ണ്ണമായും നഷ്ടപ്പെട്ടതായും റിപ്പോര്ട്ട് ചൂണ്ടിക്കാട്ടുന്നു.
ഇംഗ്ലീഷ് ഒന്നാം സ്ഥാനത്ത്
ആഗോളതലത്തില് ഇംഗ്ലീഷ് ഒന്നാം സ്ഥാനത്ത് തുടരുമ്പോള്, ഏകദേശം 1.5 ബില്യണ് ആളുകള് ഈ ഭാഷ ആശയവിനിമയത്തിന് ഉപയോഗിക്കുന്നു. ഇതില് 80 ശതമാനവും ഇംഗ്ലീഷ് രണ്ടാം ഭാഷയായി പഠിച്ചവരാണ് എന്നത് ശ്രദ്ധേയമാണ്. മാതൃഭാഷയായി സംസാരിക്കുന്നവരുടെ എണ്ണത്തില് ചൈനീസ് മാന്ഡാരിന് ആണ് മുന്നില് (1.2 ബില്യണ്). 609 ദശലക്ഷം ആളുകള് സംസാരിക്കുന്ന ഹിന്ദി ലോകത്തിലെ മൂന്നാമത്തെ വലിയ ഭാഷയായി പട്ടികയിലുണ്ട്. എന്നാല് ഇത്തരത്തില് ഏതാനും ഭാഷകള് മാത്രം ശക്തിപ്രാപിക്കുമ്പോള്, നൂറില് താഴെ മാത്രം ആളുകള് സംസാരിക്കുന്ന നൂറിലധികം ഭാഷകള് ഇന്ന് ലോകത്തിന്റെ പല ഭാഗങ്ങളിലും നിശബ്ദമായിക്കൊണ്ടിരിക്കുകയാണ്.
ഏറ്റവും കൂടുതല് ഭീഷണി ഓഷ്യാനിയ മേഖലയില്
വംശനാശഭീഷണി നേരിടുന്ന ഭാഷകളില് 80 ശതമാനവും വെറും 25 രാജ്യങ്ങളിലായാണ് കേന്ദ്രീകരിച്ചിരിക്കുന്നത്. ഓഷ്യാനിയ മേഖലയിലാണ് ഇതില് ഏറ്റവും കൂടുതല് ഭീഷണി നിലനില്ക്കുന്നത്. ജപ്പാനിലെ ഐനു, എത്യോപ്യയിലെ ഒങ്കോട്ട, ബൊളീവിയയിലെ ലെക്കോ തുടങ്ങിയ ഭാഷകള് ഇന്ന് വെറും വിരലിലെണ്ണാവുന്ന ആളുകളിലേക്ക് ചുരുങ്ങിയിരിക്കുന്നു. വടക്കേ അമേരിക്കയിലെയും മധ്യ അമേരിക്കയിലെയും മിക്ക തദ്ദേശീയ ഭാഷകളും ഇന്ന് സമാനമായ വെല്ലുവിളി നേരിടുന്നു. ഒരു ജനതയുടെ ഐഡന്റിറ്റിയുടെ ഭാഗമായ ഭാഷ ഇല്ലാതാകുന്നതോടെ അവരുടെ ചരിത്രവും വിജ്ഞാനശേഖരവുമാണ് ലോകത്തിന് നഷ്ടമാകുന്നത്.
പുനരുജ്ജീവന മാതൃകകള്
എങ്കിലും, പ്രതീക്ഷ നല്കുന്ന ചില പുനരുജ്ജീവന മാതൃകകളും ലോകത്തുണ്ട്. ഒരിക്കല് വംശനാശം സംഭവിച്ചതായി യുനെസ്കോ പ്രഖ്യാപിച്ച ഇംഗ്ലണ്ടിലെ കോര്ണിഷ് ഭാഷ ഇതിന് ഉദാഹരണമാണ്. നിരന്തരമായ ശ്രമങ്ങളിലൂടെ ഈ ഭാഷയെ സംഭാഷണത്തിലേക്ക് തിരികെ കൊണ്ടുവരാന് സാധിച്ചു. 2021-ലെ കണക്കുകള് പ്രകാരം നൂറുകണക്കിന് ആളുകള് ഇപ്പോള് കോര്ണിഷ് മാതൃഭാഷയായി ഉപയോഗിക്കുന്നു. ഇത്തരത്തിലുള്ള ഇടപെടലുകള് ലോകത്തിലെ ഇതര വംശനാശ ഭാഷകള്ക്കും വലിയൊരു പ്രതീക്ഷയാണ് നല്കുന്നത്.
എന്തുകൊണ്ട് ഭാഷകള് മരിക്കുന്നു?
ഒരു ഭാഷ സംസാരിക്കുന്ന സമൂഹം തങ്ങളുടെ കുട്ടികള്ക്ക് ആ ഭാഷ കൈമാറാതെ, കൂടുതല് സാമ്പത്തിക-സാമൂഹിക പ്രാധാന്യമുള്ള (ഉദാഹരണത്തിന് ഇംഗ്ലീഷ് പോലെയുള്ള) വലിയ ഭാഷകള് പഠിപ്പിക്കാന് തുടങ്ങുന്നതോടെയാണ് ഒരു ഭാഷയുടെ മരണം തുടങ്ങുന്നത്. ഭാഷയുടെ നാശം കേവലം വാക്കുകളുടെ നഷ്ടമല്ല, മറിച്ച് ഒരു ജനതയുടെ വിജ്ഞാനവും സംസ്കാരവുമാണ് ഇല്ലാതാകുന്നത്.
