പ്രധാനമന്ത്രിയുടെ പരിപാടിക്കിടെ എസ്.ഐയുടെ 'മദ്യപാന ലീലകള്'; സുരക്ഷാ ഡ്യൂട്ടിക്കിടെ പൂസായി ബഹളം; കൊടുമണ് സി.ഐയെ തല്ലിയ കേസിലെ പ്രതിയായ പ്രൊബേഷനറി എസ്.ഐക്ക് വീണ്ടും സസ്പെന്ഷന്; പോലീസിന് നാണക്കേടായി കൃഷ്ണമോഹന്
പ്രൊബേഷനറി എസ്.ഐക്ക് സസ്പെന്ഷന്
തിരുവനന്തപുരം: പ്രധാനമന്ത്രി പങ്കെടുത്ത ഔദ്യോഗിക പരിപാടിക്കിടെ മദ്യപിച്ച് ബഹളമുണ്ടാക്കിയ പ്രൊബേഷനറി എസ്.ഐയെ സര്വീസില് നിന്നും സസ്പെന്ഡ് ചെയ്തു. മ്യൂസിയം പോലീസ് സ്റ്റേഷനിലെ കൃഷ്ണമോഹനെതിരെയാണ് തിരുവനന്തപുരം സിറ്റി പോലീസ് കമ്മീഷണര് നടപടിയെടുത്തത്.
പ്രധാനമന്ത്രിയുടെ സുരക്ഷാ ക്രമീകരണങ്ങളുടെ ഭാഗമായി ഡ്യൂട്ടിയിലുണ്ടായിരുന്ന കൃഷ്ണമോഹന് മദ്യപിച്ച് ബഹളമുണ്ടാക്കുകയും സുരക്ഷാ ചുമതലയിലുണ്ടായിരുന്ന ഉദ്യോഗസ്ഥര്ക്ക് ബുദ്ധിമുട്ട് സൃഷ്ടിക്കുകയും ചെയ്തു. ഉന്നത ഉദ്യോഗസ്ഥര് നടത്തിയ പരിശോധനയില് ഇയാള് മദ്യപിച്ചതായി സ്ഥിരീകരിച്ചതിനെത്തുടര്ന്നാണ് അടിയന്തര നടപടി സ്വീകരിച്ചത്.
സസ്പെന്ഷനിലായ കൃഷ്ണമോഹന് മുന്പും സമാനമായ രീതിയിലുള്ള ഗുരുതരമായ അച്ചടക്കലംഘനങ്ങളില് ഉള്പ്പെട്ടിട്ടുള്ള വ്യക്തിയാണെന്ന് പോലീസ് രേഖകള് വ്യക്തമാക്കുന്നു. കഴിഞ്ഞ പരിപാടിക്കിടെ സഹപ്രവര്ത്തകരായ പോലീസുകാരെ കയ്യേറ്റം ചെയ്ത സംഭവത്തില് ഇയാള് പ്രതിയായിരുന്നു.
കൊടുമണ് സി.ഐയെ കയ്യേറ്റം ചെയ്ത സംഭവത്തില് കൃഷ്ണമോഹനെതിരെ നേരത്തെ കേസെടുത്തിട്ടുണ്ട്. സി.ഐ നേരിട്ട് നല്കിയ പരാതിയുടെ അടിസ്ഥാനത്തിലായിരുന്നു അന്ന് നടപടി തുടങ്ങിയത്.
തുടര്ച്ചയായ അച്ചടക്കലംഘനങ്ങളും വിഐപി സുരക്ഷാ ഡ്യൂട്ടിക്കിടെയുണ്ടായ ഗുരുതരമായ വീഴ്ചയും കണക്കിലെടുത്താണ് കമ്മീഷണറുടെ കര്ശന നടപടി. സംഭവത്തെക്കുറിച്ച് കൂടുതല് അന്വേഷണം നടത്താന് വകുപ്പുതലത്തില് ഉത്തരവിട്ടിട്ടുണ്ട്.
