മുംബൈ: ബോളിവുഡ് താരം രൺവീർ സിങ്ങിനും പ്രമുഖ സംവിധായകൻ രോഹിത് ഷെട്ടിക്കും നേരെ ലോറൻസ് ബിഷ്ണോയി സംഘത്തിന്റെ വധഭീഷണി. ബിഷ്ണോയി സംഘത്തിലെ ഹരി ബോക്സർ എന്നയാളാണ് ഭീഷണി മുഴക്കിയിരിക്കുന്നത്. രൺവീറിനെയും രോഹിത് ഷെട്ടിയെയും മാത്രമല്ല, അവരുടെ കീഴിൽ ജോലി ചെയ്യുന്ന മുഴുവൻ ജീവനക്കാരെയും അവരുടെ കുടുംബങ്ങളെയും വധിക്കുമെന്നാണ് ഭീഷണി സന്ദേശത്തിലുള്ളത്.

ഹരി ബോക്സറുടെ മുന്നറിയിപ്പ്:

"നിങ്ങളുടെ അടുത്ത ഏഴ് തലമുറകൾ ഓർക്കുന്ന രീതിയിൽ ഞങ്ങൾ പെരുമാറും. പോലീസിൽ പരാതി നൽകാൻ നിങ്ങൾക്ക് വലിയ ഇഷ്ടമാണല്ലോ. നിങ്ങളുടെ മാനേജർമാരുടെയും ജീവനക്കാരുടെയും താമസസ്ഥലം, ഓഫീസ് സമയം, അവരുടെ കുടുംബങ്ങൾ എവിടെ കഴിയുന്നു തുടങ്ങിയ എല്ലാ വിവരങ്ങളും ഞങ്ങളുടെ കൈവശമുണ്ട്. അവരെ ഓരോരുത്തരെയായി കൊന്നൊടുക്കിത്തുടങ്ങുമ്പോൾ നിങ്ങൾക്ക് ബോധം വരും," എന്നാണ് ശബ്ദരേഖയിൽ പറയുന്നത്.

രണ്ടാം തവണയും ഭീഷണി:

ഇത് രണ്ടാം തവണയാണ് രൺവീർ സിങ്ങിന് ബിഷ്ണോയി സംഘത്തിൽ നിന്ന് ഭീഷണി നേരിടുന്നത്. മുൻപ് കോടികൾ ആവശ്യപ്പെട്ട് ഇവർ താരത്തിന് വാട്സാപ്പ് സന്ദേശം അയച്ചിരുന്നു. ഇതിന് പിന്നാലെ രൺവീറിനും ദീപിക പദുക്കോണിനും സുരക്ഷ വർധിപ്പിച്ചിരുന്നു. നൽകിയ വാഗ്ദാനത്തിൽ നിന്ന് രൺവീർ പിന്മാറിയതാണ് പുതിയ പ്രകോപനത്തിന് കാരണമെന്നാണ് റിപ്പോർട്ട്. സംവിധായകൻ രോഹിത് ഷെട്ടിയുടെ വീടിന് നേരെ അടുത്തിടെ നടന്ന വെടിവെപ്പിലും ഹരി ബോക്സറുടെ പേര് ഉയർന്നു വന്നിരുന്നു.

സൽമാൻ ഖാനുമായി സഹകരിക്കുന്ന എല്ലാവരെയും ലക്ഷ്യം വെക്കുമെന്ന് ബിഷ്ണോയി സംഘം നേരത്തെ വ്യക്തമാക്കിയിരുന്നു. സൽമാനെ പരിപാടിയിലേക്ക് ക്ഷണിച്ചതിന്റെ പേരിൽ കപിൽ ശർമ്മയുടെ കഫേയ്ക്ക് നേരെയും ഇവർ ആക്രമണം നടത്തിയിരുന്നു. പുതിയ ഭീഷണി സന്ദേശത്തിന്റെ പശ്ചാത്തലത്തിൽ സുരക്ഷാ ഏജൻസികൾ അതീവ ജാഗ്രതയിലാണ്.

ആരാണ് ഹരി ബോക്സർ

ലോറൻസ് ബിഷ്‌ണോയി ഗുണ്ടാസംഘത്തിലെ പ്രധാനികളിലൊരാളും കുപ്രസിദ്ധ കുറ്റവാളിയുമാണ് ഹരി ബോക്സർ. രാജസ്ഥാനിലെ ബൻസൂർ ചതർപുര ആധി ഗേലി ഗ്രാമക്കാരനായ ഹരി ചന്ദ് (36) എന്ന സാധാരണക്കാരൻ എങ്ങനെ ക്രിമിനൽ ലോകത്തെ 'ഹരി ബോക്സർ' ആയി മാറിയെന്നത് ഞെട്ടിക്കുന്ന കഥയാണ്.

പരാജയപ്പെട്ട കരിയർ, വഴിമാറിയ ജീവിതം:

കർഷകനായ ഗിർധാരി ജാട്ടിന്റെ മകനായ ഹരി ചന്ദ് ഗാന്ധി സ്കൂളിലും ബൻസൂർ കോളേജിലുമായാണ് വിദ്യാഭ്യാസം പൂർത്തിയാക്കിയത്. ബി.എ ബിരുദധാരിയായ ഇയാൾ രാജസ്ഥാൻ പോലീസ്, ആർമി, എസ്.എസ്.സി തുടങ്ങിയ പരീക്ഷകൾക്കായി വർഷങ്ങളോളം കഠിനമായി പരിശ്രമിച്ചിരുന്നു. എന്നാൽ സർക്കാർ ജോലി ലഭിക്കാത്തതിനെത്തുടർന്ന് ജയ്പൂരിൽ ബോക്സിങ് പരിശീലകനായി ജോലിയിൽ പ്രവേശിച്ചു. ഇവിടെ നിന്നാണ് ഹരി ചന്ദ് എന്ന പേര് 'ഹരി ബോക്സർ' എന്നായി മാറിയത്.

2022 മുതൽ കാണാമറയത്ത്:

പത്താം ക്ലാസിലും ഒൻപതാം ക്ലാസിലും പഠിക്കുന്ന രണ്ട് കുട്ടികളുടെ അച്ഛൻ കൂടിയാണയാൾ. അനിയൻ വിക്കി ഫിനാൻസ് മേഖലയിൽ ജോലി ചെയ്യുന്നു. 2022-ൽ ബൻസൂർ വിട്ട ഇയാൾ പിന്നീട് ഗ്രാമത്തിലേക്ക് മടങ്ങിവന്നിട്ടില്ല. പോലീസിന്റെ പീഡനം കാരണമാണ് താൻ ഒളിവിൽ പോകുന്നതെന്ന് ഇയാൾ മുൻപ് പരാതിപ്പെട്ടിരുന്നു.

ഗുണ്ടാസംഘങ്ങളുമായുള്ള ബന്ധം:

അസാമാന്യ ശാരീരിക ബലമുള്ള ഹരിയെ ഗ്രാമത്തിലുള്ളവർക്ക് പോലും പേടിയായിരുന്നു. ഒളിവിൽ പോയ ശേഷം ലോറൻസ് ബിഷ്ണോയി സംഘവുമായി അടുത്തതോടെയാണ് ഹരി ബോക്സർ എന്ന പേര് കൊടും ക്രിമിനലുകളുടെ പട്ടികയിലേക്ക് ഉയർന്നത്. ഒരു കാലത്ത് സർക്കാർ ജോലി സ്വപ്നം കണ്ടിരുന്ന യുവാവ് ഇന്ന് ബിഷ്ണോയി ഗ്യാങ്ങിന്റെ പ്രധാന ഹിറ്റ്മാനായി മാറിയത് നാട്ടുകാരെയും കുടുംബത്തെയും ഒരുപോലെ അമ്പരപ്പിക്കുകയാണ്.

ബിഷ്‌ണോയി സംഘത്തിന്റെ ക്രിമിനൽ പ്രവർത്തനങ്ങൾ ഏകോപിപ്പിക്കുന്നതിൽ നിർണ്ണായക പങ്കുവഹിക്കുന്ന വ്യക്തിയാണ്. ലോറൻസ് ബിഷ്‌ണോയിക്കും കാനഡ ആസ്ഥാനമായി പ്രവർത്തിക്കുന്ന ഗോൾഡി ബ്രാർക്കും വേണ്ടി ഇന്ത്യയിൽ ഭീഷണിക്കത്തുകൾ അയക്കുന്നതും വെടിവെപ്പുകൾ ആസൂത്രണം ചെയ്യുന്നതും ഇയാളാണെന്ന് റിപ്പോർട്ടുകളുണ്ട്.

ബോളിവുഡ് താരങ്ങളെയും ബിസിനസുകാരെയും ഭീഷണിപ്പെടുത്തി പണം തട്ടുന്നതിലാണ് ഇയാൾ പ്രധാനമായും ശ്രദ്ധ കേന്ദ്രീകരിക്കുന്നത്. സൽമാൻ ഖാനുമായി അടുപ്പമുള്ളവരെയെല്ലാം ലക്ഷ്യം വെക്കുമെന്ന് ഇയാൾ പരസ്യമായി പ്രഖ്യാപിച്ചിട്ടുണ്ട്. രോഹിത് ഷെട്ടിയുടെ വീടിന് നേരെ നടന്ന വെടിവെപ്പിലും കാനഡയിൽ കപിൽ ശർമ്മയുടെ കഫേയ്ക്ക് നേരെ നടന്ന ആക്രമണത്തിലും ഇയാളുടെ പേര് പോലീസ് റിപ്പോർട്ടുകളിൽ പരാമർശിച്ചിട്ടുണ്ട്. ബിസിനസുകാരെയും താരങ്ങളെയും ഭീഷണിപ്പെടുത്താൻ ഇയാൾ സോഷ്യൽ മീഡിയയും ഓഡിയോ സന്ദേശങ്ങളും വ്യാപകമായി ഉപയോഗിക്കാറുണ്ട്.

ബിഷ്‌ണോയി ഗ്യാങ്ങിന്റെ 'പ്രൊട്ടക്ഷൻ മണി' നൽകാത്ത ഹോട്ടലുടമകളെ ലക്ഷ്യം വെച്ച് ഹരി ബോക്സർ ആക്രമണങ്ങൾ നടത്താറുണ്ട്. കഴിഞ്ഞ വർഷം രാജസ്ഥാനിലെയും ഡൽഹിയിലെയും ചില പ്രമുഖ ക്ലബ്ബുകൾക്ക് നേരെ നടന്ന വെടിവെപ്പുകളിൽ ഇയാൾക്ക് പങ്കുണ്ടെന്ന് കണ്ടെത്തിയിരുന്നു. കുറ്റകൃത്യങ്ങൾ ചെയ്ത ശേഷം അതിന്റെ ഉത്തരവാദിത്തം ഏറ്റെടുത്ത് സോഷ്യൽ മീഡിയയിൽ പോസ്റ്റുകൾ ഇടുന്നതും ഇയാളുടെ രീതിയാണ്. ഇത് യുവാക്കളെ ക്രിമിനൽ സംഘങ്ങളിലേക്ക് ആകർഷിക്കുന്നതിനും പൊതുജനങ്ങളിൽ ഭീതി വിതയ്ക്കുന്നതിനും വേണ്ടിയാണ്.

ബോളിവുഡ്രൺവീർ സിംഗ്രോഹിത് ഷെട്ടി

സ്വന്തം ലേഖകൻ