ദ്വാരപാലക ശില്പ പാളികള് സ്വര്ണം പൂശാന് കൊണ്ടുപോയതിൽ ക്രമക്കേടെന്ന് കണ്ടെത്തിയതോടെ തുടങ്ങിയ വിവാദം; പോറ്റി പിടിയിലായതോടെ പുറത്ത് വന്നത് ഉന്നതന്മാരുടെ പേരുകൾ; കാവൽക്കാർ തന്നെ കൊള്ളക്കാരായപ്പോൾ അയ്യപ്പന്റെ സ്വർണ്ണം അന്യ സംസ്ഥാനങ്ങളിലേക്ക്; ഒടുവിൽ അയ്യപ്പന്റെ രക്ഷിതാവായ തന്ത്രിയും പിടിയിൽ; ശബരിമല സ്വര്ണക്കവര്ച്ചയുടെ നാള്വഴി
തിരുവനന്തപുരം: ശബരിമല ക്ഷേത്രത്തിലെ ദ്വാരപാലക ശില്പങ്ങളില് സ്വര്ണം പൂശിയതുമായി ബന്ധപ്പെട്ട ക്രമക്കേടുകളില് തന്ത്രി കണ്ഠര് രാജീവരടക്കം 11 പേരാണ് ഇതുവരെ അറസ്റ്റിലായത്. ഹൈക്കോടതിയുടെ നിര്ണായക ഇടപെടലിനെത്തുടര്ന്ന് പ്രത്യേക അന്വേഷണ സംഘം (എസ്ഐടി) നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങള് പുറത്തുവന്നത്. അനുമതിയില്ലാതെ സ്വര്ണം പൂശാന് കൊണ്ടുപോയതായി ദേവസ്വം സ്പെഷല് കമ്മിഷണര് ഹൈക്കോടതിയെ അറിയിച്ചതോടെയാണ് ശബരിമല സ്വര്ണക്കവര്ച്ച കേസിനു തുടക്കമായത്.
കഴിഞ്ഞ വര്ഷം സെപ്റ്റംബറില് ദ്വാരപാലക ശില്പങ്ങളിലെ പാളികള് സ്വര്ണം പൂശാന് ചെന്നൈയിലേക്ക് കൊണ്ടുപോയത് അനുമതിയില്ലാതെയാണെന്ന് ദേവസ്വം സ്പെഷല് കമ്മിഷണര് ഹൈക്കോടതിയെ അറിയിച്ചതോടെയാണ് വിവാദമായ സ്വര്ണക്കവര്ച്ച കേസിന് തുടക്കമാകുന്നത്. ശ്രീകോവിലിലെ സ്വര്ണം പൂശിയതുമായി ബന്ധപ്പെട്ട് 2018 മുതലുള്ള എല്ലാ രേഖകളും ഹാജരാക്കാന് ഹൈക്കോടതി തിരുവിതാംകൂര് ദേവസ്വം ബോര്ഡിന് നിര്ദേശം നല്കി. തുടര്ന്ന് രേഖകള് പരിശോധിച്ച കോടതി, പാളികളുടെ തൂക്കത്തില് വ്യത്യാസം കണ്ടെത്തുകയും വിഷയം അന്വേഷിക്കാന് പ്രത്യേക സംഘത്തെ നിയോഗിക്കുകയുമായിരുന്നു.
ഇതോടെയാണ് സ്വര്ണക്കവര്ച്ചയുടെ ഇടനിലക്കാരനായി കരുതപ്പെടുന്ന മുഖ്യപ്രതി ഉണ്ണിക്കൃഷ്ണന് പോറ്റിയുടെ പേര് ഉയര്ന്നുവന്നത്. ദ്വാരപാലക ശില്പങ്ങളുടെ പീഠം താന് ശബരിമലയിലേക്ക് നല്കിയിരുന്നുവെന്നും അത് കാണാനില്ലെന്നും പോറ്റി മൊഴി നല്കിയിരുന്നു. പിന്നീട്, ഈ പീഠം ഉണ്ണിക്കൃഷ്ണന് പോറ്റിയുടെ സഹോദരിയുടെ വീട്ടില്നിന്ന് കണ്ടെത്തുകയായിരുന്നു. തുടര്ന്നു നടന്ന അന്വേഷണത്തില് 2019-ലും സമാനമായ രീതിയില് ദ്വാരപാലക ശില്പങ്ങള് കൊണ്ടുപോയെന്നും സ്വര്ണം പൂശിയത് ഒഴിവാക്കി ചെമ്പുപാളികള് എന്ന് രേഖപ്പെടുത്തിയാണ് ചെന്നൈയിലെ സ്മാര്ട്ട് ക്രിയേഷന്സില് എത്തിച്ചതെന്നും കണ്ടെത്തി. ഗൂഢാലോചന, വിശ്വാസവഞ്ചന, വ്യാജരേഖ നിര്മാണം, സ്വര്ണ ദുരുപയോഗം എന്നീ കുറ്റങ്ങളാണ് എസ്ഐടി പ്രതികള്ക്കെതിരെ ചുമത്തിയിട്ടുള്ളത്.
ശബരിമല സ്വര്ണക്കവര്ച്ചയുടെ നാള്വഴി
2019-ൽ ശബരിമല ക്ഷേത്രത്തിലെ ദ്വാരപാലക ശിൽപങ്ങളും ശ്രീകോവിലിന്റെ കട്ടിളയും സ്വർണം പൂശുന്നതിനായി ചെന്നൈയിലേക്ക് കൊണ്ടുപോയിരുന്നു. എന്നാൽ ഇതിന്റെ മറവിൽ വലിയ തോതിലുള്ള ക്രമക്കേടുകൾ നടന്നതായി ഹൈക്കോടതി നിരീക്ഷിക്കുകയും വിഷയത്തിൽ വിശദമായ അന്വേഷണം നടത്താൻ പ്രത്യേക അന്വേഷണ സംഘത്തെ നിയോഗിക്കുകയും ചെയ്തു. സ്വർണം പൂശലും മറ്റ് നവീകരണ പ്രവർത്തനങ്ങളും നടന്ന വേളയിൽ ഗൂഢാലോചന, വിശ്വാസവഞ്ചന, വ്യാജരേഖ നിർമ്മാണം, സ്വർണം ദുരുപയോഗം ചെയ്യൽ തുടങ്ങിയ ഗുരുതരമായ കുറ്റങ്ങൾ നടന്നുവെന്ന് പ്രാഥമിക അന്വേഷണത്തിൽ തന്നെ വ്യക്തമായി. ഇതിനെത്തുടർന്ന് കവർച്ചയുടെ പ്രധാന ഇടനിലക്കാരനെന്ന് സംശയിക്കപ്പെടുന്ന ഉണ്ണികൃഷ്ണൻ പോറ്റിയെ പോലീസ് അറസ്റ്റ് ചെയ്തു. ഇതോടെയാണ് അഴിമതിയുടെ ഒരു വലിയ വലക്കണ്ണിയിലേക്ക് അന്വേഷണം നീണ്ടത്.
അന്വേഷണം പുരോഗമിക്കുന്തോറും തിരുവിതാംകൂർ ദേവസ്വം ബോർഡിലെ ഉയർന്ന ഉദ്യോഗസ്ഥർക്കും മുൻ ബോർഡ് അംഗങ്ങൾക്കും ഈ കവർച്ചയിൽ പങ്കുണ്ടെന്ന് തെളിഞ്ഞു. സ്വർണ്ണത്തിന് പകരം ചെമ്പ് ഉപയോഗിച്ച് ഭക്തരെയും സർക്കാരിനെയും കബളിപ്പിക്കാനുള്ള ആസൂത്രണം നടന്നതായി ക്രൈംബ്രാഞ്ച് കണ്ടെത്തി. ശിൽപങ്ങളിൽ പൊതിഞ്ഞിരുന്ന സ്വർണ്ണപ്പാളികൾ മോഷ്ടിച്ചെടുക്കുകയും അവയ്ക്ക് പകരം ചെമ്പുപാളികൾ എന്ന് ഔദ്യോഗിക രേഖകളിൽ ബോധപൂർവ്വം തെറ്റായി രേഖപ്പെടുത്തുകയും ചെയ്തു. ഇത് കവർച്ച സുഗമമാക്കാൻ വേണ്ടിയായിരുന്നുവെന്ന് വ്യക്തമാണ്. ഇതിന്റെ പശ്ചാത്തലത്തിൽ ദേവസ്വം ബോർഡ് മുൻ പ്രസിഡന്റും സിപിഎം നേതാവുമായ എ. പത്മകുമാർ അടക്കമുള്ള അന്നത്തെ ദേവസ്വം ബോർഡ് അംഗങ്ങളെ ക്രൈംബ്രാഞ്ച് പ്രതിപ്പട്ടികയിൽ ഉൾപ്പെടുത്തി ചോദ്യം ചെയ്യുകയും ചിലരെ അറസ്റ്റ് ചെയ്യുകയും ചെയ്തു.
മോഷ്ടിക്കപ്പെട്ട സ്വർണ്ണത്തിന്റെ ഒരു ഭാഗം കേരളത്തിന് പുറത്തുള്ള വിവിധ ജ്വല്ലറികളിൽ വിറ്റഴിച്ചതായും അന്വേഷണ സംഘം കണ്ടെത്തിയിട്ടുണ്ട്. ഈ കണ്ടെത്തലുകൾ ഉദ്യോഗസ്ഥർക്കെതിരെ അഴിമതി നിരോധന നിയമത്തിലെ വിവിധ വകുപ്പുകൾ ചുമത്താൻ കാരണമായി. ഔദ്യോഗിക പദവി ദുരുപയോഗം ചെയ്തുകൊണ്ട് ഒരു പുണ്യക്ഷേത്രത്തിലെ സ്വർണം തട്ടിയെടുത്തത് അതീവ ഗൗരവത്തോടെയാണ് കോടതിയും സർക്കാരും കണ്ടത്. തുടർന്ന് ഈ കേസിലെ സ്വർണ്ണവുമായി ബന്ധപ്പെട്ട കള്ളപ്പണ ഇടപാടുകൾ അന്വേഷിക്കുന്നതിനായി എൻഫോഴ്സ്മെന്റ് ഡയറക്ടറേറ്റും കേസിൽ ഇടപെട്ടതോടെ കേസ് ഒരു അന്തർസംസ്ഥാന ബന്ധമുള്ള കുറ്റകൃത്യമായി മാറി.
ഒക്ടോബർ മുതൽ ഓരോ ഘട്ടത്തിലും പ്രമുഖരായ വ്യക്തികളാണ് പോലീസിന്റെ പിടിയിലായത്. ഒക്ടോബർ 17-ന് പ്രധാന പ്രതി ഉണ്ണികൃഷ്ണൻ പോറ്റി പിടിയിലായതോടെ ആരംഭിച്ച അറസ്റ്റ് പരമ്പരയിൽ ഒക്ടോബർ 23-ന് മുൻ അഡ്മിനിസ്ട്രേറ്റീവ് ഓഫീസർ മുരാരി ബാബുവും, ഒക്ടോബർ 31-ന് മുൻ എക്സിക്യൂട്ടീവ് ഓഫീസർ ഡി. സുധീഷ് കുമാറും പിടിയിലായി. നവംബർ മാസം ഏഴിന് മുൻ തിരുവാഭരണം കമ്മീഷണർ കെ.എസ്. ബൈജുവിനെയും 17-ന് മുൻ പ്രസിഡന്റ് എ. പത്മകുമാറിനെയും അറസ്റ്റ് ചെയ്തു. തുടർന്ന് ഡിസംബർ മാസം 17-ന് മുൻ അഡ്മിനിസ്ട്രേറ്റീവ് ഓഫീസർ എസ്. ശ്രീകുമാറും 19-ന് കർണാടകയിലെ ജ്വല്ലറി ഉടമകളായ ഗോവർധൻ, പങ്കജ് ഭണ്ഡാരി എന്നിവരും നിയമത്തിന് മുന്നിലായി. ഡിസംബർ 29-ന് എൻ. വിജയകുമാറും ഏറ്റവും ഒടുവിൽ ജനുവരി 9-ന് തന്ത്രി കണ്ഠര് രാജീവരും അറസ്റ്റിലായി.
