'എന്റെ ഭര്‍ത്താവ് സരിന്‍ തെരഞ്ഞെടുപ്പില്‍ തോറ്റത് പകല്‍വെളിച്ചത്തില്‍; പക്ഷേ ആര്‍ക്കും, ഒന്നും കലക്കാന്‍ ഗുളിക കൊടുത്തിട്ടില്ല; അയാളെ പ്രതി എനിക്ക് തല കുനിക്കേണ്ടി വന്നിട്ടില്ല!'; ചൊറിയാന്‍ വന്നവര്‍ക്ക് ചുട്ട മറുപടിയുമായി സൗമ്യ സരിന്‍
'എന്റെ ഭര്‍ത്താവ് സരിന്‍ തെരഞ്ഞെടുപ്പില്‍ തോറ്റത് പകല്‍വെളിച്ചത്തില്‍
തിരുവനന്തപുരം: സോഷ്യല്‍ മീഡിയയില്‍ ചൊറിയാന്‍ വന്നവര്‍ക്ക ചുട്ട മറുപടിയുമായി ഡോ. സൗമ്യ സരിന്‍. തോറ്റ എംഎല്‍എയോട് ഗുളിക കഴിക്കാന്‍ മറക്കരുതെന്ന അധിക്ഷേപ കമന്റുമായി എത്തിയപ്പോഴാണ് സൗമ്യ വായടപ്പിക്കുന്ന മറുപടി നല്‍കിയത്. പാലക്കാട് സ്ഥാനാര്‍ഥിയായിരുന്ന പി. സരിന്‍ തെരഞ്ഞെടുപ്പില്‍ തോറ്റത് പകല്‍വെളിച്ചത്തിലായിരുന്നെന്ന് സൗമ്യ സരിന്‍ പ്രതികരിച്ചു.
ആര്‍ക്കും ഒന്നും കലക്കാന്‍ ഒരു ഗുളികയും സരിന്‍ നിര്‍ബന്ധിച്ചു കഴിപ്പിച്ചതായി അറിവില്ലെന്നും സൗമ്യ പറഞ്ഞു. രാഹുല്‍ മാങ്കൂട്ടത്തിലിനെതിരെ ലൈംഗിക ആരോപണങ്ങള്‍ ഉയര്‍ന്നതിന് പിന്നാലെ പാലക്കാട് എതിര്‍സ്ഥാനാര്‍ഥിയായി മത്സരിച്ച സിപിഐഎം നേതാവ് ഡോ. സരിനെതിരെ സാമൂഹിക മാധ്യമങ്ങളില്‍ രൂക്ഷമായ സൈബര്‍ ആക്രമണങ്ങള്‍ ഉയര്‍ന്നിരുന്നു.
സാമൂഹിക മാധ്യമങ്ങളില്‍ സജീവമായി ഇടപെടുന്ന ഭാര്യ ഡോ. സൗമ്യ സരിന്റെ ഫേസ്ബുക് പേജിലും പലരും അധിക്ഷേപവുമായി എത്തിയിരുന്നു. പിന്നാലെയാണ് പ്രതികരണവുമായി സൗമ്യ സരിന്‍ രംഗത്തെത്തിയിരിക്കുന്നത്.
സൗമ്യയുടെ ഫേസ്ബുക്ക് പോസ്റ്റിന്റെ പൂര്‍ണരൂപം:
'തോറ്റ എംഎല്‍എ'- ശരിയാണ്. എന്റെ ഭര്‍ത്താവ് തോറ്റിട്ടുണ്ട്.
ഒന്നല്ല, രണ്ടു തവണ. രണ്ടു നിയമസഭ തിരഞ്ഞെടുപ്പുകളില്‍.
പക്ഷെ ഒരു വ്യത്യാസമുണ്ട്.
തോല്‍വിയാണെങ്കിലും നല്ല പകല്‍ വെളിച്ചത്തില്‍.
മാന്യമായി.
തോല്‍വിയിലും അന്തസ്സ് എന്നൊന്നുണ്ടേ!
എല്ലാ ജയത്തിലും ഈ പറഞ്ഞ സാധനം ഉണ്ടാവണമെന്നും ഇല്ല കേട്ടോ.
അതുകൊണ്ട് ഈ തോല്‍വിയില്‍ എന്നല്ല, ഒന്നിലും അയാളെ പ്രതി എനിക്ക് തല കുനിക്കേണ്ടി വന്നിട്ടില്ല!
ഇനി ഗുളിക.
മൂപ്പര് അധികം കഴിക്കാറില്ല. വല്ല പനിയോ ജലദോഷമോ വന്നാല്‍, അതും ഞാന്‍ നിര്‍ബന്ധിച്ചു കഴിപ്പിച്ചാല്‍, ചിലപ്പോ കഴിക്കും!
പക്ഷെ ആര്‍ക്കും ഒന്നും കലക്കാന്‍ ഒരു ഗുളികയും നിര്‍ബന്ധിച്ചു കഴിപ്പിച്ചതായി അറിവില്ല!
ആര്‍ക്കെങ്കിലും അറിവുണ്ടെങ്കില്‍ പറയണം!
അപ്പൊ സംശയങ്ങള്‍ ഓക്കെ മാറിയല്ലോ അല്ലേ?
വിട്ടു പിടി ചേട്ടാ.
സ്വന്തം കാലിലെ മന്ത് മാറ്റിയിട്ടു പോരെ മറ്റവന്റെ കാലിലെ ചൊറി നോക്കാന്‍ പോകുന്നത്!
