ബെംഗളൂരുവില്‍ തൊഴില്‍ രംഗത്തെ വലിയ മുന്നേറ്റമൊരുക്കാന്‍ ഒരുങ്ങി ടാറ്റ; 3273 കോടി രൂപാ മുതല്‍മുടക്കില്‍ നിര്‍മ്മിക്കുന്നത് റിയല്‍റ്റി ബിസിനസ് പാര്‍ക്ക്; പാര്‍ക്കിന് കര്‍ണാടക സര്‍ക്കാരിന്റെ സമ്മതം; വമ്പന്‍ പദ്ധതി ഒരുങ്ങുന്നത് 25 ഏക്കറില്‍ വൈറ്റ്ഫീല്‍ഡിന് സമീപം; 5500 തൊഴില്‍ അവസരങ്ങള്‍ ഉണ്ടാകും
ബെംഗളൂരു: ബെംഗളൂരുവില്‍ ടാറ്റയുടെ പുതിയ നീക്കം. 3,273 കോടി രൂപയുടെ ബിസിനസ് പാര്‍ക്ക്, 5,500 തൊഴിലവസരങ്ങള്‍ ഒരുക്കനാണ് ടാറ്റയുടെ പുതിയ പദ്ധതി. കര്‍ണാടകയിലെ തൊഴില്‍ രംഗത്തെ വലിയ മുന്നേറ്റമായി മാറുകയാണ് ടാറ്റയുടെ പുതിയ പദ്ധതിയെന്ന് വിലയിരുത്തുന്നു. 3,273 കോടി രൂപയുടെ വലിയ മുതല്‍മുടക്കില്‍ ബെംഗളൂരുവിലെ വൈറ്റ്ഫീല്‍ഡിന് സമീപം 25 ഏക്കറില്‍ ടാറ്റ റിയല്‍റ്റി ബിസിനസ് പാര്‍ക്ക് നിര്‍മ്മിക്കും.
ടാറ്റ ഇന്റലിയോണ്‍ പാര്‍ക്ക് എന്ന പേരിലാണ് ഈ വലിയ ബിസിനസ് ഹബ് വികസിപ്പിക്കുക. ഐടി മേഖലയിലും അനുബന്ധ സേവനങ്ങളിലും പ്രവര്‍ത്തിക്കുന്ന നിരവധി സ്ഥാപനങ്ങള്‍ക്കു ഇവിടെ സ്ഥാനം ലഭിക്കും. റീട്ടെയ്ല്‍ ശൃഖലകളും ഫുഡ് കോര്‍ട്ടുകളും ഉള്‍പ്പെടുന്ന അടിസ്ഥാന സൗകര്യങ്ങളോടെയാണ് പദ്ധതി മുന്നോട്ട് പോകുന്നത്. മൊത്തം 5,500 തൊഴിലവസരങ്ങളാണ് പദ്ധതിയുടെ ഭാഗമായി സൃഷ്ടിക്കപ്പെടുന്നത്.
ടാറ്റ സംരംഭമായ, ട്രില്‍ എന്ന് അറിയപ്പെടുന്ന ടാറ്റ റിയല്‍റ്റി ആന്‍ഡ് ഇന്‍ഫ്രാസ്ട്രക്ചറാണ് പദ്ധതിയുടെ പിന്നില്‍. വൈറ്റ്ഫീല്‍ഡിലെ ദൊഡ്ഡനെകുന്ദി ഇന്‍ഡസ്ട്രിയല്‍ ഏരിയയിലെ 25 ഏക്കര്‍ വിസ്തൃതിയുള്ള സ്ഥലത്താണ് പാര്‍ക്ക് നിര്‍മിക്കുന്നത്. 2023 ഓഗസ്റ്റില്‍ ഗ്രാഫൈറ്റ് ഇന്ത്യ ലിമിറ്റഡില്‍ നിന്ന് 986 കോടി രൂപയ്ക്കാണ് പാര്‍ക്കിനുള്ള ഭൂമി ഏറ്റെടുത്തത്. നിരവധി നിബന്ധനകളോടെയാണ് പദ്ധതിക്ക് സംസ്ഥാന സര്‍ക്കാര്‍ അംഗീകാരം നല്‍കിയത്. ഓരോ മൂന്നു മാസം കൂടുമ്പോഴും പദ്ധതിയുടെ പുരോഗതി സംബന്ധിച്ച റിപ്പോര്‍ട്ടുകള്‍ സര്‍ക്കാരിനു സമര്‍പ്പിക്കണം.
പാരിസ്ഥിതിക അനുമതികള്‍ നേടുക, തദ്ദേശവാസികളെ നിയമിക്കുകയും പരിശീലിപ്പിക്കുകയും ചെയ്യുക, പ്രാദേശിക വികസനത്തെ പിന്തുണയ്ക്കുക, സിഎസ്ആറുമായി ബന്ധിപ്പിച്ച് അടിസ്ഥാന സൗകര്യ വികസന പ്രവര്‍ത്തനങ്ങള്‍ ഏറ്റെടുക്കുക എന്നിവയുള്‍പ്പെടെ പദ്ധതിക്കൊപ്പം പ്രാവര്‍ത്തികമാക്കണം. മഴവെള്ള സംഭരണം, മലിനജല പുനരുപയോഗം, സീറോ-ഡിസ്ചാര്‍ജ് സംവിധാനങ്ങള്‍ തുടങ്ങിയ സുസ്ഥിര പദ്ധതികളും ടാറ്റ റിയല്‍റ്റി ആന്‍ഡ് ഇന്‍ഫ്രാസ്ട്രക്ചര്‍ നടപ്പാക്കണമെന്ന് സര്‍ക്കാര്‍ നിബന്ധനയില്‍ പറയുന്നു.
ടാറ്റ കണ്‍സള്‍ട്ടന്‍സി സര്‍വീസസ് (ടിസിഎസ്) അടുത്തിടെ ഇതേ കാമ്പസില്‍ 25,000-ത്തിലധികം പേര്‍ക്ക് ജോലി ചെയ്യാന്‍ സാധിക്കുന്ന നിര്‍മാണ പദ്ധതികള്‍ പ്രഖ്യാപിച്ചിരുന്നു. ബെംഗളൂരുവിലുടനീളമുള്ള വിവിധ ഓഫീസുകളിലായി ടിസിഎസിന് ഇതിനകം ഏകദേശം 70,000 ജീവനക്കാരുണ്ട്. ഇന്റലിയോണ്‍ എന്ന ബ്രാന്‍ഡിന് കീഴില്‍ ടാറ്റ റിയല്‍റ്റി ആന്‍ഡ് ഇന്‍ഫ്രാസ്ട്രക്‌ചേഴ്‌സ് ഓഫീസ് പാര്‍ക്കുകള്‍ നടത്തി വരുന്നുണ്ട്. ഇപ്പോള്‍തന്നെ 7.6 ദശലക്ഷം ചതുരശ്ര അടി വിസ്തൃതിയിലാണ് ബിസിനസ് പാര്‍ക്ക് സ്പേസുകള്‍ പ്രവര്‍ത്തിക്കുന്നത്.
വിവിധ പദ്ധതികളിലായി 13 ദശലക്ഷം ചതുരശ്ര അടി കൂടി വികസനത്തിന്റെ പാതയിലാണ്. മുംബൈയിലെ ഇന്റലിയോണ്‍ സ്‌ക്വയര്‍, ചെന്നൈയിലെ രാമാനുജന്‍ ഇന്റലിയോണ്‍ പാര്‍ക്ക്, ഗുരുഗ്രാമിലെ ഇന്റലിയോണ്‍ പാര്‍ക്ക്, ഇന്റലിയോണ്‍ എഡ്ജ് എന്നിവയും ട്രില്ലിന്റെ ആസ്തികളില്‍ ഉള്‍പ്പെടും.
