തല അറ്റുപോയ ശരീരം കണ്ട് പലരും മുഖം തിരിച്ചു; തൊട്ട് അടുത്തായി തകർന്ന് തരിപ്പണമായി കിടക്കുന്ന 'കെടിഎം' ബൈക്ക്; ഒറ്റ നിമിഷം കൊണ്ട് റോഡ് ചോരക്കളമായ കാഴ്ച; അതിവേഗതയിൽ കുതിച്ച് റീൽ എടുക്കുന്നതിനിടെ വ്ളോഗർക്ക് സംഭവിച്ചത്
സൂറത്ത്: സാമൂഹിക മാധ്യമങ്ങളിൽ കൂടുതൽ ലൈക്കുകളും കാഴ്ചക്കാരെയും നേടുന്നതിനായുള്ള സാഹസികത ഒടുവിൽ യുവ വ്ലോഗറുടെ ജീവനെടുത്തു. അമിതവേഗത്തിൽ ബൈക്കോടിച്ച് റീൽസ് റെക്കോർഡ് ചെയ്യുന്നതിനിടെയുണ്ടായ അപകടത്തിൽ സൂറത്ത് സ്വദേശിയായ പ്രിൻസ് പട്ടേൽ (24) ആണ് ദാരുണമായി മരണപ്പെട്ടത്. 'പികെആർ ബ്ലോഗർ' എന്ന പേരിലാണ് ഇയാൾ സമൂഹമാധ്യമങ്ങളിൽ അറിയപ്പെട്ടിരുന്നത്.
സൂറത്തിലെ ബ്രെഡ് ലൈനർ പാലത്തിൽ വെച്ചാണ് നാടിനെ നടുക്കിയ ഈ അപകടം നടന്നത്. അപകടത്തിന് തൊട്ടുമുൻപ്, പ്രിൻസ് ഏകദേശം 140 കിലോമീറ്റർ വേഗതയിൽ ബൈക്ക് ഓടിക്കുന്നതിൻ്റെ ദൃശ്യങ്ങൾ പ്രചരിക്കുന്നുണ്ട്. പാലത്തിന് മുകളിൽ വെച്ച് കെടിഎം ബൈക്കിന്റെ നിയന്ത്രണം നഷ്ടപ്പെട്ടതാണ് അപകടത്തിന് കാരണമായത്.
നിയന്ത്രണം വിട്ട് റോഡിലേക്ക് തെറിച്ചുവീണ പ്രിൻസ്, വീണിടത്തുനിന്ന് 100 മീറ്ററിലധികം ദൂരം റോഡിലൂടെ നിരങ്ങി നീങ്ങി. അതിനുശേഷം, ബൈക്ക് ഡിവൈഡറിൽ ഇടിച്ച് തകരുകയും ചെയ്തു. ഇടിയുടെയും തുടർന്നുണ്ടായ നിരങ്ങലിന്റെയും ഭീകരമായ ആഘാതത്തിൽ ബൈക്കിൽ നിന്ന് തെറിച്ചുപോയ പ്രിൻസിന്റെ തല ഉടലിൽ നിന്ന് വേർപെട്ട നിലയിലാണ് കണ്ടെത്താനായത്.
വിവരമറിഞ്ഞ് സ്ഥലത്തെത്തിയ പോലീസ് സംഘം മൃതദേഹം പോസ്റ്റ്മോർട്ടത്തിനായി മാറ്റി. അമിതവേഗത്തിലുള്ള സാഹസിക ബൈക്ക് ഓടിക്കൽ തന്നെയാണ് അപകടത്തിന്റെ പ്രാഥമിക കാരണമെന്ന് പോലീസ് സ്ഥിരീകരിച്ചു.
അപകടസമയത്ത് പ്രിൻസ് ഹെൽമറ്റ് ധരിച്ചിരുന്നില്ല. ഈ ഗുരുതരമായ അശ്രദ്ധയാണ് മരണത്തിന്റെ ആഘാതം വർദ്ധിപ്പിച്ചത്. ഗുണമേന്മയുള്ള ഒരു ഹെൽമറ്റ് ധരിച്ചിരുന്നുവെങ്കിൽ ഇത്രയും വലിയ ദുരന്തം ഒഴിവാക്കാമായിരുന്നുവെന്ന് പോലീസ് ഉദ്യോഗസ്ഥർ അഭിപ്രായപ്പെട്ടു.
സാമൂഹിക മാധ്യമങ്ങളിലെ ശ്രദ്ധ നേടുന്നതിനായി യുവാക്കൾ അമിതവേഗത്തിലും സുരക്ഷാ മാനദണ്ഡങ്ങൾ പാലിക്കാതെയും വാഹനമോടിക്കുന്നതിൻ്റെ ഭവിഷ്യത്തുകളാണ് ഈ സംഭവം ഓർമ്മിപ്പിക്കുന്നത്. റീൽസുകളും വീഡിയോകളും ചിത്രീകരിക്കുന്നതിനായി സ്വന്തം ജീവൻ പണയം വെക്കുന്ന പ്രവണത വർധിച്ചു വരുന്ന സാഹചര്യത്തിൽ പോലീസ് ഇത്തരം കാര്യങ്ങളിൽ ശക്തമായ മുന്നറിയിപ്പുകൾ നൽകുന്നുണ്ട്.
