കൊച്ചി: ഐഎൻഎസ് വിക്രാന്ത് പ്രധാനമന്ത്രി നരേന്ദ്ര മോദി ഇന്നു രാജ്യത്തിനു സമർപ്പിക്കും. ഇന്ത്യ 75ാം ജന്മദിനം ആഘോഷിക്കുന്ന വേളയിലുള്ള കമ്മിഷനിങ് ചടങ്ങിൽ മറ്റൊരു നിർണ്ണായക പ്രഖ്യാപനവും ഉണ്ടായേക്കും. രണ്ടാം വിമാനവാഹിനി കപ്പൽ നിർമ്മാണം സംബന്ധിച്ച പ്രഖ്യാപനം പ്രധാനമന്ത്രി നടത്തും എന്നാണ് സൂചന. ഇന്ത്യ തദ്ദേശീയമായി രൂപകൽപന ചെയ്തു നിർമ്മിച്ച ആദ്യ വിമാനവാഹിനിയാണ് വിക്രാന്ത്. കൊച്ചിയിലായിരുന്നു നിർമ്മാണം.

9.30ന് കപ്പൽശാലയിലെത്തുന്ന പ്രധാനമന്ത്രി 150 അംഗ ഗാർഡ് ഓഫ് ഓണർ പരിശോധിക്കും. നാവികസേനാ മേധാവി അഡ്‌മിറൽ ആർ.ഹരികുമാർ, ദക്ഷിണനാവിക കമാൻഡ് മേധാവി വൈസ് അഡ്‌മിറൽ എം.എ.ഹംപിഹോളി, കൊച്ചിൻ ഷിപ്യാഡ് ലിമിറ്റഡ് സിഎംഡി മധു എസ്.നായർ എന്നിവരും പ്രസംഗിക്കും. യുദ്ധക്കപ്പലിന്റെ കമാൻഡിങ് ഓഫിസർ കമ്മഡോർ വിദ്യാധർ ഹാർകെ കമ്മിഷനിങ് വാറന്റ് വായിക്കും. തുടർന്നു നാവികസേനയുടെ പുതിയ പതാക, നേവൽ എൻസൈൻ പ്രധാനമന്ത്രി അനാഛാദനം ചെയ്യും.

കപ്പലിന്റെ ഫ്‌ളൈറ്റ് ഡെക്കിൽ എത്തുന്ന പ്രധാനമന്ത്രി സൈനികരുടെ സല്യൂട്ട് സ്വീകരിക്കും. ഇതിനു ശേഷം കപ്പലിന്റെ മുൻഡെക്കിൽ ദേശീയപതാകയും പിൻഡെക്കിൽ പുതിയ നേവൽ എൻസൈനും ഉയർത്തും. കമ്മിഷനിങ് പ്ലേറ്റും അനാഛാദനം ചെയ്യും. 20 യുദ്ധവിമാനങ്ങളും 10 ഹെലികോപ്റ്ററുകളും ഉൾപ്പെടെ 30 വിമാനങ്ങൾ ഒരേസമയം സൂക്ഷിക്കാനും അറ്റകുറ്റപ്പണി നടത്താനുമുള്ള സൗകര്യം കപ്പലിലുണ്ട്. യുദ്ധവിമാനങ്ങൾ പറന്നുയരാൻ 2 റൺവേകളും ഇറങ്ങാൻ ഒരെണ്ണവുമുണ്ട്. 23,500 കോടി രൂപയാണു നിർമ്മാണച്ചെലവ്.

സമുദ്രയുദ്ധ രംഗത്ത് ഏഷ്യയിൽ ഇന്ത്യയെ വെല്ലാൻ മറ്റൊരു ശക്തിയും ഇനിയുണ്ടാകില്ല. ചൈനയെയും കടത്തിവെട്ടുന്ന വിധത്തിലാണ് നാവിക സേനാ രംഗത്തെ ഇന്ത്യൻ മുന്നേറ്റം. ലോകരാജ്യങ്ങളെ അസൂയപ്പെടുത്തും വിധത്തിലുള്ള നേട്ടമാണ് ഇന്ത്യ ഇപ്പോൾ കൈവരിക്കുന്നതും. ഇന്ത്യ തദ്ദേശീയമായി നിർമ്മിച്ച ആദ്യ വിമാനവാഹിനി ഐഎൻഎസ് വിക്രാന്ത് ഇതിന് തെളിവാണ്. കപ്പൽ കമ്മിഷൻ ചെയ്തു കഴിഞ്ഞ ശേഷമാകും യുദ്ധവിമാനങ്ങൾ ലാൻഡ് ചെയ്തും പറന്നുയർന്നുമുള്ള പരീക്ഷണങ്ങൾ നടക്കുക.

രണ്ടു ഫുട്ബോൾ ഗ്രൗണ്ടിന്റെ വലുപ്പം ഒഴുകുന്ന നഗരം

കടലിൽ ഒഴുകുന്ന ചെറുനഗരമാണു വിക്രാന്ത്. കപ്പലിന്റെ ഫ്ളൈറ്റ് ഡെക്കിനു മാത്രം രണ്ടു ഫുട്ബോൾ ഗ്രൗണ്ടിനു തുല്യമായ വലുപ്പം. 262 മീറ്റർ നീളവും 62 മീറ്റർ വീതിയും 59 മീറ്റർ ഉയരവും കപ്പലിനുണ്ട്. 15 ഡെക്കുകളാണു കപ്പലിൽ. 40,000 ടൺ ആണു ഭാരവാഹക ശേഷി. 1700 പേരുള്ള വരുന്ന ക്രൂവിനായി രൂപകൽപന ചെയ്ത കംപാർട്മെന്റുകളിൽ വനിതാ ഓഫിസർമാർക്കു വേണ്ടി പ്രത്യേക ക്യാബിനുകളും ഉൾപ്പെടുത്തിയിട്ടുണ്ട്. ഒരേസമയം 10 ഹെലികോപ്റ്ററുകളെയും 20 യുദ്ധവിമാനങ്ങളെയും വഹിക്കാൻ കഴിയുന്ന വിക്രാന്തിന്റെ പരമാവധി വേഗം മണിക്കൂറിൽ 28 നോട്ടിക്കൽ മൈലാണ്. 3 റൺവേകളുണ്ട്.

ഐഎൻഎസ് വിക്രാന്തിന്റെ പ്രത്യേകതകൾ

2009 ഫെബ്രവരിയിൽ കീലിട്ട കപ്പൽ 2018ൽ പൂർത്തിയാവേണ്ടതായിരുന്നു. പല കാരണങ്ങളാൽ നിർമ്മാണം നീളുകയായിരുന്നു. 2013ലായിരുന്നു നീറ്റിലിറക്കിയത്. 2002ലാണു വിമാന വാഹിനിക്കപ്പൽ നിർമ്മാണ പദ്ധതിക്കു കേന്ദ്ര മന്ത്രിസഭ അനുമതി നൽകിയത്. റഷ്യൻ സാങ്കേതിക വിദ്യയുടെ സഹായത്തോടെ നിർമ്മിച്ച കപ്പലിന് മണിക്കൂറിൽ 28 നോട്ടിക്കൽ മൈൽ മൈൽ വേഗതയും 18 മൈൽ ക്രൂയിസിങ് വേഗതയും 7,500 മൈൽ ദൂരം പോകുവാനുള്ള ശേഷിയുമുണ്ട്. കപ്പൽ നിർമ്മാണത്തിന് 20,000 ടൺ ഉരുക്കാണ് ആവശ്യമായി വന്നത്. ഇതു മുഴുവനായും ഇന്ത്യയിലാണ് ഉൽപ്പാദിപ്പിച്ചത്. യന്ത്രഭാഗങ്ങളുടെ 70 ശതമാനവും മറ്റ് ഉപകരണങ്ങളുടെ 80 ശതമാനവും നിർമ്മിച്ചതും തദ്ദേശീയമായി തന്നെ.

ബെംഗളുരു കേന്ദ്രമായി പ്രവർത്തിക്കുന്ന പൊതുമേഖലാ സ്ഥാപനമായ ഭാരത് ഹെവി ഇലക്ട്രിക്കൽ ലിമിറ്റഡ് (ബിഎച്ച്ഇഎൽ) ആണ് കപ്പലിന്റെ ഇന്റഗ്രേറ്റഡ് പ്ലാറ്റ്ഫോം മാനേജ്മെന്റ് സംവിധാനം (ഐ.പി.എം.എസ്.) ഒരുക്കുന്നത്. 14 ഡക്കുകളാണ് കപ്പലിനുള്ളത്. ഇവയിലായി ഫ്ളൈറ്റ് ഡെക്കിനു മുകളിലായി സൂപ്പർ സ്ട്രക്ചറിലായി അഞ്ചും താഴെയായി ഒൻപതും ഡെക്കുകൾ. വിമാനങ്ങൾ സൂക്ഷിക്കുന്ന ഹാങ്ങർ ആണ് ഒരു ഡെക്ക്. ഇതിൽ ഒരേ സമയം 20 വിമാനം സൂക്ഷിക്കാം. ഹാങ്ങറിൽനിന്ന് ലിഫ്റ്റ് വഴിയാണ് വിമാനങ്ങൾ ഫ്ളെറ്റ് ഡെക്കിലെത്തിക്കുക.

മൊത്തം ഡെക്കുകളിലായി 2300 കമ്പാർട്ട്മെന്റുകളാണുള്ളത്. ഇതിൽ 1850 എണ്ണം നാവികരുടെ താമസത്തിനും ഓഫിസ് ആവശ്യത്തിനും മറ്റ് ആവശ്യങ്ങൾക്കും വേണ്ടിയുള്ളതാണ്. വനിതാ ഓഫീസർമാർക്ക് വേണ്ടി പ്രത്യേക ക്യാബിനുകളുണ്ട്. ഇവ കഴിഞ്ഞുള്ള ക്യാബിനുകളിലാണ് യുദ്ധോപകരണങ്ങളും മറ്റും സൂക്ഷിക്കുക. കപ്പലിലാകെ ഉപയോഗിച്ചിരിക്കുന്നത് 2100 കിലോ മീറ്റർ കേബിൾ.

ഇന്ത്യയുടെ ആദ്യ വിമാനവാഹിനിക്കപ്പലായ ഐഎൻഎസ് വിക്രാന്ത് 1971 ലെ യുദ്ധത്തിൽ പാക്കിസ്ഥാൻ നാവികസേനയുടെ നീക്കം ബംഗാൾ ഉൾക്കടലിൽ ചെറുത്തതിലൂടെ ഇന്ത്യൻ നാവിക ചരിത്രത്തിൽ ഗംഭീര ഏടാണ് എഴുതിച്ചേർത്തത്. 1957ൽ ബ്രിട്ടനിൽനിന്നു വാങ്ങിയ എച്ച്എംഎസ് ഹെർക്കുലിസ് എന്ന വിമാന വാഹിനിക്കപ്പൽ 1961ലാണ് ഐഎൻഎസ് വിക്രാന്ത് എന്ന പേരിൽ കമ്മിഷൻ ചെയ്തത്.

1997 ജനുവരി 31നു ഡീകമ്മിഷൻ ചെയ്തു. 2012 വരെ മുംബൈയിൽ നാവിക മ്യൂസിയമായി സൂക്ഷിച്ച ഈ കപ്പൽ 2014ൽ ലേലത്തിൽ വിറ്റു. തുടർന്ന് സുപ്രീം കോടതി അനുമതി നൽകിയതോടെ പൊളിക്കുകയായിരുന്നു. ഈ കപ്പലിനു പകരമായാണ് ഐഎസി 1 വരുന്നത്. 210 മീറ്റർ നീളവും 39 മീറ്റർ വീതിയുമുണ്ടായിരുന്ന പഴയ ഐഎൻഎസ് വിക്രാന്തിന് 25 നോട്ടിക്കൽ മൈലായിരുന്നു വേഗം. ഹെലികോപ്റ്ററുകൾ ഉൾപ്പെട 21-23 വിമാനങ്ങളെ വഹിക്കാനുള്ള ശേഷിയുണ്ടായിരുന്നു.

ബ്രിട്ടീഷ് റോയൽ നേവിയുടെ ഭാഗമായിരുന്ന എച്ച്എംഎസ് ഹെർമസ് വിമാനവാഹിനിക്കപ്പലാണ് ഐഎൻഎസ് വിരാട് ആയി ഇന്ത്യൻ സേനയിൽ അവതരിച്ചത്. 1959ൽ നിർമ്മിച്ച കപ്പൽ 1984ൽ ബ്രിട്ടൻ ഡികമ്മിഷൻ ചെയ്ത്, 1987ൽ ഇന്ത്യയ്ക്കു വിൽക്കുകയായിരുന്നു. തുടർന്ന് 30 വർഷത്തോളം ഐഎൻഎസ് വിരാടായി ഇന്ത്യൻ സേനയുടെ ഭാഗമായ കപ്പലിന്റ അവസാന യാത്ര 2016 ജൂലൈ 23ന് മുംബൈയിൽനിന്ന് കൊച്ചിയിലേക്കായിരുന്നു. 2017 മാർച്ച് ആറിന് ഡീകമ്മിഷൻ ചെയ്തു. തുടർന്ന് വിറ്റ കപ്പൽ പൊളിക്കാൻ സുപ്രീം കോടതി അനുമതി നൽകിയിരുന്നു.

മറുനാടന്‍ മലയാളി

    മറുനാടന്‍ മലയാളി ബ്യൂറോ