കെയറര്‍ വിസയില്‍ യുകെയില്‍ എത്തിയ ജമൈക്കക്കാരി ബ്രിട്ടീഷുകാരാണ് വിവാഹം ചെയ്തു; എന്നിട്ടും എട്ടു വയസ്സുള്ള കുഞ്ഞിന് വിസയില്ല; അനധികൃത കുടിയേറ്റക്കാരനെ നാട് കടത്തിയാല്‍ കുഞ്ഞിന് വിഷമം ആകുമെന്നതിനാല്‍ വേണ്ടന്ന് ട്രിബ്യുണല്‍ ജഡ്ജ്
കെയറര്‍ വിസയില്‍ യുകെയില്‍ എത്തിയ ജമൈക്കക്കാരി ബ്രിട്ടീഷുകാരാണ് വിവാഹം ചെയ്തു
ലണ്ടന്‍: ജമൈക്കയില്‍ ആഞ്ഞടിച്ച മെലിസ്സ കൊടുങ്കാറ്റ് മൂലം ബ്രിട്ടനിലുള്ള മാതാപിതാക്കള്‍ക്കൊപ്പം ചേരാന്‍ കഴിയാതെ പോയ എട്ടു വയസ്സുകാരി ജമൈക്കയില്‍ തന്നെ അഗതിയായി കഴിയുന്നു. ലാറ്റി - യാന സ്റ്റെഫാനി ബ്രൗണ്‍ എന്ന എട്ടുവയസ്സുകാരിയുടെ അമ്മ, കെറിയന്‍ ബിഗ്ബി, ജമൈക്കയില്‍ നിന്നും ബ്രിട്ടനിലേക്ക് വന്നതാണ്. കെയറര്‍ ആയി ജോലി ചെയ്യുന്ന അവര്‍, ലാറ്റിയുടെ പിതാവും ടെലിക്കമ്മ്യൂണിക്കേഷന്‍ വര്‍ക്കറുമായ ജെറോം ഹാര്‍ഡിക്കൊപ്പം ജീവിക്കുന്നതിനാണ് 2023 ഏപ്രിലില്‍ ബ്രിട്ടനിലെത്തിയത്. മകളെ തന്റെ അമ്മയെ ഏല്‍പ്പിച്ചിട്ടായിരുന്നു കെറിയന്‍ ബ്രിട്ടനിലേക്ക് പറന്നത്.
ലാറ്റിയുടെ വിസയ്ക്കുള്ള അപേക്ഷാ ഫീസില്‍ 4000 പൗണ്ട് വരെ ലാഭിക്കുന്നതിനായി ഈ വര്‍ഷം ഇരുവരും വിവാഹം കഴിച്ചു. മെലീസ് കൊടുങ്കാറ്റ് എത്തിയതോടെ അടിയന്തിര സാഹചര്യം ചൂണ്ടിക്കാട്ടി വിസ അപേക്ഷയില്‍ ഉടനടി തീരുമാനമെടുക്കണമെന്ന് അവര്‍ ഹോം ഓഫീസിനോട് അഭ്യര്‍ത്ഥിക്കുകയും ചെയ്തു. ലാറ്റി തന്റെ മുത്തശ്ശിക്കൊപ്പം താമസിച്ചിരുന്ന വീട് കൊടുങ്കാറ്റില്‍ പൂര്‍ണ്ണമായും തകര്‍ന്നു. മാത്രമല്ല, ലാറ്റിയേ നോക്കാനുള്ള ശാരീരിക ശേഷി ഇല്ലാത്ത അവസ്ഥയിലാണ് മുത്തശ്ശിയിപ്പോള്‍. കൊടുങ്കാറ്റ് പൂര്‍ണ്ണമായും കശക്കിയെറിഞ്ഞ ഹാനോവറിലെ ക്യാഷ് ഹില്‍സിലായിരുന്നു ഇവരുടെ താമസം.
ഈ മേഖലയില്‍ ഏകദേശം 16 ലക്ഷത്തോളം കുട്ടികള്‍ ശുദ്ധജലം, വിദ്യാഭ്യാസം, പോഷകാഹാരം തുടങ്ങിയ അത്യാവശ്യ സൗകര്യം പോലുമില്ലാതെയാണ് ജീവിക്കുന്നതെന്നും, അവര്‍ക്ക് ആവശ്യമായ സഹായം എത്തിക്കണമെന്നും യൂണിസെഫ് അഭ്യര്‍ത്ഥിച്ചിരിക്കുകയാണ്. ഇത്തരമൊരു സാഹചര്യത്തിലും ലാറ്റിക്ക് വിസ അനുവദിക്കാന്‍ കഴിയില്ലെന്ന നിലപാടാണ് ഹോമോഫീസ് എടുത്തിരിക്കുന്നത്. കൊടുങ്കാറ്റ് ദുരിതം വിതച്ച സാഹചര്യമുണ്ടെങ്കിലും, മുത്തശ്ശി ലാറ്റിയെ നോക്കാന്‍ കഴിയാത്ത സാഹചര്യമാണെങ്കിലും, അതൊക്കെ തെളിയിക്കുന്നതിനുള്ള തെളിവുകള്‍ ഹാജരാക്കിയിട്ടില്ല എന്നാണ് ഹോം ഓഫീസ് കാരണമായി പറയുന്നത്.
ഈ തീരുമാനത്തിനെതിരെ അപ്പീല്‍ പോകാനുള്ള ശ്രമത്തിലാണ് ലാറ്റിയുടെ മാതാപിതാക്കള്‍. എന്നാല്‍, ഇപ്പോള്‍ തന്നെ 1,06,000 അപ്പീലുകളാണ് തീരുമാനത്തിനായി കെട്ടിക്കിടക്കുന്നതെന്ന് അവരുടെ അഭിഭാഷകര്‍ പറയുന്നു. അതായത്, അപ്പീലില്‍ തീരുമാനമെടുക്കാന്‍ ചുരുങ്ങിയത് രണ്ട് വര്‍ഷമെങ്കിലും വേണ്ടിവരുമത്രെ. ഇവിടെ ലെറ്റിയുടെ പിതാവ് ബ്രിട്ടീഷ് പൗരനാണ്. മാതാവ് നിയമപരമായി ബ്രിട്ടനില്‍ എത്തിയ വ്യക്തിയും. അനധികൃതമായി എത്തുന്നവര്‍ക്ക് ആനുകൂല്യങ്ങള്‍ ഏറെയുള്ളിടത്താണ് ഒരു എട്ട് വയസ്സുകാരിക്ക് വിസ നിഷേധിക്കുന്നത് എന്ന് വിമര്‍ശകര്‍ ചൂണ്ടിക്കാട്ടുന്നു.
അനധികൃത കുടിയേറ്റക്കാരനെ നാട് കടത്തുന്നത് തടഞ്ഞ് കോടതി
നിയമപരമായി ബ്രിട്ടനില്‍ കുടിയേറിയ വനിതയ്ക്ക് ബ്രിട്ടീഷ് പൗരനില്‍ ജനിച്ച കുഞ്ഞിന് വിസ നിഷേധിക്കുന്ന ബ്രിട്ടീഷ് നിയമ സംവിധാനം ഇപ്പോള്‍ അനധികൃതമായി ബ്രിട്ടനില്‍ താമസിക്കുന്ന വിദേശിയെ നാടുകടത്താനുള്ള തീരുമാനം തടഞ്ഞിരിക്കുന്നത് ഏറെ സമയം തന്റെ മകള്‍ക്കൊപ്പം ചെലവഴിച്ചതിനാല്‍, ഇയാള്‍ വിട്ടു പോകുന്നത് മകള്‍ക്ക് മനോവിഷമം ഉണ്ടാക്കും എന്നതിനാലാണ്. പേരു വെളിപ്പെടുത്താതിരിക്കാന്‍ നിയമപരമായി അവകാശം സിദ്ധിച്ച 40 കാരനായ അല്‍ബേനിയന്‍ പൗരനെ നേരത്തെ ഒരിക്കല്‍ നാറ്റ് കടത്തിയിരുന്നു. പിന്നീറ്റ് അനധികൃതമായി ബ്രിട്ടനില്‍ കുടിയേറിയ ഇയാള്‍ 2016 മുതല്‍ ബ്രിട്ടനില്‍ നിയമവിരുദ്ധമായി താമസിക്കുകയാണ്.
ഇയാളെ ഇപ്പോള്‍ ബ്രിട്ടനില്‍ നിന്നും നാടുകടത്താനുള്ള നടപടികള്‍ പൂര്‍ത്തിയാക്കുന്നതിനിടയിലാണ് അത്തരമൊരു നടപടി മകളില്‍ കനത്ത മാനസികാഘാതത്തിന് കാരണമാകുമെന്നതിനാല്‍ ഒരു ട്രൈബ്യൂണല്‍ ജഡ്ജ് തടഞ്ഞിരിക്കുന്നത്. ഏറ്റവും കൗതുകകരമായ കാര്യം ഇയാള്‍ ആ കുട്ടിയുടെ അമ്മയ്ക്കൊപ്പമല്ല താമസിക്കുന്നത് എന്നതും, മകളുടെ ജനന സര്‍ട്ടിഫിക്കറ്റില്‍ ഇയാളുടെ പേര്‍ ഇല്ല എന്നതുമാണ്. മകള്‍ക്കും അമ്മയ്ക്കും ബ്രിട്ടനില്‍ അഭയാര്‍ത്ഥി സ്റ്റാറ്റസ് ഉണ്ട്. ഇവര്‍ക്ക് തിരികെ അല്‍ബേനിയയിലേക്ക് പോകാനുമാവില്ല. അതുകൊണ്ടു തന്നെ ഇയാളെ നാടുകടത്തിയാല്‍ ഇയാള്‍ക്ക് അവരെ സന്ദര്‍ശിക്കാന്‍ കഴിയില്ല എന്നാണ് ഇയാള്‍ വാദിക്കുന്നത്.
അച്ഛന്‍ എന്നാല്‍ മകള്‍ക്ക് ജീവനാണെന്നാണ് അമ്മ പറയുന്നത്. മാത്രമല്ല, അയാള്‍ ധാരാളം സമയവും പണവും മകള്‍ക്കായി അയാള്‍ ചെലവഴിക്കാറുണ്ടെന്നും അമ്മ പറയുന്നു. അയാള്‍, മകളെ ബാലറ്റിനും മറ്റ് വിരുന്നുകള്‍ക്കും കൊണ്ടു പോകാറുണ്ട്. മാത്രമല്ല, ഇടയ്ക്കൊക്കെ തന്റെ മാതാപിതാക്കള്‍ക്കൊപ്പം സമയം ചെലവഴിക്കാന്‍ മകളെ കൊണ്ടു പോകുന്നതും അയാളാണെന്ന് കുട്ടിയുടെ അമ്മ പറയുന്നു. പിതാവ് നാടുകടത്തപ്പെടുമോ എന്ന കാര്യത്തില്‍ കുട്ടിക്ക് അതീവ ഉത്കണ്ഠയുണ്ടെന്ന് കുട്ടിയുടെ സ്‌കൂള്‍ അധികൃതരും പറയുന്നു.
